Marit Bilong Yumi—Kamapim Amamas Long En

Wanem samting i ken mekim marit i wok gut?

Tok bilong husat i ken helpim ol marit long stap amamas?

I gat rot bilong stretim ol hevi long toktok gut wantaim?

YASUHIRO na gelpren bilong em Kayoko i bin kaunim sampela buk i stori long ol meri i no laik kalabus moa long pasin bilong ples, olsem na tupela i sindaun wantaim olsem tupela marit. Tupela i ting, sapos ol i laik bruk, i no gat samting i ken pasim ol, long wanem, tupela i no marit tru. Bihain Kayoko i kisim bel, olsem na tupela i stretim marit long gavman. Tasol Yasuhiro i no amamas tumas. Tupela i kisim hevi long mani, na tingting na pasin bilong tupela i no wankain olgeta, olsem na tupela i katim marit.

Bihain Yasuhiro na Kayoko i kirap na stadim Baibel wantaim ol Witnes Bilong Jehova. Narapela i no save narapela i mekim olsem. Bihain liklik tupela i save. Nau narapela i lukim pasin bilong narapela i wok long senis taim ol i bihainim ol lo bilong Baibel. Orait, tupela i marit gen. Nau tupela i gat tingting bilong God long marit, olsem na bilong stretim ol hevi, narapela i amamas long lusim sampela laik bilong em yet na narapela i ken stap amamas.

Wanem samting i bin helpim marit bilong tupela taim ol i marit namba 2 taim? Tupela i daun long As bilong marit, em God. (Stat 2:​18-24) Ol tok bilong Jehova long stiaim yumi em rot bilong stap amamas long marit.

Samting Bilong Helpim Marit

Taim tupela marit i bihainim tok bilong Jisas, tupela inap stretim ol hevi na marit i no ken bruk. Jisas i tok: “ ‘Yupela i mas laikim [God] tru long bel . . . na . . . spirit . . . na tingting bilong yupela.’ Dispela lo . . . i namba wan tru. Na namba 2 lo em i wankain olsem dispela. Em i olsem, ‘Yu mas laikim ol wantok olsem yu laikim yu yet.’ ” (Matyu 22:​37-39) Em nau​—sapos tupela marit i laikim tru Jehova, tupela bai stap amamas. Poroman marit o em yet i mas stap namba 2. Sapos Jehova i stap insait long marit bilong tupela dispela i wankain long baklain i gat tripela rop. Baibel i tok piksa long en olsem: “Sapos ol i tanim tripela string [olsem rop] na wokim baklain, orait dispela baklain i no inap bruk kwiktaim.”​—Saveman 4:12.

Sapos tupela marit i laikim tru Jehova, ol lo bilong em i mas stap olsem namba wan samting long sindaun bilong ol. Taim tupela i mekim olsem, tupela i pasim narapela rop long baklain na baklain i strong moa​—namba 3 rop em i makim pasin bilong tupela long laikim tru Jehova. Na Baibel i tok, “ol lo bilong [Jehova] i no givim hevi long yumi.”​—1 Jon 5:3.

Dispela kain tingting inap helpim tupela long save, marit i no bilong sotpela taim, em bilong oltaim oltaim. (Malakai 2:16) Na taim Jehova i stap long marit bilong tupela, tupela bai wok strong long stretim ol hevi i save kamap; tupela i no ken katim marit.

Laikim Tru Poroman Marit

Sapos tupela marit i laik pas gut oltaim, narapela i mas givim bel long narapela, em i no ken tingim skin bilong em yet tasol. Baibel i strongim dispela tok olsem: “Yupela olgeta i mas holim wanpela tingting tasol, na bihainim wanpela pasin bilong laikim tru ol arapela. . . . No ken tingting long yupela yet tasol, na wok long kamapim biknem bilong yupela. Nogat. Yupela i mas daunim yupela yet na yupela i mas ting pasin bilong ol arapela i winim pasin bilong yupela. Yupela i no ken lukautim ol samting bilong yupela tasol. Nogat. Yupela wan wan i mas lukautim ol samting bilong ol arapela . . . na helpim ol long i stap gut.”​—Filipai 2:​2-4.

