Wok Mani Long Pilai i Olsem God Bilong Mi

TAIM ol man i paitim han longpela taim mi save amamas tru, olsem na mi no tingim ol bikpela wok mi bin mekim long lain long mekim dispela pilai. Mi gat nem long hangamap long rop antap na tanim tanim.

Na mi inap tanim tanim na kalapim ol elefan. Na mi sanap long het bilong mi long wanpela pos i stap long sol bilong wanpela man. Taim mi mekim olsem mi save tromoi planti samting i go antap na holim gen long han. Mi mekim pani na ol man i kam bilong lukim mi ol i amamas na lap.

Mi bin mekim ol dispela samting 46 yia i go pinis taim mi gat 17 krismas tasol. Nau mi save kirap nogut long tingim samting skin bilong mi i bin mekim taim mi yangpela. Tru tumas, mi bin givim bel tru long dispela wok; inap 20 yia em i olsem god bilong mi.

Insait Long Lain Bilong Pilai

Mama i karim mi long Kempsi long Nu Saut Wels, Ostrelia. Mipela i stap rabis tru. Mipela wokim banis bilong haus long ol bek kon na penim long wanpela kain kambang, na rup bilong haus em olpela kapa. Bihain mipela go sindaun long Tari long hap saut. Mipela bilong lotu Sios Bilong Krais, tasol mipela i no givim bel long lotu.

Long 1939 papa i insait long ami, olsem na mama i bungim liklik kago bilong mipela​—klos tasol​—na em i kisim mi wantaim 3-pela susa i go sindaun long Sidni. Long Sidni mi insait long skul bilong tanim tanim skin na kalap kalap na mi inap mekim gut dispela wok. Inap sampela mun tasol na mi kamap hapman stret long mekim dispela samting. Long 1946 mi insait long wanpela lain i raun long ol taun na mekim ol pilai samting (circus), na mi lain long hangamap long rop antap na tanim tanim.

Klostu olgeta nait mipela stap long narapela narapela taun. Planti manmeri i save kam bilong lukim ol bilaspasin na ol pilai bilong mipela. Tasol ol i no lukim pasin bilong dring na pait na pamuk i stap namel long dispela lain em ol i save litimapim nem bilong ol.

Oltaim mi go long ol pati na planti taim mi insait long ol pait. Tasol mi no bin dring planti. Mi no save tok nogut, na mi no amamas sapos wanpela man i tok nogut taim wanpela meri i stap. Dispela i as bilong planti pait mi save insait long en.

Long planti taun mipela i save pilai long en, bos i save salim wanpela i go lukim pris Katolik na givim sampela tiket long em, no gat pe, bambai em i ken kam lukim mipela i pilai. Na tu, pris i kisim mani olsem kontribusen. Bos i ting dispela bai mekim na bai mipela i laki na planti manmeri bai kam lukim mipela.

Mi Senisim Pilai

Long 1952 sampela man i save mekim kain kain samting olsem danis, singsing, tanim tanim skin. Ol i tok dispela i gutpela rot bilong kisim biknem na planti mani. Olsem na mi kirap na mekim olsem. Mi bin raun long ol nait-klap na kamapim ol pilai bilong mi long ol bikpela haus pilai long Ostrelia na Nu Silan. Mi save pilai wantaim ol man i gat biknem. Mi tu mi kisim biknem long tanim tanim skin na kalap kalap na tromoi planti samting i go antap na holim gen long han.

Mi bin ting, taim mi senisim pilai, em gutpela samting mi mekim. Tasol mi no amamas, long wanem, ol pati na pasin pamuk na pasin bilong dring i moa nogut long dispela nupela wok. Nau mi save bung wantaim ol man na meri i save mekim pasin sodom. Na ol drak i nupela samting na ol man i kirap na kisim. Gutpela tru mi no bin insait long ol dispela samting.

Mi gat wanpela tingting tasol​—kisim biknem na mekim pilai bilong mi i kamap gutpela. Mi laik ol man i litimapim nem bilong mi. Mi no tingting long marit. Mi no laik kisim wok bilong man marit. Wok mani bilong mi i olsem god bilong mi. Tasol maski yumi gat strongpela tingting long wanpela samting, em inap senis.

Marit

Wanpela taim mi wok long painim sampela meri bilong danis na mi bungim wanpela meri i gat gutpela skin tru. Nem bilong em Robyn. Em i save gut long danis, na tu, em i save tru long brukim lek long narapela kain pasin. Mi amamas long em i laik wok wantaim mi. Orait, faipela mun bihain, long Jun 1957, mitupela i marit. Inap 3-pela yia mitupela i raun long ol nait-klap, na kamap long televisen, na raun long ol narapela narapela ples na mekim pilai.

