Mi Bin Winim Ol Traim Long Saut Esia

ISI isi tingting bilong mi i wok long kam bek, tasol nau mi pilim olsem lek kais bilong mi i dai. Mi tanim het. Gutpela man bilong mi, Henry, i no gat bikpela hap taim moa bilong i stap. Tasol nau i no taim bilong bel hevi. Mi mas pait bilong stap gut long dispela God i bin givim planti samting tru long mipela.

Em Me 17, 1982. Man bilong mi i bin wok olsem wasman bilong raun, na em i save lukim ol kongrigesen bilong ol Witnes Bilong Jehova long Sri Lanka, em ol i mekim tok ples Tamil. Mipela i stap wantaim wanpela kongrigesen i stap longwe long namba wan biktaun Kalambo. Mitupela i raun wantaim long wanpela wilwil, olsem planti i save mekim long dispela kantri, na mipela i laik lukim wanpela wanlotu i stap klostu tasol. Olaman! Wantu, olsem wanpela snek kobra, wanpela trak mipela i no lukim i bamim mipela.

Taim ol dokta i save ol i no inap helpim moa Henry, ol i mekim ol samting bilong helpim mi tasol. Maski skin bilong mi i no gat strong, mi save mi mas tokim ol hariap long strongpela laik bilong mi long bihainim lo bilong Jehova na abrusim blut. (Aposel 15:​28, 29) Liklik hap strong bilong mi i stap yet na mi tok: “Hap pepa i kam plis.” Mi hatwok, tasol mi raitim ol bilip bilong mi na sainim pepa. Nau wanpela kain pait i kirap.

Pastaim ol dokta i givim liklik helpim long mi. Ol i lukim olsem mi bin kisim bikpela bagarap. Bikpela tingting bilong mi long dispela taim​—mi laik bihainim pasin Kristen tru; i no taim yet bilong krai.

Ol i Laik Givim Blut

Inap 9-pela de wanpela tok pait i go i kam​—mi strong long sakim blut bilong bihainim maus bilong bel, na ol dokta i strong long subim mi long kisim. Maski ol inap mekim, ol i no laik katim mi sapos mi no kisim blut. Skin bilong mi i gat bikpela bagarap, na ol i mas stretim hariap.

Tasol i no mi wanpela i bin karim dispela hevi​—long olgeta taim Jehova i bin stap wantaim mi. Na ol brata sista i bin kamapim bikpela sori bilong ol long mi. Kalambo i stap longwe inap 400 kilomita. Dokta Perrin Jayasekera, em wanpela Witnes, em i bin stretim tok wantaim brata wanblut bilong em​—em wanpela dokta bilong katim man​—bilong ol i ken kisim mi long Haus Sik Kalambo Jeneral.

Mi sindaun long baksait bilong wanpela ka na inap 24 aua mipela raun long ol rot nogut, na i olsem dispela i longpela raun tru, winim ol narapela raun bilong mi long bipo. Tasol long bel bilong mi, mi tenkyu tru long Jehova i tingim mi na lukautim mi kirap long taim mi bin kisim tok i tru long as ples bilong mi, India, na i kam inap long nau. Tasol nau i no gat wanpela wanblut i stap wantaim mi. Pastaim tru, wanem samting i bin kirapim mi long kam long Sri Lanka?

Mi bin kamap long provins Kerala, long India, na papamama i bilong lotu Katolik. Mipela save mekim tok ples Malialam. Mi bin lainim tok Inglis long skul na mi amamas tru mi bin lainim gut! Long dispela hap bilong India, bikpela lain ol i tok ol i Kristen. Stori bilong ol tumbuna i tok, aposel Tomas i bin kisim lotu Kristen i kam long Kerala long taim bilong ol aposel. Fotin handet yia samting bihain, taim Vasko da Gama i kisim sampela strongpela lain Katolik bilong Potugal i kam bilong daunim ol Kerala, ol i kirap nogut long save planti man i bilip pinis long Krais.