Tru tumas, long nau olgeta man i save tingim samting bilong ol yet tasol, olsem na ating i hatwok long daunim yu yet na tingim pasin bilong poroman i winim pasin bilong yu. Na bai yu hatwok moa sapos poroman i no kamapim bel bilong em olsem em i laikim yu. Tasol sapos yu daunim yu yet na ting pasin bilong poroman i winim pasin bilong yu, yu no ken hatwok tumas long tingim ol samting poroman bilong yu i laikim. Baibel i tok yumi mas holim wankain tingting olsem Krais Jisas i bin holim. Maski em i wanpela bikpela ensel, taim em i kamap man em i bin “kamap olsem wokboi nating.” Na “em i daunim em yet na i bihainim tok bilong God, i go inap long em i dai,” na indai bilong em i helpim olgeta man, maski ol i amamas long em o nogat. (Filipai 2:​5-8) Gutpela pasin bilong Jisas i mekim na planti birua i tanim bel. Na ol disaipel bilong Jisas i bihainim wankain pasin, olsem na planti birua i tanim bel. (Aposel 6:7; 9:​1, 2, 17, 18) Wankain samting inap kamap long yu. Yu mas tingim poroman marit i winim yu, na sapos yu lukautim ol samting bilong em, ating bihain em bai laikim yu tru.

Tasol taim meri marit i tingim pasin bilong poroman i winim pasin bilong em, i no olsem em i mas larim man i mekim nogut long em. Ol meri long hap bilong Is i bin ting olsem. Man na meri wantaim i mas ting, pasin bilong poroman i winim pasin bilong em yet, na tupela i mas redi long lusim sampela laik bilong ol yet na bai narapela i ken tingim narapela. Taim hevi i kamap, long pasin daun tupela i mas toktok gut wantaim, na narapela i mas tingim narapela, na bihainim ol lo bilong Baibel. Dispela em rot bilong stretim ol hevi. Nau yumi ken tingim sampela tok bilong Baibel bilong helpim yumi.

No Ken Bagarapim Marit

Jehova yet i as bilong marit, na em i save wanem ol pasin narapela marit i mas mekim long narapela. Taim ol i bin askim Jisas, i stret long man i ken rausim meri long laik bilong em yet, Jisas i tok: “Samting God i pasim pinis, em man i no ken katim.” Na em i mekim olsem i gat wanpela as tasol na ol i ken katim marit na maritim nupela poroman. Em i tok: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.”​—Matyu 19:​3-9.

Pasin bilong ol marit long prenim narapela poroman i no stret. Sindaun bilong olgeta i bagarap. Wanpela man marit long Japan i bin prenim planti meri. Maski em i haitim pasin bilong em, meri bilong em i save liklik long en na em i bel hevi. Klostu marit bilong tupela i bruk. Wanpela gelpren bilong man i tok, em bai tokaut long meri tru bilong man na nau man i mas maritim em. Bihain man i tok: ‘I no gat wanpela insait long dispela kain pasin i ken kisim amamas.’ Em i bin lusim dispela pasin, tasol olgeta meri i bin kisim bikpela hevi. Baibel i tok: “Yupela ol marit i mas lukautim gut marit bilong yupela, bai em i stap klin tru long ai bilong God. . . . God bai i bekim pe nogut long ol manmeri i mekim ol kain kain pasin pamuk.” (Hibru 13:4) Taim man i bihainim dispela lo, em i no kisim ol sik bilong pamuk, o bel hevi long em i bin haitim rong, na marit i no ken bagarap.