Bihain long mitupela i marit mitupela i no save go long planti pati bilong ol lain bilong pilai na danis. Na taim mipela i pilai long ol nait-klap tu, mi strong long Robyn i mas i stap insait long rum bilong bilas inap long taim bilong mekim danis. Ol lain i gat wok long mekim pani, ol i save mekim ol tok pilai nogut, na sampela man bilong pilaim musik ol i save kisim drak. Planti ol i save dring oltaim na mekim tok nogut.

Ol Narapela Kantri

Long 1960 mipela i kisim kontrak bilong mekim wok bilong mipela long ol narapela kantri. Olsem na mi tingting: ‘Em nau, rot i op pinis.’ Tasol nau mipela i gat liklik pikinini meri, em Julie. Tasol maski, mi kisim meri pikinini bilong mi i raun long hap bilong Is. Mipela i no sindaun gut. Wanem samting mipela inap karim long switkes, em tasol mipela karim. Planti nait mipela mas mekim ol pilai na danis bilong mipela inap 5-pela taim. Mipela mekim olsem inap wanpela yia na bihain mipela go bek long Ostrelia.

Nau mipela i gat nem pinis long ol narapela narapela kantri, na planti man i laik lukim mipela. Tasol long Ostrelia rot i no op olsem, long wanem, i no gat planti manmeri. Olsem na long 1965 mipela i kirap gen na go long ol narapela kantri. Tasol nau mipela i gat narapela pikinini meri, em Amanda. Inap 5-pela yia mipela i bin wok long 18 kantri.

Meri pikinini bilong mi i bin karim planti hevi, long wanem, mipela i no sindaun gut. Tasol mi strong long kisim biknem. Wanpela taim mitupela i mekim pilai na tupela pikinini bilong mipela i stap klostu, olsem 60 mita. Tasol maski olsem, mi baim wanpela man long holim gan na lukautim tupela. Planti taim mi tok pait wantaim bos bilong ol nait-klap, long wanem, ol i laik bai Robyn i sindaun wantaim ol man i kam long klap na kirapim ol long dring. Tasol mi save ol dispela man nogut i laik bai Robyn i mekim narapela samting moa. Na mipela mas wok wantaim ol meri i save rausim olgeta klos bilong ol, na ol meri pamuk, na ol man bilong mekim pasin sodom. Sampela i bin askim mi na Robyn long mekim pasin nogut wantaim ol. Na planti taim ol man bilong pilaim rok-musik i save kisim drak.

Taim mipela raun long ol kantri, long san mi inap go lukim ol samting, olsem banis bilong ol animal, ol haus lotu, ol bung bilong lotu, na sampela samting moa. Mi go lukim ol samting bilong lotu, long wanem, mi laik kisim save tasol​—i no olsem mi tingim ol samting bilong lotu. Mi kirap nogut long lukim kain kain samting ol man i save lotuim. Mi lukim ol piksa i gat skin bilong man na het bilong animal, na piksa i gat skin bilong animal na het bilong man o meri. Long wanpela kantri ol i save lotuim sem bilong man na meri. Ol i ting sapos ol i mekim olsem ol bai kamapim planti pikinini.

Long narapela kantri ol man na ol pikinini man ol i save paitim baksait bilong ol long naip inap long blut i kapsait. Taim mi bin i stap, 3-pela man bilong mekim dispela samting ol i dai, long wanem, planti blut i lus. Long wanpela haus lotu i gat nem, mi lukim long bokis kontribusen wanpela toksave olsem: ‘Pe bilong wanpela konpesio em wanpela frank; 2-pela konpesio em 2-pela frank; 3-pela konpesio em 2.50 frank.’ Olaman! Mi ting, ‘sapos dispela em pasin bilong lotu, mi no laik tru!’

Go Bek Long Ostrelia

Long 1968 mipela i salim Julie i go bek long ples, tasol mipela i stap 18 mun moa bilong bungim mani bilong baim tiket inap long mipela olgeta i ken go bek long ples. Long 1970 mipela kamap long ples. Maski mipela i bin hatwok, tasol mipela i holim liklik mani tasol, na tu, mipela i no gat biknem. Mipela i bin tromoi planti mani long baim ol samting olsem klos bilong danis na pilai, na baim ol man bilong pilaim musik, na tiket bilong raun, na ples slip, na ol samting olsem. Ol samting i stap insait long switkes, ol dispela samting tasol mipela i holim.

