Nupela Taim—Em Bai Kamap?

LONG Epril 13, 1991, George Bush, bipo em presiden bilong Amerika, em i mekim wanpela tok long Montgomeri, Alabama. Het-tok i olsem: ‘Nupela Taim Inap Kamap.’ Bilong pinisim tok bilong em, em i tok: ‘Klostu nau nupela taim bai kamap​—em gutpela samting tru bai yumi painim.’

Tupela mun bihain wanpela nius (The Bulletin of the Atomic Scientists) i tok, ol gavman Komyunis long Isten Yurop i pundaun pinis, olsem na ating ‘nupela taim i wok long kamap. As bilong nupela taim em pasin sekan, na stretpela pasin, na pasin demokratik.’

I kam inap long yia 1993 ol i bin wok yet long stori long nupela taim. Long Janueri 1993, nius The New York Times i stori long wanpela kontrak i tok promis long ol kantri i no ken wokim moa planti samting bilong pait. Nius i tok: ‘Presiden Bush i tok, nau Amerika na Rasia “i laik go insait long nupela taim ol i wetim.” ’

Tupela wik bihain long dispela tok, nupela presiden bilong Yunaitet Stets, em Bill Clinton, em i tok: ‘Nau, olpela taim i laik pinis na planti kantri i stap fri, tasol i gat ol bikpela hevi tru i stap na gavman bilong ol i no strong olsem bipo. Tasol dispela nupela taim i helpim pinis planti milion Amerika.’

Olsem na i gat planti tok i bin kamap long nupela taim​—em i narapela kain na nambawan tru. Insait long sotpela taim, George Bush i bin tokaut 42 taim long “Nupela Taim.”

Olsem wanem? Dispela em nupela tok, o yumi bin harim bipo?

I No Nupela Tok Tumas

Namba Wan Pait i pinis na long Me 1919, wanpela lain bilong misin (Federal Council of the Churches of Christ) long Amerika i bung long Klivlan, Ohaio. Ol i tokaut olsem ‘nupela gutpela taim inap kamap.’ Wanpela man i tok: ‘Long dispela nupela taim, pasin bilong resis na wok long winim narapela bai pinis, na ol man bai bung wantaim na poroman gut. Na ol lain man i no ken bruk moa​—ol bai stap wanbel. Long dispela nupela taim, ol man bai stap olsem brata brata na pren wantaim. Pasin bilong skrapim bel bilong narapela bai pinis. Pait long daunim pasin nogut, em tasol bai stap.’

Ol misin i ting dispela nupela taim bai kamap olsem wanem? Ol i ting em bai kamap long rot bilong Kingdom bilong God, em Baibel i tok promis long en? Nogat. Ol i ting wanpela lain politik bai kamapim dispela kain nupela taim. Bipo wanpela bikman bilong misin i tok: ‘Lig ov Nesen long nau, em i wanpela bikpela samting, na em i hap tru bilong wok Kristen bilong yumi, na em i samting bilong helpim yumi.’ Long dispela taim bipo, ol bikman bilong misin i tokaut olsem, Lig ov Nesen “i olsem Kingdom bilong God i kamap long graun long rot bilong wok politik.”

Tasol long Jemani, bikman bilong ol, Adolf Hitler, em i laik pasim Lig ov Nesen. Olsem na long yia 1933 samting em i kirapim Gavman Natsi long Jemani. Hitler i tok, Gavman Natsi bai stap wan tausen yia na kamapim samting Baibel i tok Kingdom bilong God tasol inap kamapim. Hitler i tok: ‘Mi bai kirap na mekim wok long rot bilong ol yangpela. Ol yangpela i ken helpim mi long kamapim nupela taim.’

Hitler i laik bai ol man i save long strong bilong Gavman Natsi, olsem na em i wokim wanpela traipela stediam long Nurembek. Braitpela bilong pletfom bilong stediam i olsem 300 mita, na antap long pletfom em i sanapim 144 pos. Bilong wanem pletfom i gat 144 pos? Baibel i tok 144,000 bai mekim wok king wantaim “Pikinini Sipsip,” em Krais Jisas, na ol bai mekim wok king inap wan tausen yia. (KTH 14:1; 20:​4, 6) Yumi save ol i no sanapim nating dispela 144 pos long stediam long Nurembek, long wanem, i gat planti rait i tok, ol bikman Natsi i bin mekim wok long ol mak na tok bilong Baibel.