Sampela Bikpela Samting Mi Mas Tingim

Taim ol Witnes Bilong Jehova i helpim famili bilong mi long lainim ol gutpela tok i tru bilong Baibel, mi gat bikpela laik long autim dispela tok long ol man i tok ol i Kristen long hap bilong mi. Olsem na bihain liklik long taim mi dediket na baptais pinis, mi bin kamap wanpela painia​—olsem mi bin mekim wok autim tok long olgeta de. Bilong mekim olsem, mi bin sakim wanpela gutpela wok ol i laik givim mi, em wok tisa long Provins bilong mi yet. Planti yangpela India i putim mak long kisim kain wok olsem, long wanem, ol i ting ol bai kisim gutpela sindaun. Tasol tingting bilong mi i senis nau. Mi laik kisim gutpela sindaun tru, na mi inap kisim sapos mi larim Jehova i lukautim mi.

Tupela yia bihain, i gat narapela samting mi mas tingim. Mi bai redi long go long narapela hap bilong India, em ples i no gat planti man bilong autim tok? Bilong mekim olsem, mi mas lainim narapela tok ples, em tok ples Tamil, na helpim ol man bilong narapela lotu​—lotu Hindu. Tasol mi amamas long mekim, long wanem, long dispela rot mi inap kamapim long Jehova bikpela tenkyu i stap long bel bilong mi. Mi bin kisim bikpela amamas long autim tok long ol dispela lain Hindu, em ol i gat gutpela pasin tru. I no hatwok long ol i bilip olsem yumi stap klostu long pinis bilong Kali Yuga (Taim Nogut), na gutpela samting moa i wetim ol man i bihainim stretpela pasin long nau. Tasol i hatwok moa long helpim ol long save olsem lotu Kristen tru i no olsem ol narapela lotu bilong Wes ol i tok ol i Kristen. Planti taim mi bin opim Baibel i go long Matyu 7:​21-23: “Yupela i no ken ting, olgeta manmeri i save kolim mi, ‘Bikpela, Bikpela,’ ol bai i go insait long kingdom bilong heven. Nogat. Man i bihainim laik bilong Papa bilong mi . . . em tasol bai i go insait long kingdom. Long de bilong bikpela kot bilong God, planti manmeri bai i tokim mi olsem, ‘Bikpela, Bikpela, mipela i bin mekim wok profet long nem bilong yu . . . [na] rausim ol spirit nogut . . . [na] wokim planti mirakel.’ Na . . . mi bai tokaut long ol olsem, ‘Mi no save liklik long yupela. Yupela ol man bilong mekim pasin nogut, yupela klia long mi.’ ” Mohandas Gandhi tu i pilim dispela samting na em i tok: “Mi laikim Krais, tasol mi no laikim tru ol Kristen, long wanem, ol i no save bihainim pasin Krais i bin bihainim.”

Wankain olsem mi bin mekim, planti Hindu i wok long kisim save olsem dispela tok em i trupela tok. Nau ol i lukim planti wanlotu bilong ol i mekim wankain pasin olsem ol lain bilong Wes, em ol i tok ol i Kristen. Tasol ol Witnes i narapela kain tru, na nau planti tausen Hindu i wok long save long dispela.

Nupela Poroman, Nupela Traim

Tupela yia na hap i go pinis. Long 1963 long olgeta hap, ol Witnes Bilong Jehova i bin mekim ol “Gutnius Bilong i Stap Oltaim” Kibung. Wanpela ples kibung em long Nu Deli, long hap not bilong India. Mi no inap lusim tingting tru long dispela kibung! Na long dispela taim mi bin bungim Henry Abraham. Mitupela wantaim i bin wok long painim wanpela poroman i givim bel long lotuim Jehova. Faipela mun bihain mitupela i marit.