Man Marit, Laikim Tru Meri

Baibel i makim man i stap bos bilong famili, olsem: “Yupela meri, yupela i mas aninit long ol man bilong yupela, olsem yupela i save aninit long Bikpela. Long wanem, man em i het bilong meri bilong en, olsem Krais em i het bilong sios.” (Efesus 5:​22, 23) Tru i hatwok long bihainim dispela tok. Wanpela meri marit, em Shoko, em i save kalapim wok bos bilong man bilong em. Em i tok: ‘Mi bin hatwok tru long daun long man bilong mi.’ Shoko i ting taim man i gat klostu 30 krismas em i mas baim wanpela haus, olsem na em yet i painim haus em i laikim na em i subim man long baim. Tasol taim em i save long ol lo bilong Baibel long dispela kain pasin, em i kisim narapela kain tingting long wok bos bilong man bilong em. Em i bin ting man i no mekim gut wok bos, tasol taim em i skelim gut dispela samting, em i save, em i man bilong tingting gut, na man i gat pasin daun.

Dispela lo i save helpim olgeta man marit long save, man tu i gat bos, em Krais Jisas. (1 Korin 11:3) Krais em i bos bilong man, olsem na man i mas laikim meri bilong em na sori long em olsem Jisas i sori long ol disaipel bilong em. (Efesus 5:​28-30) Olsem na man Kristen bai tingim laik bilong meri, na larim em i kamapim tingting bilong em taim man i laik pasim tok long wanpela samting.

Oltaim Mekim Gutpela Tok

Hisako tupela man bilong em i no inap toktok gut wantaim. Taim Hisako i laik toktok wantaim em long wanpela samting, em i save tok: ‘Samting yu laik mekim, mekim tasol.’ Hisako i tok: ‘Ating mi no bin tingim gut man bilong mi, olsem na dispela hevi i stap. Mi meri bilong toktok i go i go​—mi no malolo liklik, olsem na ating dispela i mekim na man i no laik harim tok bilong mi.’ Nau tupela i save amamas long toktok wantaim. Wanem samting i senisim pasin bilong Hisako na man bilong em? Hisako i bin kirap na bihainim tok bilong Kolosi 4:6: “Oltaim yupela i mas mekim gutpela tok tasol, em olkain tok ol man i save laik long harim. Yupela i mas tingting gut na traim long bekim gut tok bilong olgeta man.” Yumi ken tingim sol. Taim yu kukim kaikai wantaim sol, kaikai i swit moa. Orait, narapela bai amamas long harim tok bilong yu sapos tok bilong yu i naispela na switpela na yu mekim long pasin isi. (Sindaun 15:1) Tru tumas, sapos yu tingim pasin bilong yu long toktok, ating i no gat planti kros i kamap insait long marit bilong yu.

Tru tumas, marit bilong yu bai stap gut sapos yu givim bel long Jehova na bihainim ol lo bilong em. Sapos yu laikim tru Jehova, dispela bai kirapim yu long pas gut wantaim poroman, na bai yu wok strong long lukautim marit bilong yu. Na maski yu ting i gat ol bikpela hevi insait long marit, God i bin putim ol gutpela tok long Baibel bilong helpim yu long stretim ol hevi bilong marit. Em nau, yumi ken save planti taim pasin bilong katim marit i no rot bilong i stap amamas​—bihainim ol lo bilong Baibel, em rot bilong i stap amamas. Olsem na yu mas wok long givim bel moa yet long Jehova, na kisim save long ol gutpela tok bilong em long Baibel long ol samting bilong marit.

[Blok long pes 9]

Sapos Yu Inap Katim Marit

BAIBEL i kolim wanpela as bilong katim marit, em pamuk. Sapos man o meri marit i pamuk, orait poroman bilong em inap katim marit sapos em i laik na marit gen. Em laik bilong poroman i no gat rong.​—Matyu 19:9.

Dispela samting i bin painim Yasuko. Man bilong em i prenim narapela meri na sindaun wantaim em. Tambu mama bilong Yasuko i tok: ‘Em asua bilong yu yet na pikinini man bilong mi i mekim dispela pasin.’ Yasuko i bin krai i go i go, em i no lusim. Planti ol i givim tok long em bilong helpim em, tasol i no gat wanpela i tok, man i mekim rong. Mama bilong Yasuko i bin kirap na stadi long Baibel na em i tokim Yasuko olsem: ‘Baibel i tok klia, pasin pamuk i no stret.’ (1 Korin 6:9) Yasuko i amamas long harim olsem i gat lo bilong makim wanem samting i stret na wanem samting i no stret.

