Baibel i Tok Wanem?

I Stret Maus Bilong Bel i Stiaim Tingting Bilong Yu?

TAIM yu wokabaut long rot, yu lukim mani bilong wanpela meri i pundaun. Taim yu kisim dispela mani yu lukim meri i kalap long ka. Bai yu mekim wanem? Bai yu singaut long em o hariap long subim mani i go long poket bilong yu?

Em samting bilong maus bilong bel bilong yu. Bel bai tokim yu long mekim wanem? Na samting bel i tokim yu long mekim, yu inap bilipim? Maus bilong bel inap stiaim gut tingting bilong yu?

Em Wanem Samting

Ol man i tok, maus bilong bel i olsem man i save long wanem samting i stret na wanem samting i no stret. Rom 2:​14, 15 i helpim yumi long save long wok bilong en, olsem: “Ol arapela lain ol i no gat lo, tasol long tingting bilong ol yet sampela bilong ol i save bihainim pasin bilong lo. Ol i no gat lo, tasol sapos ol i bihainim pasin bilong lo, orait tingting bilong ol yet i stap olsem lo bilong ol. Long dispela pasin bilong ol, tok bilong lo God i bin raitim long bel bilong ol em i kamap ples klia. Na tingting i stap insait tru long bel bilong ol, dispela tu i soim olsem lo i stap long bel bilong ol. Olsem na . . . tingting bilong ol dispela man bai i kotim ol long pasin ol i bin mekim. Na sampela taim ating em bai i orait long pasin ol i bin mekim.” Olsem na maus bilong bel i bilong helpim yumi long save wanem pasin i stret na wanem pasin i no stret, na nau yumi ken mekim samting i stret. Bel inap skelim samting yumi mekim. Tasol yumi inap bilipim tok bilong bel?

Maus bilong bel inap giamanim yumi na kirapim yumi long mekim pasin nogut. Sapos bel i larim yumi i mekim pasin i no stret, yumi no ken ting God i orait long samting yumi mekim. Olsem: Taim Sol i no kamap Kristen yet, em i bin mekim nogut tru long ol Kristen. Na taim ol man i kilim i dai Stiven, Sol i no ting dispela pasin i gat rong. Bel bilong Sol i no gat tok.​—Aposel 7:​58, 59; Galesia 1:​13, 14; 1 Timoti 1:​12-16.

Long taim bilong Namba 2 Pait, planti soldia bilong Hitler long Jemani i bin givim bikpela pen na kilim i dai planti milion man long ol banis kalabus nogut bilong Hitler. Ol soldia i tok, ol i bihainim tok bilong Hitler na mekim olsem. Bel bilong ol i no gat tok. Tasol olgeta man i no orait long samting ol i bin mekim, na God tu i no orait long dispela samting. Em i stret God i gat tok long samting ol i bin mekim.

Sampela Taim Em i No Wok Gut

God i bin wokim maus bilong bel, olsem na bilong wanem sampela taim em i no pilim wanem samting i stret na i no stret? Baibel i tok, Adam i bin mekim sin, olsem na olgeta man i kisim sin. “Sin i bosim” bodi bilong yumi na pulim yumi long bihainim laik nogut bilong bodi. (Rom 5:12; 6:12) Olsem na stretpela maus bilong bel God i bin putim long namba wan man na meri i wok long bagarap na em i mas pait wantaim sin. (Rom 7:​18-20) Rom 7:​21-23 i sutim stret yumi: “Taim mi laik mekim gutpela pasin, pasin nogut i save pasim rot bilong mi. . . . Mi lukim narapela lo i stap insait long ol hap bodi bilong mi. Na dispela narapela lo i save pait long lo bilong God i stap long tingting bilong mi. Dispela narapela lo, em i lo bilong sin, na em i wok long kalabusim mi na bosim ol hap bodi bilong mi.”

