Yu Ting Ol Animal i Save Go Long Heven?
Bekim bilong Baibel
Baibel i tok olsem maski i gat planti samting i gat laip i stap long graun, liklik lain manmeri tasol bai go long heven. (Revelesen 14:1, 3) Ol bai go bilong mekim wok olsem king na pris wantaim Jisas. (Luk 22:28-30; Revelesen 5:9, 10) Bikpela lain manmeri bai kirap bek na stap laip long paradais long graun.—Buk Song 37:11, 29.
Baibel i no tok olsem wanpela animal o dok bai go long heven—na i gat gutpela risen. Ol animal i no inap long mekim ol samting bilong “God i singautim [ol] i go long heven.” (Hibru 3:1) Em ol kain samting olsem kisim save, bilip, na bihainim ol lo bilong God. (Matyu 19:17; Jon 3:16; 17:3) God i wokim ol man tasol bilong i stap oltaim.—Stat 2:16, 17; 3:22, 23.
Bilong i go long heven, ol samting i gat laip long graun i mas kirap bek. (1 Korin 15:42) Baibel i stori long sampela kirap bek. (1 King 17:17-24; 2 King 4:32-37; 13:20, 21; Luk 7:11-15; 8:41, 42, 49-56; Jon 11:38-44; Aposel 9:36-42; 20:7-12) Tasol, olgeta kirap bek Baibel i stori long ol em ol kirap bek bilong ol man, na i no ol animal.
Ol animal i gat spirit i no save dai?
Nogat. Tok bilong Baibel i soim olsem ol animal na manmeri wantaim i gat laip tasol. (Namba 31:28) Taim God i wokim namba 1 man, Adam, God i no putim wanpela spirit insait long em, nogat, em i mekim em i “kamap man i gat laip.” (Stat 2:7, futnot) I gat 2-pela samting i mekim ol man na ol animal i stap laip: “graun” na “win bilong laip.”
Ol samting i gat laip i save dai?
Yes, Baibel i skulim yumi olsem ol samting i gat laip inap dai. (Wok Pris 21:11, futnot; Esekiel 18:20) Taim ol animal na ol man i dai, ol i kamap graun gen. (Eklisiastis 3:19, 20) Yumi ken tok ol i no stap moa.
Ol animal i save mekim sin?
Nogat. Sin i makim olsem tingting, filings, o samting wanpela i mekim i brukim ol lo bilong God. Samting i gat laip i mas skelim wanem ol samting i stret na mekim ol gutpela disisen, tasol ol animal i no inap long mekim olsem. Ol i save mekim tasol ol samting em lo i stap pinis long bodi i stiaim ol long mekim insait long sotpela taim ol i stap laip. (2 Pita 2:12) Long haptaim bilong ol long i stap i laip i pinis, ol i save dai, maski ol i no mekim sin.
Em orait long mekim nogut long ol animal?
Nogat. God i givim wok long ol man long bosim ol animal, tasol em i no givim raits long ol long mekim nogut long ol animal. (Stat 1:28; Buk Song 8:6-8) God i save tingim tru olgeta wan wan animal—maski em ol liklik pisin. (Jona 4:11; Matyu 10:29) Em i tokim ol man i lotuim em long lukautim gut long ol animal.—Kisim Bek 23:12; Lo 25:4; Provep 12:10.