Ol Yangpela i Laik Save . . .

I Gutpela Mi Go Long Kantri i Gat Gutpela Sindaun?

TARA i bin lusim as ples bilong em Trinidat; Sheila i bin lusim Jameka; Erik i bin lusim Surinam. Bilong wanem tripela yangpela hia i go sindaun long narapela kantri i gat gutpela sindaun?

Tara i tok: ‘Ol samting mipela ol yangpela long Trinidat i lukim long ol nius na televisen samting i pulim tingting bilong mipela. Mipela lukim gutpela sindaun bilong ol man long Amerika na sampela kantri moa, na mipela tu i laik kisim.’

Sheila i gat wankain tingting na em i tok: ‘Taim ol i stori long ol narapela kantri, ol i tokim mi i gat planti wok mani na man i no ken baim skul. Tasol ating ol i sem long tokim mi, olgeta samting i no gutpela, i gat hevi tu.’

Tasol ol man i wok yet long go long narapela kantri. Wanpela nius (Los Angeles Times) i tok, kirap long 1980 i go 1990, namba bilong ol man i go sindaun long narapela kantri i go antap olsem dabol. Na ol i ting taim yia 2000 i kamap dispela namba bai dabol gen. Long olgeta yia 700,000 manmeri i go sindaun long Amerika. Na long olgeta yia winim 50,000 manmeri i go long Ostrelia, Kanada, Kot Diwa, Saudi Arebia, na ol i go bilong painim gutpela sindaun.

Sapos kantri bilong yu i stap rabis liklik, ating yu tu i ting yu inap kisim gutpela sindaun sapos yu go long wanpela kantri i gat planti mani, a? Dispela kain tingting i no liklik samting. Olsem wanem yu ken skelim gut?

Tingting Gut Pastaim

Erik i tok, i no gutpela long hariap na lusim as ples. Em i gutpela long kisim gut save long narapela kantri pastaim. Em i tok: ‘Long Surinam planti famili i gat wanblut i stap long ol bikpela kantri, olsem na ol i gat rot long kisim save long sindaun bilong ol na wok bisnis bilong ol dispela kantri i stap olsem wanem.’

Taim yu no pasim tok yet long lusim as ples, tingim tok bilong Sindaun 15:22: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela. Sapos yu no mekim olsem, bai yu hatwok nating.” Olsem na yu mas toktok gut wantaim papamama, na ol elda Kristen, na sampela moa ol i gat gutpela save na ol i tingim yu.

Olgeta Tok i No Stret

Taim yu harim ol gutpela stori long ol narapela kantri, yu mas skelim gut. Baibel i tok: “Ol man i gat liklik save tasol, ol i save bilipim olgeta kain tok. Tasol man i gat gutpela tingting, em i save was gut long ol pasin em i mekim.”​—Sindaun 14:15.

Sheila i bin lusim Jameka na em i tok: ‘Tisa bilong mi i strong long mi mas lusim ples na go long Amerika. Em i tok dispela bai helpim sindaun bilong mi. Na sampela manmeri i tok, sapos mi go long Kanada o Amerika o Inglan mi bai helpim mi yet, maski mi mekim wanem kain wok. Olgeta i ting sapos mi gat rot long go, tasol mi no go, dispela em longlong pasin.’

Taim em i go long Amerika, dispela i bin helpim sindaun bilong em o olsem wanem? Sheila i tok: ‘Long planti samting sindaun bilong mi long nau i winim sindaun bilong mi long Jameka, tasol ol pren bilong mi long Jameka, ol tu i bin stretim sindaun bilong ol. Sampela taim yumi ranawe long sampela hevi, tasol yumi kisim ol nupela hevi. Sampela taim hevi bai stap maski yumi sindaun long narapela kantri.’

Tara i bin lusim Trinidat na go long Amerika na em i wanbel long tok bilong Sheila. Em i tok: ‘Ol man i bin tok ol kantri i gat planti mani i gutpela kantri bilong skul, wok, painim bikpela mani, na kisim gutpela sindaun. Tasol planti i bin lusim as ples ol i go bek. Nau ol i save olgeta kantri i gat hevi.’

Tingim Gutpela Samting na Samting Nogut Bilong En

Bilong skelim gut dispela samting, yu no ken tingim tasol ol gutpela samting yu harim bilong narapela kantri​—tingim ol narapela samting tu. Olsem: Sapos yu go long narapela kantri, bai yu stap olsem wanem long ol samting bilong skin? Na bai yu stap olsem wanem long bihainim stretpela pasin? Na tu, bai yu stap strong long ol samting bilong spirit?

Tru, ating as ples i no gat planti wok bisnis long en, tasol olsem wanem? I no gat tru wok mani? Tara i tok: ‘Long ples bilong mi planti i no gat wok mani. Na ol man i no bin kisim bikpela skul ol i hatwok tru long kisim wok.’ Olsem na Tara i lusim ples, tasol tupela brata bilong em i stap. Tara i tok: ‘Tupela yangpela brata bilong mi i mekim wanpela kos bilong lain long wokim sia na tebol samting. Nau ol i wok long ol faktori. Na planti man i amamas long wok bilong ol, olsem na ol i askim ol long wokim sia na tebol samting bilong ol. Olsem na maski mi stap long wanpela kantri i gat planti mani, ating tupela brata bilong mi i kisim gutpela sindaun, winim mi.’

