Sampela Tok i Kam Long Olgeta Hap
Ol i Ting Taia i Kamapim Tok Nogut
Wanpela bikpela kampani long Yokohama, Japan, i no wokim moa wanpela kain taia, long wanem, ol Muslim i tok ol dispela taia i bagarapim bel bilong ol. Ol Muslim i tok ol baret baret long ol taia i luk olsem rait Allah [God] long tok ples Arap. Wanpela nius (Asahi Evening News) i tok, kampani i tok sori long ol Muslim, long wanem, ol i no gat save long lotu Islam. Na ol i tok wanpela kompyuta i kamapim stail bilong dispela kain taia na ol makmak bilong taia bilong wokim baret baret long en i bilong helpim ka long holim gut rot. Dispela kampani i no laik toknogutim Allah. Olsem na nau dispela kampani i kisim bek ol dispela kain taia ol i bin baim i go long ol kantri Islam o ol i senisim na salim narapela kain taia.
Bikpela Pe Bilong Pasin Raskol Long Ostrelia
Wanpela lain (Australian Institute of Criminology) i tok, long olgeta yia pe bilong pasin raskol long Ostrelia em 27 bilion dola—em 1,600 dola bilong olgeta man meri pikinini long Ostrelia. Olsem wanem ol i save long dispela bikpela pe? Wanpela nius (The Australian) i kamapim ripot bilong dispela lain (Australian Institute of Criminology). Pasin giaman bilong planti man long kisim nating mani long ol insurens-kampani bilong ka i wok long go antap. Na taim ol i bungim olgeta kain kain pasin bilong giaman na paulim mani long olgeta yia em 13 bilion dola; pe bilong pasin birua i painim man i olsem 300 milion dola; pe bilong baim polis na ol loya samting em 2 bilion 500 milion dola, na pe bilong holim wanpela man long kalabus inap wanpela yia i go antap olsem 50 tausen dola.
“Biktaun i No Gat Lang”
Wanpela nius (International Herald Tribune) i tok, ol manmeri long Beijing, Saina, i wok long pinisim ol lang long haus bilong ol. Wanpela bikman bilong helt i tok: ‘Mipela putim mak long pinisim olgeta lang long biktaun. Tasol mipela i no laik kilim tasol ol lang, mipela i laik kamapim ol klinpela taun.’ Bilong kirapim ol man long mekim olsem, ol manmeri i pasim nabaut nabaut ol plak i gat rait na ol i givim 2 milion liklik tanget long ol man bilong toksave long samting ol i laik mekim. Wanpela wik bihain long ol i toksave long samting ol i laik mekim, gavman i tilim long ol man 14 ton marasin bilong kilim ol lang na 200,000 samting bilong paitim ol lang. Olsem na insait long wanpela wik ol man i mekim bikpela wok long ol dispela samting. Wanpela mun bihain long dispela, 1,000 liklik lain, em ol lapun na pikinini i bung long en, i mekim bikpela wok long 8,000 kilo marasin nogut bilong kilim ol lang. Long mun Jun [1992] long sampela hap bilong biktaun Beijing i gat planti lang—33 long olgeta rum wan wan. Tasol gavman i putim mak olsem ol lang i no ken planti—tupela tupela long olgeta wan handet wan handet rum.
Planti Man i Stap Rabis Long Yurop
Wanpela nius (Le Monde Diplomatique) bilong Paris i tok i gat 12-pela kantri i insait long wanpela lain ol i kolim European Community. Na long ol dispela kantri i gat 53 milion manmeri ol i stap rabis tru. Long kantri Grik, Aialan, Potyugal, Spen, 20 i go inap 25 pesen bilong olgeta manmeri long ol dispela wan wan kantri i stap rabis. Na tu, namba bilong ol rabisman long Briten, Itali, Netelan i wok long go antap. Planti man i stap rabis, long wanem, i no gat wok mani. Long ol 13 milion manmeri long ol dispela kantri i no gat wok mani, ol i ting 6 milion samting bai i no inap tru long painim wok.
