Askim

Yu ting i gat rong long kilim i dai animal i sik o i lapun em man i save lukautim?

Planti manmeri i ting ol kain kain animal ol i samting bilong kirapim tingting na bilong kisim amamas long en. Sampela animal ol man i kisim bilong lukautim, i kamap gutpela poroman bilong ol. Olsem: Ol dok i gat nem olsem ol i save bihainim tru tok bilong man i lukautim ol na laikim em. Olsem na yumi inap save olsem ol manmeri i save laikim tru kain animal olsem, na ol i laikim moa yet animal ol i bin lukautim inap planti yia.

Tasol planti animal i no save i stap laip longpela taim. I gat ol kain kain dok na pusi, na sampela bilong ol inap i stap laip inap 10 i go 15 yia samting. Long taim ol i lapun, ol inap kisim sik na bagarap long bodi, na dispela inap mekim na man i lukautim ol i tingting planti, em i save tingim taim ol dispela animal i yangpela na i gat strong. Yu ting i stret long kilim i dai ol dispela kain animal bilong pinisim pen bilong ol?

Kristen i laik mekim ol samting long ol animal i stret wantaim laik bilong God. Pasin bilong mekim nogut long ol animal, em i no stret wantaim laik bilong God, olsem Baibel i kamapim: “Ol stretpela man i save marimari long ol animal bilong ol, na lukautim ol gut.” (Sindaun 12:10) Tasol dispela i no makim olsem God i tingim ol animal wankain olsem em i save tingim ol man. Taim God i wokim ol man, em i kamapim klia olsem ol man na animal i no wankain. Olsem: Em i givim ol man tingting bilong kisim laip oltaim, tasol em i no bin givim dispela tingting long ol animal. (Rom 6:​23; 2 Pita 2:​12) Em i Man bilong wokim olgeta samting, olsem na em i gat rait long makim ol stretpela pasin i mas i stap namel long ol man na animal.

Stat 1:28 i tokim yumi long dispela pasin i wanem kain. God i tokim namba wan man na meri olsem: ‘Bosim olgeta samting i stap long graun. Mi putim ol pis na ol pisin na olkain animal bilong graun aninit long yupela.’ Na Song 8:​6-8 i kamapim wankain tok olsem: “Yu [God i] putim olgeta samting i stap aninit long mipela man. Yes, olgeta sipsip na bulmakau na olgeta abus i stap long bus, na olgeta pisin i flai antap, na olgeta pis bilong solwara.”

God i tok klia olsem ol man i ken yusim ol animal bilong mekim gutpela wok, na tu, kilim ol i dai. Olsem: Ol i ken yusim skin bilong ol animal long wokim klos. Na tu, bihain long Bikpela Tait long taim bilong Noa, God i givim tok orait long ol man i ken kaikai mit bilong ol animal, ol i ken kisim dispela wantaim kumu samting em kaikai God i bin givim ol long pastaim.​​—⁠Stat 3:​21; 4:4; 9:⁠3.

Dispela tok i no givim tok orait long ol man i ken kilim nating nating ol animal olsem bilong pilai spot. Long Stat 10:​9, Baibel New World Translation i tok Nimrot em i “strongpela man bilong raunim ol animal.” Tasol dispela ves i tok dispela pasin i mekim na “em i bikhet long Jehova.”

Olsem na maski man i gat wok long bosim ol animal, em i no ken mekim wok nogut long dispela namba em i holim, nogat; em i mas mekim ol samting i stret wantaim ol stiatok bilong Baibel. Dispela tok inap makim tu olsem yumi no ken larim animal yumi lukautim i karim pen nating, long wanem, em i lapun, kisim bagarap, o em i kisim wanpela sik i no inap pinis. Long kain taim olsem, em wok bilong Kristen long tingim wanem samting em i mas mekim. Sapos em i ting sik bilong animal i no inap pinis na i no gutpela long larim em i karim pen, orait Kristen inap ting i gutpela long kilim dispela animal i dai.