Henry i bin skul long Wastaua Baibel Skul Bilong Gileat long Nu Yok na bihain ol i salim em i go bek long as ples bilong em, Sri Lanka​—long dispela hap ol i sot tru long ol man bilong autim tok. Mi laik em i mas kam long India, long wanem, mi ting India i sot moa yet long man bilong autim tok. Tasol nogat. Ol i laik em i mas stap yet long Sri Lanka. Olsem na dispela naispela ailan i kamap ples bilong mi tu. Gutpela tru, long dispela taim mi no gat wok long lainim nupela tok ples, long wanem, planti ol i save long tok ples Tamil na tok Inglis. Inap 18-pela yia mitupela i bin amamas long mekim wok bilong Jehova wantaim i go inap long dispela taim birua i painim mipela.

Orait, mi stap long haus sik long Kalambo, na mi pait yet long stap laip, tasol mi no laik kalapim lo bilong God long blut. Klostu mi bagarap. Mi strong long sakim blut, tasol i no long dispela as na mi laik bagarap, nogat; as bilong en, ol dokta i no wok hariap long helpim mi.

Tupela dokta​—wanpela bilong lotu Buda na narapela bilong lotu Hindu​—ol i wanbel long wok wantaim long helpim mi. Nau mak bilong blut bilong mi i go daun tru inap long foa.

Mi sot tru long blut, olsem na ol dokta bai katim na rausim lek bilong mi olsem wanem? Tupela dokta i save pinis long strongpela tingting bilong mi, tasol bai ol i bihainim laik bilong mi o nogat? Pasin ol i bin mekim em i nambawan tru. Ol i strongim bel na ol i no surik long katim lek bilong mi, na ol i no wok long subim mi long kisim blut. Lek bilong mi i lus, tasol laip bilong mi i no lus, na mi stap gut yet long Jehova.

Gutpela man bilong mi i lus na nau mi stap wanpis​—em bikpela senis i kamap long i stap bilong mi. Mi inap autim tok yet​—pastaim mi save holim tupela stik wokabaut, na bihain, long pasin sori planti brata sista i helpim mi long kisim wanpela gutpela lek giaman. Mi wok strong na isi isi mi daunim bel hevi.

Bai mi go bek long India na stap wantaim ol wanblut i no bilip? Gutpela pasin bilong wanpela meri wanpis long Baibel, em Rut, i soim rot long mi. Mi tu mi laik stap long hap mi inap givim bel olgeta long mekim wok bilong Jehova​—maski nau mi no gat bikpela strong tumas. Mi pilim olsem Sri Lanka em i as ples bilong mi!​—Rut 1:​16, 17.

Wanpela Hap i Gat Hatwok

Ol dispela 11-pela yia i go pinis hariap. Mi bin “wok strong long mekim wok bilong Bikpela.” (1 Korin 15:58) Long Kalambo mi inap mekim bikpela wok long autim tok. I gat planti man bilong ol narapela narapela lotu long dispela hap​—Hindu, Muslim, Buda, Kristen, na sampela moa. Na sampela hatwok i stap yet.

Long olgeta mun mipela sampela i save go na stap wanpela Sarere Sande long wanpela bilong ol taun long hap bilong saut. Long dispela hap i no gat sampela liklik lain Witnes i kamap yet, na planti manmeri i bilong lotu Buda, na ol i mekim tok ples Sinhalis. Mi gat bikpela tingting long helpim ol dispela lain.

Ol lain bilong lotu Buda i lukim pasin bilong ol lain bilong Wes i tok ol i Kristen, na dispela i mekim na ol Buda i no laik bilip long Baibel, wankain olsem ol Hindu long India na long Sri Lanka. Tasol ol as bilip bilong lain Buda, em dispela Etpela Rot bilong stretpela tingting na stretpela pasin, olsem stretpela bilip, laik, toktok, pasin, sindaun, wok, tingting, pasin bilong tingim gut tok long bel, bai yu pilim tru, em save nating bilong ol man bilong graun taim yu skelim wantaim ol lo bilong God long Baibel. Na ol i bin raitim bikpela hap bilong Baibel sampela handet yia paslain long man i kirapim lotu Buda, em Sidarta Gautama.