Taim mi kam bek long Ostrelia mi kisim kontrak long mekim wok olsem wanpela man bilong mekim pani insait long wanpela pilai bilong televisen, nem bilong pilai, The Yellow House. Mi raitim na kamapim ol stori na pilai bilong ol pikinini na ol pilai bilong mekim pani, ol i kamap long ol klap, tasol mitupela Robyn i mekim yet wok bilong mipela long danis samting. Wok mani bilong mi i stap yet olsem god bilong mi. Nau Robyn na ol pikinini i karim hevi. I olsem Robyn i no gat man na ol pikinini i no gat papa.

Mi Bungim Wanpela Lotu

Mama bilong Robyn i stap wantaim mipela na wanpela taim em i soim buk Tok i Tru i Bringim Man Long Laip Oltaim long Robyn. Em i tok: ‘Kaunim dispela buk. Em i stori long lotu, tasol em i narapela kain.’ Robyn i tok em i no laik, long wanem, mipela i lukim planti samting long ol narapela kantri em ol lotu i save mekim. Tasol mama i no les. Inap wanpela wik em i tokim Robyn long kaunim dispela buk. Olsem na bilong amamasim mama Robyn i kisim buk na kaunim.

Bihain Robyn i tok, i olsem wantu ai bilong em i op. Em i kirap nogut, long wanem, dispela buk i bekim planti askim bilong em, olsem na em i laik kisim sampela save moa. Tupela wik bihain mama bilong Robyn i askim tupela Witnes Bilong Jehova long kam lukim mipela. Ol i kam tupela taim na bihain ol i singautim mipela i go long wanpela kibung klostu. Mi no amamas tumas, tasol mi go. Mi amamas long samting mi lukim na dispela i kirapim mipela long go long ol miting long Haus Kingdom.

Tasol wok mani bilong mi i stap yet olsem god bilong mi. Olsem na mi no laik i go insait long lain Witnes. Tasol Robyn i amamas long lain yet long tok tru bilong Baibel. Mi belhat long dispela. Mi ting: ‘I no stret dispela lain i bagarapim pasin wanbel i stap namel long mi na Robyn, na ol i putim ol tingting kranki bilong lotu i go long bel bilong em.’

Maski mi tok mi bai lusim Robyn, em i strong yet long stadi long Baibel. Em i kirap na go long haus bilong ol man na autim tok. Mi belhat tru taim em i tokim mi em i laik baptais na kamap wanpela Witnes. Tasol ol Witnes i tokim em long wet inap long em i lusim wok bilong em long ol danis na pilai samting.

Mi ting: ‘Aha! Mi win pinis. Ol Witnes i no laik bai em i insait long lain bilong ol. Robyn i no inap tru lusim wok mani bilong em.’ Tasol tingting bilong mi i kranki. Robyn i tokim mi em bai wok wanpela yia moa na em bai pinis. Mi lap, long wanem, mi save em i laikim tru wok bilong em na em i no inap lusim. Tasol tingting bilong mi i kranki gen. Wanpela yia bihain em i pinis long wok na em i baptais. Pikinini meri bilong mipela, Julie, em tu i baptais, na mama bilong Robyn tu.

Mi Sakim Tok i Tru

Nau mi kirap na toknogutim Robyn. Mi tokim em, em i no save tingim mi. Mi bel hevi na tok: ‘Wok mani bilong mi long pilai em nambawan samting bilong mi​—mi no inap mekim narapela wok. Yu as bilong hevi bilong mi.’ Mi tok mi bai paitim ol Witnes, long wanem, ol i bagarapim wok bilong mitupela long mekim pilai, na ol yet i as bilong ol hevi i kamap namel long mitupela.

Ol nius i stori long Baibel, Robyn i putim nabaut long haus na bai mi kaunim. Mi no kaunim, olsem na em i no mekim moa. Tasol oltaim em i beten askim Jehova long helpim mi long kisim tok i tru bambai famili olgeta i ken stap long nupela taim.

Bihain mi orait liklik long ol Witnes taim ol i kam long haus. Na wan wan taim mi go wantaim famili long miting. Mi skelim skelim ol samting mi harim na mi sutim tok long en. Tasol mi tingim olgeta manmeri long Haus Kingdom, maski ol i bilong lain Arap, Grik, Itali, Inglan, Ostrelia, i olsem olgeta i stap wanbel. Olgeta taim ol i mekim gutpela pasin pren na i no gat wanpela i kamapim tok nogut o stori long pasin pamuk samting.