Sapos yu go long narapela kantri ating bai yu kirap nogut tru long sampela pasin bilong ol man i narapela kain long pasin bilong yu. Ating ol i no bihainim ol stretpela pasin olsem yu save bihainim. Na tu, long ol kantri i gat gutpela sindaun, mani kago i bikpela samting long planti man. Olsem wanem? I stret yu go long narapela kantri? Sapos yu go, bai yu stap olsem wanem long ol samting bilong spirit?

Popaia Bilong Iso

Long taim bilong Baibel Iso i no inap tingim wanem samting i gutpela na wanem samting i nogut. Planti taim samting em i mekim i no helpim em na famili bilong em long ol samting bilong spirit. Olsem na em i mekim sampela samting em i no skelim gut pastaim na ol bikpela hevi i kamap long en.

Baibel i tok, nogut yumi mekim olsem Iso i bin mekim. Em “i givim baksait long God . . . [na] em i laik baim kaikai wanpela taim tasol, na em i tromoi olgeta gutpela samting em inap kisim olsem namba wan pikinini man bilong papa bilong en.” (Hibru 12:16) Dispela gutpela samting namba wan pikinini man inap kisim em i samting holi. God i bin opim rot na lain bilong Iso inap kamap lain tumbuna bilong Jisas, em man God i makim bilong kisim bek olgeta man. (Stat 22:18) Tasol Iso i mekim olsem dispela namba i samting nating​—em i amamas long baim i go na em inap kaikai retpela sup! (Stat 25:​30-34) Pasin bilong i stap pren wantaim God em i bikpela samting tru, olsem na yu no ken larim mani kago o narapela samting i bagarapim dispela pasin pren.​—Mak 12:30.

Bihain Iso i lusim ples na em i go sindaun long narapela kantri na em i maritim tupela meri bilong lain Hit. Nau Iso i gat hevi long ol samting bilong spirit, long wanem, ol i no save lotuim God bilong papamama bilong Iso, em Aisak na Rebeka. Pasin bilong tupela meri i save mekim Aisak na Rebeka i bel hevi tru.​—Stat 26:​34, 35.

Planti ol yangpela i laik go long narapela kantri i gat gutpela sindaun, na long dispela as ol i maritim man o meri bilong narapela kantri. Long India long olgeta yia 4,000 poroman marit i save go long Amerika. Na ol i tok 10,000 i wet yet long go. Tasol marit em wanpela gutpela presen i kam long God, olsem na i no stret yu marit nating bambai yu ken go na sindaun long narapela kantri. Na tu, sapos yu marit long man o meri i no wanbilip, dispela bai mekim na Jehova i bel hevi na famili bilong yu tu, em ol i strongpela Kristen.​—2 Korin 6:14.

Bihainim Tingting Bilong Yu

Sapos yu pasim tok long mekim wanpela samting, i bikpela samting long bihainim stret dispela tok. Maski yu stap long ples o go long narapela kantri, nogut yu gat tupela tingting.

Sapos yu stap: No ken daunim ol narapela i lusim as ples. Em samting bilong ol. (Rom 14:4; Galesia 6:​4, 5) Amamas long ol gutpela samting long kantri bilong yu, olsem ol maunten, diwai, plaua samting, na ating i narapela kain long ol samting bilong narapela kantri. Wok long laikim moa yet ol asples na tingim ol hevi ol i hatwok long karim.

Sapos yu lusim as ples: Yu mas tingim gut wanem ol samting i nambawan bikpela samting long yu taim yu lain long ol nupela pasin na ating nupela tok ples. Nogut yu tromoi bikpela hap taim bilong bungim planti samting bilong skin, em bipo yu no gat wok long en. Sapos yu mekim olsem, ating bihain yu no gat taim bilong tingim ol samting bilong spirit.

Sheila i tok: ‘Long nau wok mani i bikpela samting. Tasol ol famili, na pren, na ol samting bilong spirit i bikpela samting moa. Taim wok mani bilong yumi i pinis, ol famili, na pren, na ol samting bilong spirit i stap yet bilong strongim yumi.’ Na Baibel i givim gutpela tok long yumi olsem: “Ol man i save mekim wok long samting bilong graun, ol i mas i stap olsem dispela wok i no bikpela samting long laip bilong ol. . . . I no longtaim na bai dispela graun wantaim olgeta samting bilong en bai i pinis.” (1 Korin 7:31) Ol man i painim pinis gutpela sindaun, em ol man i save tingim famili na ol samting bilong spirit i olsem namba wan samting, na wok na mani i olsem namba tu.

Tingting gut taim yu wok long painim ol nupela pren. Erik i tok: ‘Poromanim ol pren i bihainim stretpela pasin.’

Tingim Samting Tru

Ol samting bilong kisim trupela amamas i no save senis. Sheila i tok: ‘Maski yumi stap we, pasin Jehova i laik bai yumi mekim i no save senis.’ Em i laik bai yumi mekim wanem? Jisas i tok: “Ol man i save, ol i stap rabis tru long ol samting bilong God, em ol i ken amamas.” “Yupela i no ken tingting planti” long kaikai o klos samting. Tingim “God i stap king bilong yupela, na kisim stretpela pasin bilong em, na bai em i givim dispela olgeta arapela samting tu long yupela.”​—Matyu 5:3; 6:​31, 33.

Sapos yu bihainim ol dispela gutpela tok, maski yu stap we, sindaun bilong yu inap kamap gutpela.

[Ol Piksa long pes 21]

Sampela man i ting long olgeta kantri i gat planti mani, olgeta man i gat gutpela sindaun, tasol i no olsem