Sampela Tok i Kam Long Olgeta Hap
Pasin Bilong Smok
Long sampela kantri planti man i lusim smok. Tasol insait long 20 yia nau, planti man moa i kirap na smok long ol narapela kantri. Yumi ken tingim Saina. I no gat narapela kantri olsem Saina na planti man i save smok. Lain bilong smok long dispela kantri i go bikpela inap 297 pesen. Namba 2 kantri i gat planti man i save smok em Yunaitet Stets. Lain bilong smok i go bikpela inap 27 pesen. Na namba 3 kantri i gat planti man i save smok em India. Lain bilong smok i go bikpela inap 50 pesen. Na sampela kantri moa na lain bilong smok i go bikpela i olsem: Grik (331 pesen); Hong Kong (214 pesen); Indonisia (193 pesen); Not Korea (325 pesen); Ruanda (388 pesen); Singapo (186 pesen); Tansania (227 pesen); Turki (185 pesen). Nius Asiaweek i tok, namel long 1970 na 1993 dispela senis i bin kamap. Long ol 138 kantri nius i stori long en, planti man i bin lusim smok long 26 kantri tasol.
Sot Moa Long Ol Pris Long Frans
Long Frans, Misin Katolik i sot long ol pris. Nius Le Monde bilong Paris i tok: Long 1995 inap 96 man tasol i kamap pris long Frans, na 121 tasol long 1994. Long 1995, 7-pela man tasol i go insait long lain Jesuit, na 25 tasol i go insait long lain bruder Dominiken. Wankain hevi i kamap long ol sister Katolik. Nius Le Monde i tok: “Kirap long 1970 i kam inap nau, namba bilong ol meri i laik kamap sister i wok long i go daun. Long 1977 i gat 92,326 sister na long yia i go pinis, i gat 51,164 sister tasol.” Planti pris i go lapun na misin i no gat strong long pulim ol nupela man, olsem na ol i ting long yia 2005 bai i gat inap olsem 9,000 pris tasol long Frans. Nius Le Monde i kamapim sampela as bilong dispela hevi olsem: “Long ai bilong ol man i olsem wok pris i no gutpela wok moa, na ol man i pret long mekim tok promis olsem ol bai wok pris inap longtaim, na ol pris i no gat gutnem moa, na ol man i no bilip moa long ol bikman bilong misin.”
Kilim i Dai Skin Bilong Ol Yet
Nius Scientific American i tok: “Long olgeta yia, inap olsem 30,000 manmeri long Amerika i save kilim i dai skin bilong ol yet. Planti man i save kilim i dai skin bilong ol yet, winim ol meri inap 4-pela taim.” Planti man i kilim i dai skin bilong ol yet taim ol i wok long go lapun. Ating ol i mekim olsem, long wanem, skin i no strong moa, na ol i no inap mekim planti samting olsem bipo ol i bin mekim. Ol man i kisim pinis 75 krismas o sampela krismas moa, na ol i save kilim i dai skin bilong ol yet, namba bilong ol i winim ol yangpela inap 4-pela taim. Wanem ol samting i mekim na wanpela man inap kilim i dai skin bilong em yet? Bikpela samting em famili na lain bilong em—ol i no sori long em na strongim em, na wan wan taim tasol em i go long lotu. Taim yumi skelim ol kantri em planti man i save kilim i dai skin bilong ol yet, Yunaitet Stets i stap namel—long olgeta 100,000 100,000 manmeri, inap olsem 11-pela man i save kilim i dai skin bilong ol yet.
Ol i Skul Long Kros Pait
◼ Wanpela nius (The Washington Post) i tok: ‘Inap wanpela yia ol saveman long 4-pela yunivesiti, ol i bin skelim ol piksa i kamap long televisen na ol i tok, planti piksa i kamapim kros pait na dispela inap bagarapim tingting bilong ol man.’ Ol saveman i tok, klostu olgeta piksa long televisen i kamapim kros pait, na rot bilong kamapim inap mekim sampela samting nogut long ol man i lukim. Olsem: ‘Ol dispela piksa inap skulim man long kros pait, o em i no pilim moa ol hevi em inap kamap long dispela kain pasin, o em i pret moa long ol raskol bai bagarapim em.’ Wanpela as bilong dispela kain tingting i olsem: Planti man (73 pesen) i insait long kros pait long ol dispela piksa long televisen, ol i no kisim strafe long rong ol i mekim. Em nau, ol man i ting “hevi i no inap painim man i kros pait.” Na planti piksa i no kamapim ol samting ol dispela man nogut i mekim long narapela man olsem givim pen long em, o bagarapim bel bilong em, o stilim mani samting bilong em. Na ol saveman i tok, long planti piksa ol man bilong kros pait i mekim wok long gan, na dispela inap “kamapim tingting na pasin nogut” long ol man i lukim.