Wanem samting i kamap long ol wok ol man i laik mekim na Baibel i tok Kingdom bilong God tasol inap mekim?

Ol Samting Man i Mekim i No Inap

Ol samting i kamap pinis i soim yumi, Lig ov Nesen i lus tru long kamapim nupela taim i gat pasin sekan. Taim ol kantri i insait long Namba 2 Pait Bilong Olgeta Hap, dispela oganaisesen i pinis. Na 12-pela yia bihain long Gavman Natsi i kirap, em tu i pinis. Em i bin pundaun na ol man i ting dispela gavman i samting nogut tru.

Kirap long bipo na i kam inap nau, wok ol man i mekim bilong kamapim wanpela nupela taim i gat pasin sekan, i no kamap gutpela. Wanpela man bipo em i wok long gavman long Amerika, em Henry Kissinger, em i tok: ‘Olgeta gavman i bin pundaun na bagarap. Ol samting i kamap pinis i soim yumi wok bilong ol man i lus tru, na ol samting ol i laik bai kamap i no bin kamap.’

Orait, olsem wanem long nupela taim, nau ol bikman bilong graun i mekim bikpela toktok long en? Nau planti lain i kros pait na i olsem tingting bilong ol dispela bikman long kamapim nupela taim i giaman tasol. Olsem: Long Mas 6, 1993, wanpela man i save raitim tok long nius (William Pfaff), em i rabisim tok bilong ol bikman bilong gavman na em i tok: ‘Nupela taim i kamap pinis, a? Em i nupela samting tru, long wanem, ol i orait long ol kantri i go pait long narapela kantri na daunim ol, na pinisim sampela lain ol i no save laikim.’

Taim gavman Komyunis i pinis i gat planti pasin birua na pasin nogut tru i kamap. Taim George Bush i no lusim yet wok presiden bilong em long Janueri 1993, em i tok: ‘Bihain nupela taim inap mekim nogut long ol man, wankain olsem olpela taim.’

I Gat As Bilong Samting Yumi Wetim?

Olsem wanem? Yumi no inap kisim nupela taim? Em inap kamap tru, o em i olsem wanpela driman nating bilong yumi? Yumi save ol man i no inap kamapim nupela taim, a? Tasol olsem wanem long tok promis bilong God? Baibel i tok: “God i promis pinis long em bai i wokim nupela skai na nupela graun.”​—2 Pita 3:13.

Nupela skai God i tok promis long kamapim em nupela gavman, na dispela gavman bai bosim graun. Dispela nupela gavman em Kingdom bilong God long heven, na Jisas i bin lainim ol man long beten long dispela gavman. (Matyu 6:​9, 10) Dispela gavman long heven em Krais Jisas wantaim 144,000 manmeri ol bai wok king wantaim em. Na nupela graun i olsem nupela lain bilong graun. Tru tumas, long nupela taim dispela lain bai stap gut aninit long gavman bilong God.

Kingdom bilong God, em gavman bilong em, bai bosim nupela taim em i tok promis long kamapim. Olsem na yumi save ol man i no ken kamapim dispela nupela taim. Wanpela bikpela buk i tok: ‘Kingdom bilong God i no wanpela samting ol man i mekim, na em i no wanpela samting ol man inap kamapim. Kingdom em wanpela wok bilong God. Em i no wanpela samting ol man inap kamapim. Na ol Kristen i givim ol yet bilong mekim laik bilong God, ol tu i no inap kamapim.’​—The Zondervan Pictorial Encyclopedia of the Bible.

Nupela taim aninit long Kingdom bilong God bai kam tru. Na yu ken bilip long tok promis olsem Kingdom bai kam, long wanem, em tok promis bilong God na “em i no save giaman.” (Taitus 1:2) Olsem na i gutpela sapos yu tingim gut nupela taim God bai kamapim.

[Piksa Kredit Lain long pes 3]

NASA photo