Pikinini i Laikim Animal Samting?

OLGETA pikinini i gat laik long lukautim animal samting. Na i gat kain kain ol i ken kisim! Yangpela Tabitha i save lukautim wanpela gini-pik. Na liklik Naomi i save lukautim wanpela liklik waitpela rat. Yangpela Bobby-John i amamas long lukautim wanpela pikinini sikau. Em i tok: ‘Sikau i gat basket bilong em yet bilong slip, na em i save brukim lek olsem em i slip long paus bilong mama. Em i no laik bai ol man i holim em planti.’

Planti man tu i save laikim wanpela animal samting bilong lukautim. Na ol man bilong bipo yet i bin kisim animal bilong bus na lukautim ol. Ol Isip i bin kisim sampela animal bilong bus olsem bikpela pusi na monki na ol i bin lukautim. Na wanpela bikman bilong Rom long bipo em i save lukautim wanpela laion, nem bilong en Simitar. Em i laikim tru dispela animal, olsem na taim em i kaikai, laion tu i sindaun wantaim em. Na taim bikman i slip, laion i save slip klostu long bet bilong em. Na ol Rom i bin lukautim ol dok na ol bikpela monki. Ol i amamas long skulim monki long sindaun long baksait bilong dok na wokabaut i go.

Taim papamama i skulim pikinini, ol inap lain long lukautim gut wanpela animal samting. Pikinini yet i ken givim kaikai long en o wasim em. Na taim pikinini i gat wanpela animal samting bilong lukautim, dispela inap lainim em long planti samting. Wanpela buk (The New Encyclopædia Britannica) i tok: ‘Pasin bilong lukautim ol animal samting em i gutpela rot bilong lainim ol pikinini long redi long mekim wok, na taim pikinini i lukim animal i gat bel na i kamapim pikinini na mekim ol samting bilong lukautim ol pikinini bilong en, orait, dispela samting inap givim save long pikinini.’

Sampela papamama i givim wanpela animal samting long pikinini na bai em i ken lain long hevi bilong lukautim narapela samting i gat laip​—olsem em i no ken tru mekim nogut long animal o larim em i stap hangre o doti. Na em i gutpela rot bilong lainim ol pikinini long bikpela save bilong Man i bin wokim ol kain kain animal.​—Stat 1:24.

Planti taim pikinini i krai krai long kisim wanpela animal samting, tasol kwiktaim em i les na em i no laik mekim ol wok bilong lukautim em. Olsem na yupela olgeta papamama i mas tingting gut. Sapos yu laik givim wanpela animal samting long pikinini, yu yet yu mas redi long karim hevi bilong dispela samting.

Klinim Gut Skin i Bikpela Samting

Bikpela samting​—animal yu save lukautim em i mas i stap klin. Nogut pikinini i holim na kisim sik long en. Haus o ples slip bilong animal samting i mas i stap klin, na ating yu mas wasim sampela animal klostu klostu. Na yu mas tingim gut​—bai yu holim dispela animal o nogat. Tingim​—planti animal i save mekim wok long tang bilong ol bilong wasim skin na gras na ol narapela hap bilong bodi. Na ol inap mekim olsem, long wanem, ol binatang jem i save kamap long tang bilong ol i no bagarapim ol, tasol ol dispela jem inap bagarapim pikinini. Olsem na i no gutpela sapos yu larim pikinini i kis long wanpela animal.

Ol animal i mas i gat plet kaikai bilong ol yet. Em i no gutpela sapos yu larim wanpela animal i rapim long tang plet bilong yu. Dispela i bikpela samting, long wanem, planti animal na pisin i gat sik na dispela sik inap kalap long ol man. Na planti animal i save kaikaim man. Tru tumas, planti bilong ol dispela sik i no bikpela sik, na ating sikman i no ting em i kisim dispela sik long animal samting. Tasol sampela sik sotwin na skin i skrap i save kamap long rot bilong wanpela animal samting. Na sampela sik i bikpela sik na man inap dai long en. Wanpela buk (U.S.News & World Report) i tok: ‘Long olgeta yia inap olsem 3,300 mama i gat bel ol i save kisim sik toxoplasmosis long pusi bilong ol, olsem na 15 pesen bilong ol em pikinini i lus long bel.’

Pikinini i Mas Save Ol Animal i No Man

Taim pikinini i givim bel long wanpela animal samting, yu mas was gut, nogut em i ting dispela animal i wankain long ol man na em i gat pasin na save olsem ol man. Sapos em i kisim dispela kain tingting na dispela animal i go lapun na i dai o ka i bamim em na em i dai, pikinini bai bel hevi stret.

Tasol i no olsem ol pikinini tasol i mas lain long dispela samting, ol bikpela man tu. Sampela taim ol man i holim na mekim samting long wanpela animal olsem dispela animal i wanpela bebi. Na sapos pikinini i lukim bikpela man i mekim dispela kain pasin long wanpela animal samting, em bai bihainim wankain pasin.

Olsem na yumi mas i gat stretpela tingting long ol animal samting na lainim ol pikinini long bihainim dispela stretpela tingting. Pikinini i mas lain olsem olgeta animal samting God i wokim i bilong yumi ken amamas long ol o mekim wok long ol. Tasol yumi no ken givim bel tumas long wanpela animal olsem em i wanpela man. God i tok ol animal na pisin samting i stap aninit long ol man. Yumi man i save dai, long wanem, yumi kisim sin long Adam na Iv, tasol ol animal samting i save dai, long wanem, God i no wokim ol bilong i stap longpela taim.​—Rom 5:12; 2 Pita 2:12.

Sapos yumi kisim stretpela tingting long ol animal yumi inap amamas long lukautim ol dispela gutpela presen God i givim long ol man. Na ol animal samting i no bilong ol pikinini tasol. Planti man na meri i stap wanpis o ol i lapun o ol i sik, sapos ol i gat wanpela animal samting, bai ol i pilim olsem ol i gat poroman bilong laikim ol. Wanpela nius (AARP News Bulletin) i tok: ‘Ol saveman i tok, ol animal samting inap helpim planti man i gat sik long klok, o ol i tingting planti na bel hevi, o mak bilong blut i go antap tru.’

Kisim Wanpela Animal Samting o Nogat?

Bai yu mekim wanem sapos pikinini i tok em i laik kisim wanpela dok o pusi o pisin samting? Yu yet i mas pasim tok long em i ken kisim o nogat. Na yu mas tingim ol gutpela samting na ol samting nogut inap kamap sapos pikinini i gat wanpela animal samting. Olsem: Yu mas lusim bikpela mani liklik long baim kaikai bilong animal bilong yu; na sapos sik i kisim em, orait, yu mas baim marasin; yu mas tingim haus bilong yu, i gat ol samting bilong lukautim gut dispela animal o nogat; yu mas tingim krismas bilong pikinini, na yu mas tromoi bikpela hap taim liklik bilong lukautim gut dispela animal.

Tasol sapos yu ting i gutpela pikinini bilong yu i gat dok o pusi o pisin samting, tingim ol samting mipela i stori pinis long en. Na taim yupela i gat dispela animal yupela inap amamas long en. Lukautim em gut na lainim pikinini long mekim olsem tu. God i wokim kain kain animal samting bilong givim bikpela amamas long yumi ol man, na yumi inap mekim sampela wok long ol tu. Olsem na sapos yumi kisim stretpela tingting long ol animal yumi lukautim, ol inap mekim gutpela wok.