Tasol i no pasin kranki yumi bin kisim long Adam tasol i mekim na bel bilong yumi i no gat tok​—sampela samting moa i mekim na maus bilong bel i no kotim yumi. Yumi ken tingim ol dispela soldia bilong Hitler. Ating ol wanlain i paulim tingting bilong ol na bel bilong ol i no gat tok long ol. (Sindaun 29:25) Na i wankain tu sapos yumi kaunim ol buk o lukim ol piksa wokabaut o televisen i kamapim pasin pamuk o pait samting​—dispela tu inap paulim tingting bilong yumi. Na sapos olgeta taim yumi lukim ol dispela samting, ating bihain yumi ting ol i no nogut, na bel bilong yumi i no gat tok moa long samting nogut. Olsem Baibel i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.”​—1 Korin 15:33.

Sapos man i lain pinis long ol lo bilong God na em i daun long en, maus bilong bel inap stiaim em long mekim ol samting i stret. Tasol bel i no inap mekim olsem sapos em i no skulim bel. Tasol maski man i gat save na em i amamas long bihainim ol lo bilong God, ating sampela taim bel inap giamanim em. I olsem, long wanem, em i gat sin na em i no gutpela olgeta na ating ol samting bilong graun tu i mekim, na maus bilong bel i no stiaim gut tingting bilong em.

Yumi Ken Mekim Wanem?

Olsem wanem? Yumi ken skulim bel long pilim tru wanem samting i stret na i no stret? Yumi inap. Pol i tokim ol Kristen long “lain gut long pasin bilong skelim wanem ol pasin i gutpela na wanem ol pasin i nogut.” (Hibru 5:​11-14) Yumi ken lain gut taim yumi stadi long Baibel, na tingim gutpela pasin bilong Krais Jisas. Jisas i soim yumi pinis pasin yumi mas bihainim. (1 Pita 2:​21, 22) Bihain, taim yumi laik mekim wanpela samting na yumi mekim wok long save na gutpela tingting, maus bilong bel bai bosim yumi, na isi isi em bai stiaim yumi bilong abrusim ol tingting na pasin i no stret. Bel bai kirapim yumi long bihainim pasin i stret.

Tasol nogut yumi hambak na tok, sapos “bel i no gat tok” mi ken mekim. Yumi olgeta i gat pasin kranki, olsem na taim yumi tingim wok tru bilong maus bilong bel yumi ken tingim man i save draivim gut ka. Taim ka i ran long bikrot i gat tupela hap rot long en na em i laik lusim wanpela hap rot na go long narapela, em bai lukim glas bilong ka pastaim. Sapos em i lukim wanpela ka baksait, em i save i no gutpela sapos em i go long narapela hap rot. Na gutpela draiva i save, em i no inap lukim olgeta samting long glas, olsem na em i mas tanim het liklik na lukim gut rot. Sapos i no gat ka, orait, nau em inap ran long narapela hap rot. Em wankain long maus bilong bel. Sapos bel i gat tok​—harim gut! Tasol sapos yu mekim wanpela samting na bel i no gat tok, bihainim pasin bilong gutpela draiva bilong ka​—skelim gut​—samting yu laik mekim bai bagarapim yu o nogat.

Skelim tingting bilong yu​—em i wankain long tingting bilong God o nogat. Bilong skelim bel, mekim wok long Baibel. Sindaun 3:​5, 6 i tok: “Bilip strong long Bikpela. Yu no ken ting save bilong yu yet inap helpim yu. Long olgeta samting yu mekim, yu mas tingting strong long Bikpela na yu mekim, na em bai i soim yu stretpela rot long bihainim.”

Sapos yumi harim maus bilong bel, dispela em savepasin. Tasol i gutpela moa sapos yumi skelim laik bilong God long Baibel taim yumi laik mekim wanpela samting bambai yumi inap tok: “Mipela i pilim olsem bel bilong mipela i stap stret long ai bilong God.”​—Hibru 13:18; 2 Korin 1:12.

[Piksa long pes 26]

“Pol i baut”

[Kredit Lain]

Painting by Caravaggio: Scala/Art Resource, N.Y.