Ol Katolik i Bihainim “Nupela” Rot Long Autim Tok
Wanpela nius (New York Newsday) i tok, nau Misin Katolik i tok, wok bilong autim tok bilong lotu i bikpela samting. Ol bikman bilong lotu i tingting planti, long wanem, planti Katolik i lusim misin na ol i go insait long ol narapela lotu. Olsem na Pop John Paul Namba 2 i tok ol i mas bihainim “nupela rot long autim tok.” Bilong kirapim ol man long mekim olsem, pop i bin kamapim wanpela oganaisesen—Autim Tok 2000. Nius i tok moa: ‘Sampela nupela tingting bilong ol em long kirapim misin long autim tok long haus bilong ol man, em rot ol Witnes Bilong Jehova na sampela lotu Kristen moa i mekim wok long en.’
Samting Nogut Insait Long Misin Yunaitet Sios
Wanpela pasto bilong Yunaitet Sios, em Sylvia Hamilton, i tok: ‘Yumi planti i ting pasin sem i no inap kamap insait long misin, na ol pris pasto i no inap tru mekim pasin sem.’ Tasol em i ‘wanpela bikpela hevi long misin.’ Wanpela nius (Toronto Star) bilong Kanada i tok, pasin sem, maski em ol tok doti o subim narapela long mekim pasin sem, em i kamap bikpela tru insait long misin, winim pasin sem i stap ausait long misin long olgeta lain man. Wanpela man (Peter Lougheed) bilong misin Yunaitet Sios i tok, ‘long ples wok ol man na meri inap painim hevi, olsem narapela i mekim pasin sem long em, tasol nau dispela pasin i kamap bikpela insait long misin, winim ples wok.’ Na dispela nius (Star) i tok: ‘Planti yia ol misin i bin haitim dispela bikpela hevi na ol i tok i no gat pasin sem i kamap insait long misin, tasol nau dispela hevi bilong misin i olsem wara long ples tais—i wok long boil i kam antap long ples klia.’
Wanpela Kain Ain i Nambawan Tru
Tupela tausen yia i go pinis wanpela sip bilong Rom i bin go daun insait long solwara long nambis bilong Sardinia. Wanpela nius (Il Messaggero) bilong Itali i tok, kago bilong en—wanpela kain ain—i nambawan tru. Ol i ting dispela sip i laik go long Rom na ol Rom bai mekim wok long dispela kain ain bilong wokim ol paip wara, na ol baret bilong karim wara, na sampela samting moa. Ol saientis i tok dispela kago i nambawan kago tru, long wanem, planti yia dispela kain ain i bin stap long as bilong solwara na bikpela hap wesan i karamapim, olsem na dispela kain ain i no gat redioaktiviti long en, em wanpela kain ain i nambawan tru. Long nau i no gat tru wanpela kain ain olsem dispela, olsem na em i bikpela samting tru long helpim ol saientis taim ol i mekim wok bilong ol.
Pikinini i Mekim Wok Leba
Wanpela lain (Brazilian Institute of Geography and Statistics) i tok: ‘Kirap long 1980 i go inap 1989 em i no gutpela taim bilong ol pikinini na ol yangpela bilong Brasil.’ Wanpela nius (Jornal da Tarde) i kamapim ripot bilong dispela lain na i tok olsem: Long 59 milion 700 tausen pikinini, 32 milion bilong ol i stap long ol famili i rabis. Long olgeta yia dispela ol famili i kisim klostu 20 dola tasol. Olsem na 10 milion samting pikinini i gat 10 i go inap 14 krismas, ol i no go long skul, ol i wok mani bilong helpim famili bilong ol. Wanem samting i kamap long dispela? Wanpela savemeri (Rosa Ribeiro) i tok: ‘Dispela i save kamapim ol narapela famili rabis taim pikinini i go bikpela na marit, long wanem, sapos pikinini i no skul em i no inap tru senisim sindaun bilong em.’