Nau Yasuko inap mekim tupela samting​—katim marit o nogat. Em i bin tingting long katim marit, tasol taim em i kirap na stadim Baibel wantaim ol Witnes Bilong Jehova, em i save sampela samting em yet i mekim i no stret. Olsem na Yasuko i mekim traim long bihainim ol lo bilong Baibel​—dispela inap stretim ol hevi insait long marit bilong em o nogat. (Efesus 5:​21-23) Em i tok: ‘Mi bin hatwok. Sampela taim mi bihainim lo bilong Baibel na sampela taim nogat. Planti taim mi krai na beten long Jehova.’ Tasol isi isi pasin bilong Yasuko i senis, na isi isi pasin bilong man bilong em tu i senis. Inap 5-pela yia bihain, man bilong Yasuko i lusim dispela meri em i bin prenim. Yasuko i tok: ‘Mi save, pasin bilong bihainim Tok bilong God i helpim tru yumi.’

[Blok long pes 11]

I No Wanbel Long Maritpasin na Ol i Katim Marit

PLANTI marit i tok ol i no wanbel long ol samting bilong maritpasin, olsem na ol i katim marit. Wanpela buk (Sexuality and Family) i tok: ‘Marit long wanpela poroman tasol na ol tingting nogut long maritpasin em ol buk na piksa i kamapim, ol i no inap poroman wantaim. Ol i kirapim bel bilong ol manmeri, na ol i kisim tingting kranki long maritpasin. Ol piksa nogut bilong pasin sem long video na komik-buk long ol samting bilong maritpasin, na skin bilong meri, i save paulim tingting na bel bilong ol manmeri. Olsem na man marit i no ken sori long meri bilong em taim em i slip wantaim em​—em bai subim em long mekim maritpasin, na sapos oltaim meri i sakim man bilong em, dispela bai pinisim strong bilong man long mekim maritpasin.’

Ol buk na video na television nogut i paulim ol samting bilong maritpasin. Ol i no lainim man na meri long ol gutpela samting bilong marit. Na bilong tupela marit i ken stap gut, narapela i mas bilip long narapela, tasol ol dispela buk samting i save bagarapim dispela bilip. Wanpela nius (Psychology Today) i tok: ‘Taim wanpela marit i bilip long poroman, em inap kamapim olgeta tingting long bel na ol samting em i tingting planti long en, na em bai save poroman bai harim em na tingim gut em. Taim man na meri i marit planti yia, ating bikpela laik long maritpasin i no strong moa, tasol pasin bilong bilip long poroman em bai stap strong.’

Yumi no ken ting maritpasin i nambawan bikpela samting bilong helpim ol marit long i stap amamas. Wanpela meri i bin karim planti hevi long marit, em i tok: ‘Samting i bin strongim bel bilong mi, em ol tok long buk Rot Bilong Kamapim Amamas Insait Long Famili. Buk i tok: “Sapos man na meri i pas gut wantaim na tupela i save toktok gut wantaim na narapela i sori tru long narapela, bai tupela i no gat hevi long ol samting bilong maritpasin.” ’a

I no maritpasin i save strongim marit​—pasin sori i save strongim. Sapos narapela i no laikim tru narapela, maritpasin i no inap strongim marit bilong tupela. Tasol sapos narapela i laikim tru narapela, maski tupela i no mekim maritpasin, marit bilong tupela bai stap strong. Sapos tupela i no putim maritpasin i stap olsem nambawan samting long marit, orait maski tupela i no wanbel long ol samting bilong maritpasin, tupela inap stap amamas.

[Ol Futnot]

[Piksa long pes 10]

Tupela marit inap toktok gut wantaim sapos tupela i bihainim ol lo bilong Baibel