Mi Gat Bikpela Laik Long Ol Hos

Liklik kapa bilong pinga bilong lek i kam ausait pastaim, bihain het i kam ausait, em i slip long tupela lek. Sol bilong en i pas, olsem na mi hatwok, tasol ol narapela hap skin i kam ausait wantu tasol. Mi katim rop bilong pikinini hos na nau mama hos i sanap na singaut. Em i amamas long lukim pikinini bilong em.

PLANTI taim mi bin lusim slip bilong helpim wanpela “mama” i laik karim pikinini. Mi no gat tok long dispela samting, long wanem, mi gat bikpela laik long mekim wok bilong kamapim ol nambawan hos.

Taim mi yangpela yet mi gat bikpela laik long ol hos. Mi kirap na lain long raun long hos taim mi gat 6-pela krismas. Mama i karim mi long Ronk, long not Frans. Papamama i bilong lotu Katolik, na taim mi laik go long haiskul ol i salim mi long wanpela skul ol pikinini i save slip long en. Mi pasim tok long lusim skul na mekim wok wantaim ol hos. Taun Santili long hap not bilong Paris i gat nem long kamapim ol nambawan hos. Mi kirap na wok wantaim wanpela man bilong skulim ol hos. Long dispela ples mi lain long bikpela wok ol man i mas mekim long skulim ol hos bilong resis. Bilong wanem em i bikpela wok? Hos bilong resis i mas i gat man bilong lukautim em olgeta taim.

Skulim Ol Hos Bilong Resis

Taim hos i gat 18 mun em gutpela taim bilong kirap skulim em. Ol i mas lain long ol i no ken raun nating ausait na pilai pilai. Nau ol i mas lain long sampela nupela samting. Namba wan samting man bilong skulim hos bai hatwok long en, em long putim hap ain olsem kopstik long maus bilong hos bilong stiaim wokabaut bilong en.

Na em hatwok long pasim let bilong sadel long hos. Sampela taim hos i no amamas long dispela samting na em bai kalap kalap na kikim lek i go! Taim em i lain pinis, nau wanpela man bai sindaun long en. Na planti bilong ol bai pundaun, long wanem, hos i no laik bai man i sindaun long en. Man i skulim hos i mas i gat save na pasin isi, na em i mas tingim gut hos. Sapos em i mekim nogut long hos, hos i no inap kamap gutpela hos bilong resis.

Olgeta moningtaim mipela i bin kisim ol hos i go na lainim ol long narapela narapela kain wokabaut, em pasin bilong skulim hos. Taim man i skulim hos, hos i mas bihainim maus bilong em. Sapos man i laik bai hos i wokabaut o ran isi isi o long wanem kain pasin, hos i mas bihainim tok bilong em. Tasol wan wan taim man bai larim hos i ran long laik bilong em yet.

Klostu long belo mipela save kam bek long haus slip bilong ol hos. Nau mipela mas mekim bikpela wok long rapim skin bilong hos bilong rausim olgeta tuhat long skin bilong en, na tu, mipela mas klinim gut aninit long kapa bilong pinga bilong lek.

Sapos hos i lain hariap em inap insait long resis bilong ol hos i gat tupela krismas. Taim hos i gat 3-pela o 4-pela krismas, em bai pinis long mekim resis. Tasol hos i pulim liklik wilka i gat tupela wil, em bai resis inap long taim em i gat 8-pela krismas.

Samting Mi Laikim Mi Kisim

Mi laik tru long kamapim ol nupela hos, olsem na mi lain long dispela wok long fam Bois-Roussel long Normandi long not-wes Frans. Em gutpela hap bilong kamapim ol nupela hos, long wanem, i gat gutpela gras na san na ren. Mi stap long dispela fam 18 mun na bihain mi kamap nambatu dairekta bilong en. Long dispela taim i no gat narapela fam long Yurop i winim dispela. Em bikpela fam i gat planti handet hekta graun na 300 hos bilong lukautim.

Long dispela fam mi bungim wanpela meri i wok kuskus na mitupela i gat laik long marit. Mi no save dispela samting bai senisim sindaun bilong mi​—dispela meri i save long ol Witnes Bilong Jehova na em i bin kirap na toktok wantaim mi long ol. Tasol mi no givim bel tumas long tok bilong em.

Taim dairekta bilong fam i harim mitupela bai marit, em i askim mitupela long lukautim narapela fam, em na narapela man i save bosim. Olsem na samting mi gat bikpela laik long mekim, nau mi inap mekim. Mi gat 24 krismas tasol na mi bai kamap dairekta bilong wanpela fam i gat nem! I no gat planti dairekta bilong dispela kain fam long Frans. Dispela narapela fam i no bikpela olsem namba wan fam mipela i bin sindaun long en, tasol em tu i stap long Normandi. Em i gat 100 hekta graun na ples i olsem paradais. Na mipela mas lukautim 100 hos​—man meri na pikinini.

