Misin Angliken Long Ostrelia—Ol i No Wanbel
WANPELA MAN LONG OSTRELIA I RAITIM DISPELA STORI BILONG KIRAP!
TOK resis long makim ol meri long kamap pris long Misin Angliken i no nupela samting, tasol nau long Ostrelia em i kamap olsem wanpela bikpela tok.
Long Janueri 1992, bisop bilong Kanbera na Golben i bin tokaut olsem, Misin Angliken bai makim sampela meri i save mekim wok dikon long kamap pris. Em i no laik wetim kibung bilong lotu em bai kamap bihain. Na bipo long 3-pela kibung bilong lotu ol i bin tok pinis, ol i no orait long makim ol meri long kamap pris.
Maski misin i laik pasim, long Mas 1992, ol i makim 10-pela meri long kamap pris bilong lotu Angliken long Pet, Ostrelia. Olsem na planti i tingting long kibung bilong lotu em bai kamap bihain. Ol i bung long Julai, tasol ol i no pasim tok long dispela samting, olsem na ol i makim narapela taim—Novemba 21, 1992.
Wanpela wik paslain long Novemba 21, Bikpela Kibung Bilong Sios Bilong Inglan i vot na ol i orait long ol meri i kamap pris. Planti i ting kibung bilong lotu long Ostrelia bai bihainim tingting bilong ol long Inglan. Taim kibung bilong lotu i kamap long Ostrelia wanpela nius i tok: ‘Sampela taim bel bilong ol i no stap isi taim ol i tok resis na tok pait.’ Paslain long presiden bilong dispela kibung i tokaut long tingting bilong ol, em i tokim ol manmeri long harim tasol, no ken singaut na pairap. Tasol taim ol manmeri i harim olsem kibung i orait long ol meri i kamap pris, sampela i hatwok long pasim bel bilong ol. Na taim bikpela lain manmeri ausait i harim, ol i ure na sutim ol longpela pepa i gat kala kala i go antap long skai.
Tasol i no olgeta i amamas. Wanpela nius (The Sydney Morning Herald) i kamapim tok bilong asbisop bilong Sidni. Em i tok: ‘Mipela i no inap i stap amamas na wanbel . . . Bai yumi gat tupela kain lotu insait long Misin Angliken.’ Na narapela pris i tok, pasin bilong larim ol meri long kamap pris i makim olsem ‘Misin Angliken long Ostrelia i wok long bruk.’
Taim yumi skelim tok bilong Baibel, yumi save tingting bilong tupela pris i gat as. Krais Jisas i bin tok: “Sapos ol man bilong wanpela kantri i bruk tupela lain na ol i pait, orait dispela kantri bai i bagarap. Na sapos ol man bilong wanpela taun o wanpela haus ol i bruk tupela lain na ol i pait, dispela taun o haus bai i no inap i stap strong.”—Matyu 12:25.
Misin i tok pait long dispela samting, tasol ol i no tingim wanpela askim: Baibel i tok wanem long wok bilong meri long kongrigesen? Long ai bilong God Jehova olgeta man na meri i dediket long em ol i wankain, tasol long kongrigesen, man na meri i gat kain kain wok. (Galesia 3:28) Na 1 Korin 11:3 i tok: “Het bilong olgeta man em Krais, na het bilong meri em man bilong en, na het bilong Krais em God.” Na spirit holi i makim Pol long tok: “Ol meri i mas daunim ol yet na pasim maus na kisim tok bilong God.”—1 Timoti 2:11, 12.
Ol meri Kristen i no ken bel hevi long tok bilong Baibel, long wanem, i no gat wanpela samting i pasim ol long autim tok long haus bilong ol man olsem Lois na Yunis na Yuodia na Sintike i bin mekim long taim bilong ol aposel.—Filipai 4:2, 3; 2 Timoti 1:5.