Buk Kalama Suta i kolim tok bilong Sidarta Gautama taim em i bin toktok wantaim ol Kalama, olsem: “No ken bilipim ol tok yupela i kisim long rot bilong harim harim gen; o ol tok bilong ol tumbuna.” Mi amamas mi inap kirapim tingting bilong ol lain bilong lotu Buda em ol i gat gutpela bel na bai ol i ken save, sapos ol man i bihainim dispela tok long nau, bai i no gat wanpela i bilip long stori nating bilong evolusen o sakim bilip long Man bilong wokim yumi em i stap tru.

Pasin Nogut Klostu Bai Pinis

Ol Witnes Bilong Jehova i laik autim planti gutpela tok bilong Baibel long ol dispela man, olsem pasin nogut​—kalpa vinasha​—bai pinis klostu nau. Yu ken lukim tok profet bilong Baibel long dispela samting long 2 Timoti 3:​1-5, 13. Na tu, mipela amamas long tokim dispela lain, rot bilong abrusim bagarap long dispela taim i no ol lotu bilong Wes o bilong Is, nogat. Olsem 2 Timoti 3:​16, 17 i tok, tok bilong Jehova yet long Baibel, em tasol i rot.

Ol man i bihainim lotu Buda i wok long painim stretpela save. Tasol planti yia bipo, taim Sidarta Gautama i no kirap yet long painim dispela save, Baibel i bin kamapim as tru bilong ol pen na hevi. (Stat 3:​1-19) Tupela tumbuna bilong yumi bilong pastaim ol i bin bikhet na sakim ol stretpela lo bilong God na dispela i kamapim ol hevi, olsem sik na i dai, na dispela i kisim olgeta manmeri, long wanem, ol i gat sin. Planti man ol i tingting planti na ol i gat ol askim, olsem Habakuk 1:3 i tok: “Bilong wanem yu larim ol dispela hevi i kamap? Olsem wanem na yu . . . no mekim wanpela samting?” Gutpela Man i bin wokim yumi, em tasol inap bekim ol dispela askim na wokim rot bilong yumi ken kisim bek dispela samting i bin lus, em laip i stap oltaim. Long nau, planti milion manmeri i bihainim gutpela save i kam long Baibel, na dispela i wok long helpim ol. Narapela hatwok bilong mi long nau, em long lainim tok ples Sinhalis, em bikpela tok ples bilong dispela kantri, bambai mi inap helpim ol man i wok strong long painim stretpela save olsem mi bin painim pinis inap 37 yia bipo.

Mi gat narapela hatwok yet. Ol i wokim yet nupela brens-ofis na ofis bilong tanim tok long Sri Lanka, olsem na ol i mas lainim sampela wokman moa. Isi isi mi wok long lainim wok bilong kompyuta, long wanem, mi wok long Ofis Bilong Akaun long brens-ofis.

Inap 33 yia mi bin mekim wok bilong Jehova olsem painia, na ol dispela yia i olsem liklik hap taim tasol, long wanem, mi laik stap oltaim oltaim na mekim wok bilong em. Planti i bin kam lotuim Jehova wantaim mipela long ol dispela yia, olsem dispela gutpela dokta bilong katim man, em i bin stretim rot bilong mi ken i go long haus sik long Kalambo na ol i ken katim mi. Nau em tu i kamap wanpela Witnes i dediket pinis.

Jehova na ol lain wokboi bilong em long graun i bin helpim mi gut tru. Mi pilim olsem han bilong Jehova i bin lukautim mi na holimpas mi, na mi save gutpela sori bilong Jehova i mekim na em bai tingim Henry. Jehova wanpela tasol inap kirapim bek gutpela man bilong mi na larim mi i bungim em gen, na bai mi inap tokim Henry long ol traim i bin painim yumi long dispela taim, na olsem wanem Jehova i bin helpim yumi long winim.​—Em stori bilong Annama Abraham.

[Piksa long pes 21]

Annama Abraham wantaim man bilong em, Henry

[Piksa long pes 23]

Annama i autim tok long ol wokmeri long wanpela plantesen ti long Sri Lanka