Man mi mas kisim ples bilong em i mas stap 6-pela wik moa na bihain em bai lusim fam, olsem na bos bilong fam i bin tokim mipela long raun long Amerika na wet inap long em i lusim fam. Mipela bin go lukim ol bikpela fam long Amerika na lukim pasin bilong ol long kamapim ol nupela hos. Na mipela lukim ol fam em bihain bai mipela salim ol hos meri bilong mipela long en bilong poromanim ol hos man bilong ol.

I Stap Bilong Mipela Long Fam

Mipela givim taim na strong olgeta bilong mipela long wok bilong fam. Tasol mipela i no les, mipela amamas tru long mekim dispela wok. Olgeta taim mipela lukim ol gutpela samting God i bin wokim, na mipela lukautim ol hos i gat gutpela skin. Taim mipela kirap long moningtaim mipela harim ol hos i kaikai gras na long mi dispela i olsem gutpela musik!

Wok long fam i gat ol hap hap wok bilong en olsem: Taim bilong ol hos i poroman wantaim bilong kamapim pikinini; taim bilong pikinini i lusim susu bilong mama; taim bilong baim ol yangpela hos i go long ol man. Ol i save skelim ol nambawan hos man olsem: Papamama bilong en i olsem nambawan hos o em i bin kamap long wanpela lain hos i save gut long winim resis. Nau ol bai makim dispela kain hos bilong i stap wantaim 40 hos meri bilong ol bilong kamapim pikinini. Bilong kisim pikinini long nambawan hos man, papa bilong ol hos meri inap givim 100 tausen kina long papa bilong hos man. Em bikpela mani tru, olsem na ol man bilong lukautim ol hos olsem bai lukautim ol gut taim ol i gat bel na taim ol i karim pikinini.

Sampela taim hevi i kamap na taim hos mama i karim pikinini, em i dai. Taim dispela samting i kamap mipela i hatwok long trikim narapela hos mama long lukautim dispela pikinini olsem pikinini bilong em yet. Inap 48 aua mipela i save banisim hos mama. Long san na long nait sampela yangpela man i wok wantaim ol hos, ol i lukautim em. Ol i bringim liklik pikinini hos i no gat mama klostu long dispela hos bilong dring susu. Ol i mas pasim wanpela lek bilong hos mama na em i no inap kikim pikinini na kilim em. Na ol i mas pasim rop long maus bilong em na em i no inap kaikaim pikinini.

Nau skin bilong hos mama i les na em i orait long pikinini, olsem na mipela i save, wok bilong mipela i no lus nating. Planti taim nupela mama hia i strong tru long lukautim pikinini na mipela ol man i hatwok long go klostu long pikinini. Taim pikinini hos i kamap mipela mas toksave long wanpela lain (French National Registry) bilong rejistaim em.

Mama na Pikinini

Sampela de bihain long hos mama i karim pinis pikinini, mipela kisim ol i go ausait long ol hap graun i gat gras. Wankain long planti ol narapela liklik pikinini animal, pikinini hos bai kalap kalap na kikim lek i go i kam na pilai klostu long mama bilong em. Mipela save amamas long lukim ol i mekim olsem. Ol i amamas long stap insait long wara na ol bai paitim paitim wara long lek bilong ol.

Ol hos i no laik i stap wanpis. Tasol ol hos man bilong kamapim pikinini, na ol yangpela hos man bilong resis i mas i stap wanpis. Tasol sapos hos i no amamas long stap wanpis, mipela i mas painim narapela animal bilong i stap wantaim em. Wanpela taim mipela i mas putim wanpela sipsip wantaim wanpela hos man. Tupela i amamas long stap wantaim na sipsip i no laik tru lusim dispela hos. Wanpela nambawan hos bilong resis (Allez France) i gat poroman sipsip na taim em i resis dispela sipsip i go wantaim em, tasol sipsip i no insait long resis!

Long mun Ogas ol pikinini mas lusim susu bilong mama. Sori tru, long dispela taim mama i no ken lukim moa pikinini bilong em. Pikinini bai singaut long mama inap sampela de, tasol bihain em i no tingim moa mama. Pikinini hos i gat wanpela krismas, ol i kolim em yialing. Long maket bilong baim ol hos, papa bilong wanpela yialing inap kisim wan milion kina samting.