◼ Profesa Len Eron, em wanpela saientis long wanpela yunivesiti (University of Michigan’s Institute for Social Research), em i tok: Taim ol man i kisim 30 krismas na ol i bin lukim kros pait planti taim long televisen taim ol i liklik, ‘planti taim ol bai kot, long wanem, ol i bin kros pait, na planti taim polis bai holim ol, long wanem, ol i spak na draivim ka, na ol bai strong long pait taim ol i dring, na ol bai mekim hatpela pasin long poroman marit, na tu, ol bai kamapim ol pikinini bilong pait.’ Ol pilai bilong video i save kamapim sampela hevi olsem. Nius The Toronto Star i kamapim tok bilong Profesa Eron. Em i tok, ol pilai bilong video inap nogutim man, long wanem, em yet i insait long en. Em “bai pulim wanpela han o subim wanpela baten na i olsem em yet i mekim dispela samting nogut tru pilai i kamapim—kilim i dai wanpela man.” Profesa Eron i tok, ol papamama i mas mekim sampela samting moa bilong was gut long ol pikinini bilong ol. Tasol em i tok, “planti papamama i no wari” long dispela samting.
Ol Pikinini Bilong Pamuk Long Esia
Wanpela nius (New York Times) i tok, ol gavman na ol lain bilong helpim ol man olsem welfe samting long Esia, ol i ting inap wan milion pikinini man na pikinini meri em ol i no winim yet 17 krismas, ol i kamap pamukmeri na pamukman. Ol i no save tru hamas pikinini i pamuk, tasol long ol kantri olsem India, Kambodia, Filipin, Tailan, Taiwan, Saina, ol pikinini em skin bilong ol i no bikpela yet, ol i stap long ol haus pamuk. Bilong wanem ol man i laikim ol liklik pikinini? Wanpela as, em ol man i pret long sik AIDS. Dispela nius i tok: “Long olgeta hap bilong Esia ol man i laikim ol pikinini i yangpela tru, long wanem, ol i ting ol dispela pikinini i no kisim yet binatang jem bilong sik AIDS.” Tasol long ol dispela kantri, sik AIDS i wok long go bikpela tru namel long ol dispela pikinini, long wanem, ol man i wok bisnis long pamuk, ol i baim ol i go o kisim ol long narapela narapela kantri. Na narapela as, em ol man i raun raun painim ol pikinini bilong pamuk wantaim ol, na sampela bilong ol dispela man em ol turis. Ol man i holim na kisim i go sampela bilong ol dispela pikinini, tasol bilong kisim mani, papamama bilong sampela, ol i bin baim pikinini i go long ol dispela man i wok bisnis long pamuk.
Olsem Wanem? Sanwis i Samting Nating?
Wanpela man bilong Briten, em Bikman Sanwis, em i wanpela man bilong mekim save pilai laki. Wanpela taim long yia 1762, em i bin sindaun inap 24 aua na pilai laki. Em i hangre, olsem na bilong pinisim hangre bilong em, em i singaut long tupela hap bret i gat hap mit namel long en. Em nupela kain kaikai, olsem na ol man i givim nem sanwis long en, em nem bilong dispela man. Long nau ol man long Briten i save tromoi klostu 8 milion dola long olgeta de bilong baim sanwis. Insait long 5-pela yia i go pinis, pasin bilong ol man long baim sanwis i go bikpela moa inap 75 pesen. Nius The Times bilong Landon i tok, inap 33 pesen bilong ol kaikai em 8,000 liklik haus kaikai i save wokim, em ol sanwis. Long olgeta yia, ol man long Briten i save kaikai inap olsem 1.3 bilion sanwis em ol i bin baim. Tasol planti bilong ol dispela sanwis i no olsem sanwis ol famili i save karim i go taim ol i piknik long bus o nambis samting, nogat. Sampela liklik haus kaikai i wokim ol sanwis i narapela kain, em ol sanwis i gat mit bilong sikau o pukpuk, o sokolat wantaim prut stroberi na strongpela susu ol i kolim krim.
Ol Yangpela na Ol Gan
Wanpela ripot bilong lain Children’s Defense Fund i tok, gan i save kilim i dai planti yangpela long Amerika, em ol i gat 10 i go inap 19 krismas, winim ol narapela lain. Gan i namba 2 bikpela samting i save kilim i dai ol yangpela. Namba wan samting em birua i kamap long rot, olsem long ka samting. Long 1993, long olgeta 92 minit 92 minit, gan i bin kilim i dai wanpela yangpela Amerika i no kisim yet 20 krismas. Dispela hevi long ol yangpela i bin i dai, i go bikpela inap 7 pesen long 1992. Taim ol i skelim olgeta man long Amerika em ol i bin dai long gan, namba bilong ol i go bikpela inap 4.8 pesen tasol. Lain Children’s Defense Fund i tok, gavman i gat asua, long wanem, ol i no mekim wanpela samting na ol pikinini i no ken holim gan o ol gan i no ken kamap long ol skul. Ol ripot bilong dipatmen bilong bosim ol lo na kot long Yunaitet Stets (U.S. Justice Department) i truim dispela tok. Insait long 10-pela yia, namba bilong ol yangpela, em ol i kilim i dai man, em i go bikpela inap 3-pela taim—long 1994 winim 26,000 yangpela i bin kilim i dai ol narapela man. Na long wankain taim, namba bilong ol yangpela i bin mekim wok long gan bilong kilim i dai ol man i go bikpela tru inap 4-pela taim. Namba bilong ol yangpela i mekim wok long narapela samting bilong kilim i dai ol narapela man i no bin senis. Planti man i dai long gan na dispela i kamapim klia olsem gan i wanpela bikpela samting bilong kilim i dai ol man.