Pas Bilong Ol Man

Katim Marit  Taim mitupela man bilong mi i marit tupela yia pinis, man bilong mi i pamuk wantaim wanpela gutpela pren bilong mi. Tupela yia bihain long dispela, em i lusim mi. Olsem na taim mi bin lukim skin bilong Kirap! (Epril 8, 1994) i gat het-tok: “Katim Marit​—Rot Bilong i Stap Amamas?” mi no amamas tumas long kaunim. Sampela taim mi hatwok long kaunim na stadi long ol samting i stori long famili. Tasol mi amamas long kaunim tok olsem: Bihain “poroman i no gat asua em bai bel hevi tumas na em i no amamas long em yet, tasol isi isi bel i orait bek na bihain tingting na bel bilong em i strong moa.” Mi no ken tok, mi orait bek pinis, tasol isi isi mi wok long kamap olsem. Mi bin bagarap stret na tingting bilong mi i no bin stap isi. Tasol ol tok yupela i kamapim long ol narapela nius long pasin bilong bel hevi, ol i bin helpim ol elda long kongrigesen long helpim mi na strongim mi long taim bilong hevi. Tenkyu long ol gutpela helpim yupela i save kamapim long ol nius.

D. P., long Amerika

Nupela Papa o Mama  Mi kaunim stori “Tok Bilong Helpim Nupela Papa o Mama” (Epril 8, 1994), na dispela i kirapim mi long raitim dispela pas. Mi gat 10-pela krismas na mi save stap wantaim mama bilong mi. Papa bilong mi i marit gen, olsem na nau mi gat nupela mama tu. Taim mi kaunim dispela stori na kisim tingting bilong ol narapela pikinini long nupela papa o mama bilong ol, mi yet mi ting: ‘Tingting bilong mi i wankain!’ Mi amamas yupela i bin tok, mas was gut long pasin bilong bel nogut. Planti taim mi laik resis wantaim nupela mama bilong mi, long wanem, sampela taim mi ting Papa i save laikim em, winim mi. Mi laik bai papa na nupela mama bilong mi i kaunim dispela gutpela stori bambai tupela i ken pilim gut tingting bilong mi.

V. N., long Amerika

Tingting Nabaut  Mi gat 11-pela krismas na mi laik tok tenkyu long yupela long stori “Ol Yangpela i Laik Save . . . I Gat Rong Long Tingting Nabaut?” (Epril 8, 1994) Olgeta taim mi bin tingting nabaut long stap olsem narapela man em olgeta i save laikim. Stori bilong yupela i bin helpim mi long lusim dispela kain tingting na wok strong long kamap wanpela man olgeta i ken laikim.

J. K., long Amerika

Taim mi kaunim stori yupela i raitim, mi kirap na krai. Mi bin lusim bikpela hap taim long tingting nabaut. Mi bin tingting nabaut long kamap meri i gat biknem, na mi bin tingting nabaut long ol yangpela man na long ol samting bilong maritpasin tu. Na dispela kain tingting nabaut mi bin mekim long ol miting Kristen tu. Pasin bilong tingting nabaut i bin bosim skin bilong mi. Mi bin lusim famili na ol pren bilong mi na go long rum slip bilong mi inap long mi ken stap wanpis na tingting nabaut. Mi save bel hevi na sem long dispela samting mi mekim. Mi pilim tru tok bilong yupela na mi wok long bihainim. Sampela taim mi kisim yet dispela pasin bilong tingting nogut, tasol mi save tingting long ol narapela samting o mekim wanpela wok mi save laikim. Mi mekim olsem na ol tingting nogut i lusim mi. Tenkyu tru long helpim mi.

T. P., long Amerika