Sampela hos mipela i bin kamapim long fam i bin kamap nambawan hos bilong resis. Wanpela i gat nem High Echelon. Long 1979 em i kamap nambawan hos bilong graun long winim wanpela resis ol i kolim Prix d’Amérique. Na sampela hos moa bilong mipela i winim sampela bikpela resis.

Mipela Harim Tok i Tru

Mipela i stap sampela mun long nupela fam na ol Witnes i no kam, olsem na meri bilong mi i tokim mi long salim pas i go long wanpela kongrigesen klostu na askim ol long salim wanpela i kam lukim mipela. Sampela de bihain tupela marit i kam. Mi yet mi ting Baibel i no tok profet long taim yumi stap long en. Na taim meri bilong mi i tok Kingdom bilong God i kirap long 1914, mi ting dispela em tok bilong ol Witnes tasol. Mi no bin lukim dispela yia long Baibel.

Mipela i bin toktok longpela taim liklik wantaim tupela marit. Ol tok tupela i kamapim long buk Daniel i kirapim mi long stadim Baibel wantaim tupela. Tasol mi gat planti wok, olsem na i hatwok long painim taim bilong stadi.

Tupela marit i mas i kam 25 kilomita bilong lukim mipela na sampela taim ol i kam na mi no inap stadi, long wanem, mi mas lukautim hos i sik o hos i laik karim pikinini. Tasol bihain mi pilim tru stretpela pasin bilong God na Kingdom bilong em na dispela i mas kamap olsem namba wan samting long sindaun bilong mi. Olsem na mi stretim sampela samting na bai ‘taim i no ken lus nating,’ na mi inap stadi.​—Efesus 5:16; Matyu 6:33.

Tingim Rot Mi Bai Bihainim

I no longtaim na mipela i kirap na go long ol miting, na 6-pela mun bihain long 1975 mi bin go long kibung distrik long Anesi long hap saut-is long Frans. Long kibung mi lain olsem wok mani bilong mi i no stret long tok bilong Baibel. Mi kisim save long tok bilong Aisaia 65:11 olsem pasin bilong mekim sampela samting ‘i save mekim yumi i win’ em God i no orait long en. Mipela i save kamapim ol hos bilong resis tasol, na i olsem mipela i helpim wok bilong betim hos. Bel bilong mipela i gat tok, olsem na mipela i no baptais.

Nau mi mas pasim tok long bel​—bai mi stap long dispela wok mani mi save laikim tru o bai mi dediketim laip bilong mi long Jehova? Nau laik bilong God i bikpela samting long mi. Mi stori long dispela samting wantaim tupela bos bilong fam na tokim ol mi bai lusim fam. Ol i tok mi mas i stap wanpela yia moa na wetim narapela man i kam bilong lukautim dispela fam. Tasol bihain, long Septemba 1976 long wanpela kibung sekit mitupela meri bilong mi i baptais.

Planti man bilong mekim wok long kamapim ol nambawan hos ol i harim samting mi bai mekim. Mi tingim taim wanpela dokta bilong katim ol man i kam long fam. Em i tok em i save bilong wanem mi laik lusim dispela wok mani, long wanem, sampela samting long dispela wok i no stret long lo bilong God. Em i lukluk nabaut na em i kirap nogut tru long ol gutpela gutpela samting bilong dispela fam ol i bin baim long bikpela mani​—ol haus bilong hos, na ol kain kain plaua i gat kala kala, na ol waitpela klinpela banis i go planti kilomita. Em i tokim mi, em i no inap tru long kirapim ol man long givim sampela mani bilong helpim na mekim gut haus sik bilong em.

Mi no bel hevi long lusim dispela wok mani bilong mi. Mitupela meri bilong mi i bin lusim Frans long 1992 na go long narapela ples ol man i save long tok Frans. Em wanpela hap i no gat planti Witnes long en. Long dispela hap mi amamas long mekim wok elda long wanpela kongrigesen bilong ol Witnes Bilong Jehova. Mitupela meri bilong mi i gat wankain tingting olsem bilong aposel Pol taim em i tok: “Mi save long Krais Jisas, em i Bikpela bilong mi, na mi lukim dispela save tasol em i samting tru, na olgeta gutpela samting bilong dispela graun ol i olsem pipia nating. Mi laik bihainim Krais tasol, na mi lusim pinis olgeta arapela samting, bai mi ken holimpas Krais.”​—Filipai 3:8.

Mitupela meri i laikim yet olgeta samting God i wokim, na mipela i gat bikpela laik yet long ol hos. Na mipela i amamas long wetim taim bihain, taim ol man na ol animal i pren wantaim na man i no ting ol animal i samting bilong mekim wok bisnis long en bilong kisim mani.​—Em stori bilong Stephane Jesuspret.