Baibel i Tok Wanem?

Mas i Gat Nupela Tok Ol Man i Ken Harim?

Wanpela man long Itali i raitim dispela stori bilong Kirap!

BIKPELA senis bilong ol gavman i bin kamap long Isten Yurop, na dispela i opim rot long ol lotu i ken mekim sampela samting bilong kirapim strong wok lotu bilong ol. Olsem na kirap long Novemba 28 i go inap Disemba 14, 1991, wanpela lain bisop bilong lotu Katolik i bung long Vatiken na ol i toktok long makim wanpela nupela tok ol i ken givim long ol man na bai ol i ken tanim bel na kam insait long lotu bilong ol.

Long Epril 22, 1990, long Velerat long Sekoslovakia, ol i bin tokaut long dispela bung bai kamap. Tasol ating bung i no bin kamapim gutpela samting, long wanem, redio long Itali long Disemba 14, 1991, i tok, ‘Dispela lain i no bin kamapim gutpela samting long bipo.’

Olsem wanem na ol i no bin kamapim gutpela wok? Na olsem wanem long ol Yurop na ol narapela man? Ol i mas i gat nupela tok bilong helpim ol long ol samting bilong lotu, o nogat?

Em “Nupela” Olsem Wanem?

Lotu Katolik i ting ol i mas kamapim nupela tok, long wanem, nau long dispela taim ol samting i wok long senis. Kadinal Kamilo Ruini i kirapim miting bilong ol, na em i tok, long Isten Yurop i gat planti man ol i no bin baptais na ol i no bihainim ol bikpela lo bilong lotu Kristen. Na em i tok, nau gavman komyunis i pundaun, na rot i op na bai lotu Katolik i ken go insait na givim tok bilong lotu long ol man na kirapim ol long tingim gen ol samting bilong lotu. Na em i tok, long hap bilong wes ol man i stap olsem haiden na ol i no ting tok bilong lotu Katolik i trupela tok bilong God.

Ol narapela lotu i kamap planti long hap bilong Yurop na Sentral na Saut Amerika, na ol bisop Katolik i tingting planti long dispela samting. Bilong wanem ol i hevi long dispela samting? Ol i hevi, long wanem, bipo misin Katolik i bin stap nambawan, tasol long nau ol i no gat biknem moa olsem long bipo, na ol i no inap mekim ol samting olsem bipo ol i bin mekim, na long nau ol dispela narapela lotu i laik winim lotu Katolik. Wanpela nius bilong ol Katolik (La Civiltà Cattolica) i tok, ol Witnes Bilong Jehova i kamap strong na ol i laik winim lotu Katolik na ol i kisim planti manmeri bilong lain Katolik na lain Talatala.

Na long laspela tok long kibung bilong ol dispela bisop ol i tok, ol i laik kamapim nupela wok bilong autim tok na bai ol man i ken tanim bel na kamap Kristen gen. Tasol bilong wanem ol waitskin i mas kamap Kristen gen? Ol bisop i tok ol i mas mekim olsem, long wanem, long nau ol i no bihainim moa pasin Kristen. Ol i ting ol lo bilong lotu Kristen i no bilong ol man bilong nau. Dispela nius (La Civiltà Cattolica) i tok, long nau ol waitskin i no bilip tumas long tok bilong ol misin; ol i ting tok bilong ol i olsem stori nating bilong ol pikinini, na ol i no bihainim moa; na sampela i ting tok bilong lotu em stori nating bilong ol tumbuna, na bihain ol dispela stori bai dai; na sampela i tok, lotu Kristen em i samting bilong paulim ol man na em inap long nogutim ol.

I gat ol dispela hevi bilong ol bisop, olsem na ol i ting ol i mas kamapim nupela wok bilong autim tok bambai ol i ken kisim bek ol man.

Bilong Wanem Dispela Wok Bilong Ol i Lus?

Ol i ting ol i mas i gat planti pris moa bilong givim tok long ol man na kisim bek ol, tasol long Yurop ol i sot tru long ol pris. Em wanpela bikpela hevi bilong misin Katolik. Wanpela bisop i tok, insait long 13 yia i go pinis, lain pris i go liklik inap 9 pesen.

Planti i ting dispela kibung bilong ol i no kamapim gutpela wok samting na i olsem i lus nating. Ol i no bin tingim gutpela samting ol i ken mekim bilong pulim ol man bilong Yurop i kam bek gen long lotu. Josep Duval, em bisop bilong Frans, em i tok, ‘Yumi no ken toktok long ol samting i no inap wok gut. Yumi save mekim ol tok olsem ol bikman bilong lo. Yumi mas tingim sampela pasin bilong kamapim ol tok i klia long ol man na bai ol i ken pilim.’

Wan wan bisop tasol i bin stori long pasin bilong ol aposel long lainim ol man long ol samting bilong lotu Kristen. Bisop Frantisek Tondra bilong Spis long Federal Ripablik bilong Sek na Slovak em i tok, ‘Yumi mas kirap bihainim gen pasin bilong ol Kristen bilong pastaim long skulim ol man. Ol Kristen bilong bipo, taim ol i baptais pinis ol i save ol i mas autim gutnius long ol man.’

Bihainim Pasin Baibel i Makim

Olgeta Kristen bilong pastaim ol i save autim tok bilong Baibel na lainim ol man. Wanpela buk (Evangelism in the Early Church) i tok: ‘Long bipo olgeta Kristen i save autim tok, na dispela em i wanpela bikpela mak bilong ol; olgeta bilong kongrigesen i mas mekim dispela wok; ol wok bilong lotu Kristen em samting bilong olgeta Kristen long mekim, na olgeta i mekim wok olsem misineri bilong helpim ol man long tanim bel na kamap Kristen.’

Krais Jisas i tok, olgeta bilong lain bilong em ol i mas autim gutpela tok bilong Kingdom. Em i tok: “Bai ol i autim dispela gutnius bilong kingdom bilong God long olgeta hap bilong graun, bai olgeta lain manmeri i ken harim, na bihain tasol bai las de i kamap.” (Matyu 24:14) Olsem na dispela bikpela wok bilong autim tok i mas kamap “long taim bilong las de.”​—Daniel 12:4.

I gat 4 milion samting Witnes Bilong Jehova, na long yia 1991 ol i autim tok inap wan bilion aua long 211 kantri. Ol i mekim long Isten Yurop tu. Ol i tokim ol man long gutpela tok olsem: Kingdom bilong God bai stretim ol samting, na yumi mas bilip long Krais Jisas, em rot bilong God i kisim bek yumi. (2 Timoti 1:​9, 10) Dispela tok bai helpim tru ol man​—ol i mas harim long taim pinis i no yet.​—Matyu 24:​3, 14.

[Piksa Kredit Lain long pes 26]

Jesus Preaching at the Sea of Galilee, by Gustave Doré