Ol Marasin Long Isip Bilong Bipo
Wanpela nius (Frankfurter Allgemeine Zeitung) i tok: ‘Ol saientis long Yunivesiti bilong Munik na Yunivesiti bilong Ulm long Jemani i bin glasim skin na bun na gras bilong sampela man Isip, em ol i bin stap namel long yia 1070 paslain long Krais i go inap long yia 395 bihain long Krais. Na ol i painim sampela liklik hap marasin drak, olsem koken na nikotin, long skin bilong ol.’ Dispela samting ol saientis i kisim save long en, i helpim yumi long save long sindaun bilong ol Isip bipo. Nius i tok moa: ‘Ol Isip i bin mekim wok long ol strongpela marasin drak bilong givim long pikinini taim em i krai na bai em i stap isi.’ Olsem wanem ol saientis i save long dispela samting? Wanpela olpela rait bilong ol Isip i stori long ol i bin wokim wanpela strongpela kain marasin long pekpek bilong lang na pikinini bilong wanpela kain plaua (poppy). Ol i ting dispela marasin i bilong helpim man long slip.
Samting Ol Piksa Nogut i Mekim
Wanpela niusman bilong nius Veja i bin givim sampela askim long wanpela bos (Steven Spielberg) bilong ol piksa wokabaut bilong kisim tingting bilong em long ol kros pait i save kamap long piksa wokabaut samting. Niusman i askim dispela bos, em i ting ol dispela kain piksa samting bai mekim wanem long ol man. Em i tok: ‘Kros pait long ol stori bilong piksa wokabaut o televisen inap kirapim ol man long mekim dispela kain pasin, winim ol pait tru tru ol i lukim long rot samting o long nius bilong televisen. Long ol piksa wokabaut ol i kamapim gut ol samting, olsem ol bilas samting, na ples man i pait long en em i olsem ol gutpela gutpela ples, o pasin bilong man long pait em nambawan pasin, olsem na ol man i lukim dispela samting long piksa na ol i ting kros pait i no wanpela pasin nogut. Tasol sapos ol man i lukim kros pait long nius bilong televisen, em ol nius i no gat ol samting bilong bilas, na em ol stori bilong kirapim man long save em pasin nogut, em nau, ol man i save—kros pait em i samting nogut tru.’ Tupela piksa wokabaut dispela man i bin bosim em Jaws na Indiana Jones. Planti kros pait i kamap long tupela piksa na bikpela hap blut bilong ol man i kapsait, olsem na inap long nau dispela man i no bin larim yangpela pikinini man bilong em i lukim dispela tupela piksa wokabaut.
Ol Balus i Mas Wanbel Long Raun Long Yurop
Wanpela nius (La Repubblica) i tok: ‘Long 8-pela yia antap bai ol man i no inap raun long balus long Yurop.’ Long tupela yia i go pinis i kam inap long nau planti balus moa i raun, olsem 8 pesen. Tasol ol hevi bilong ol man i bosim ran bilong balus “i go antap olsem 62 pesen.” Long olgeta 10-pela 10-pela balus i raun long Yurop, klostu 3-pela i no kam long taim stret, ol i kam bihaintaim olsem 24 minit samting. Giovanni Bisignani em i presiden bilong wanpela lain bilong ol balus long Yurop (Association of European Airlines), na em i tok, ol balus i pas pas tumas na ol i no inap ran gut, long wanem, i gat 54 ples ol man i save stap long en na bosim ran bilong ol balus, tasol olgeta i mekim wok long 31 kain kain rot. Em i tok i mas i gat wanpela rot tasol bilong bosim ran bilong ol balus long Yurop, na sapos ol i no painim dispela rot, ol balus bai wok yet long kamap bihaintaim.