Kristen Tru i Helpim Mi

Bihain mi orait long Ted Wieland i stadi wantaim mi. Em i gat gutpela pasin na em i man bilong pasin daun. Em i wok long brens-ofis bilong ol Witnes Bilong Jehova. Wanpela taim mi mekim nogut long Robyn na Ted i askim mi long go long ka bilong em. Em i opim baksait bilong ka na kamautim wanpela bokis mango na givim long mi. Mi save laikim tru ol mango, tasol ating Ted i no save. Ted i mekim wankain pasin inap planti wik​—em i givim wanpela bokis mango long mi. Wanpela taim em i opim ka na mi ting em bai kisim mango, tasol nogat. Em i tokim mi: ‘Yu inap hangamapim dispela samting insait long haus bilong yu?’ Samting em i holim em teks bilong yia i kam long Baibel na ol Witnes i save hangamapim insait long haus bilong ol. Bai mi tok wanem? Mi hangamapim dispela teks.

Ted i wok long stadi wantaim mi na em i soim mi long Baibel olsem wok mani bilong mi long pilai i no inap givim gutpela samting long mi long bihain. Em i tokim mi, gutpela samting tru mi inap amamas long en bai kamap bihain, taim ol tok profet bilong Baibel long Kingdom i kamap tru; em samting Krais i tokim yumi long beten long en. (Matyu 6:​9, 10) Kontrak bilong mi i no pinis yet, tasol mi kirap long go long olgeta miting. Mi insait long Skul Bilong Wok Autim Tok na mi kirap na go long haus bilong ol man bilong autim tok.

Nau mi kisim save olsem wok mani bilong mi long pilai i no inap givim tru wanpela samting long mi. Planti yia mi bin givim bel long dispela wok na i bin stap olsem god bilong mi, tasol mi no holim planti samting bilong skin. Famili bilong mi i bin kisim hevi, long wanem, mipela i no bin sindaun gut. Mi kisim ol i go long planti kantri na switkes i olsem haus bilong mipela. Na klostu marit bilong mi i bagarap long dispela wok mani bilong mi. Tasol nau Nambawan Bikpela i laik opim rot long mi na bai mi ken i stap oltaim long Paradais long graun, em Kingdom bai bosim.

Olsem na mi pasim tok long mekim wanpela bikpela samting tru. Taim kontrak bilong mi i pinis, mi lusim tru dispela wok na mi no bin go bek long wanpela klap o bung gen wantaim ol man i insait long dispela kain wok. Ted i bin mekim ol askim wantaim mi, em bilong man i laik baptais. Tasol Ted i dai na liklik taim bihain mi baptais long Julai 26, 1975. Bai mi amamas long bungim dispela gutpela man long nupela taim, taim em i kirap bek.​—Jon 5:​28, 29.

Planti Blesing

Jehova i givim planti samting long mipela, winim ol samting mipela i bin kisim long wok mani long pilai. Em i helpim mi long stap fri na abrusim olgeta amamas nogut. Em i bin harim ol beten bilong gutpela meri bilong mi, na maski mi putim hevi long em, em i no les. Na narapela gutpela blesing mipela kisim, em tambu bilong mi na tupela bikpela pikinini meri bilong mipela wantaim man bilong ol, olgeta i mekim wok Kristen. Liklik pikinini meri bilong mipela, em Letitia, na bikpela bilong 3-pela bubu bilong mipela, em Micah, ol i no baptais yet tasol ol i autim tok. Na Jehova i givim gutpela blesing long mi​—mi save mekim wok elda long kongrigesen.

Ol gutpela samting Jehova i bin mekim long mipela, mipela no inap bekim. Tasol mipela inap tokaut long ol narapela, olsem ol yangpela, long ol i mas was gut long ol wok mani bilong mekim pilai na ol samting bilong amamas. Mi stori long samting mipela yet i bin lukim, olsem ol hevi i save kamap taim man i pamuk, kisim drak, dring planti, harim musik na ol singsing nogut, na ol hevi inap kamap sapos planti taim ol i go long ol klap o bung bilong rok-musik. Satan yet i bosim ol dispela samting.​—2 Korin 4:4.

Ating yumi ken mekim sampela samting na yumi no save yumi lotuim Satan, olsem mi bin mekim taim wok mani bilong mi i bin stap olsem god bilong mi. Tasol mi na Robyn i amamas long strongim ol yangpela long lotuim Jehova, em God bilong inapim laik bilong bel na God bilong tingim yumi long olgeta samting.​—Em stori bilong Vivian A. Weekes.

[Piksa long pes 14]

Meri mi maritim em inap mekim olsem long skin bilong em

[Piksa long pes 15]

Mitupela Robyn long nau