Em Weil? Em Dolfin?—Nogat, Em Wolfin!
Wanpela man long Hawaii i raitim dispela stori bilong Kirap!
TAIM wanpela animal bilong bus i karim pikinini long ples ol man i save lukautim ol animal bilong bus, ol man i save amamas. Tasol Me 15, 1985, i bikpela de long Si Laip Pak long Hawaii.
Mama i laik karim pikinini, em wanpela botol-nus dolfin. Long tok ples Hawaii, nem bilong dispela dolfin em Punahele (‘Gutpela Pren’). Klostu long taim bilong Punahele long karim pikinini, bel bilong en i bikpela tru, olsem na ol man bilong lukautim em i save narapela kain samting i bin kamap long en. Na tingting bilong ol i stret taim Punahele i karim pikinini. Ol i givim nem Kekaimalu long pikinini. Skin na nus bilong Kekaimalu i no olsem bilong dolfin—skin i tudak liklik na nus bilong en i sotpela.
Nau Kekaimalu i opim maus bilong en.
Olgeta botol-nus dolfin i gat 88 tit, tasol Kekaimalu i gat 66 tit, na tit i bikpela tru. Wanem samting i bin kamap?
Long olgeta de mama bilong Kekaimalu i bin insait long ol pilai wantaim sampela dolfin moa, na ol man i save kam long dispela si-pak bilong lukim ol dispela pilai. Punahele i bin mekim ol pilai wantaim wanpela kain weil i gat 18 krismas na hevi bilong en i olsem 900 kilo. Long apinun taim ol pilai i pinis, ol i larim ol dolfin na dispela weil i raun wantaim long wanpela bikpela tang wara.
Long dispela rot pikinini Kekaimalu i kamap—em i hap dolfin na hap weil. Ol man bilong lukautim si-pak ol i amamas tru na kolim dispela narapela kain samting “wolfin.” Mama bilong Kekaimalu i gat 88 tit na papa i gat 44 tit, na Kekaimalu i gat 66 tit. Kala bilong skin bilong Kekaimalu na bikpela bilong en i olsem bilong weil, tasol ol man i save lukautim si-pak i tok, em i gat sampela samting bilong papa na sampela samting bilong mama. Maus i olsem maus bilong dolfin, tasol i sotpela liklik.
I gat wanpela wolfin ol man i save long en i bin kamap long Japan long 1981. Dispela wolfin i bin kamap long wanpela banis bilong lukautim ol pis samting, tasol sampela mun bihain dispela wolfin i dai. Olsem wanem long Kekaimalu? Em bai dai?
Hevi bilong pikinini wolfin Kekaimalu i olsem 16 kilo na skin bilong en i gutpela na em i dring susu olsem ol pikinini dolfin i save mekim. Bihain liklik long Kekaimalu i kamap, nius Honolulu Star Bulletin and Advertiser i tok: ‘Ating dispela wolfin i no inap i go bikpela olsem ol dolfin tru o weil tru. Taim mama i karim kain pikinini olsem, ol i save dai long bel na mama i karim em, o em i kisim sik taim em i yangpela yet na em i dai. Gutpela tru, Punahele em i wanpela gutpela mama dolfin na em i bin karim na mekim bikpela long tupela pikinini long si-pak.’ Wanpela meri i wok long si-pak i tok: ‘Maski Punahele i mas mekim wanem, em inap mekim. Em i wanpela gutpela mama.’ Punahele i gat nem olsem em i wanpela gutpela mama, na tru tumas, dispela tok i stret.
Kekaimalu i stap yet na em i gat 7-pela krismas pinis. Hevi bilong en i olsem 300 kilo, na skin bilong en i bikpela, winim mama bilong en. Inap sampela yia em tu i insait long ol pilai, tasol taim em i gat 5-pela krismas wanpela samting i kamap i no bin kamap bipo. Long Jun 1990 Kekaimalu i kamap wanpela mama. Planti man i ting dispela samting i no inap kamap. Wanpela meri, em Marlee Breese, em i tok: ‘Planti man i ting wanpela animal o pis i no gat wankain papa o mama i no inap karim pikinini. Tasol Kekaimalu i no olsem—em inap karim pikinini.’ Sori tru, namba wan pikinini bilong Kekaimalu i bin stap wanpela wik tasol na em i dai.
Kekaimalu i no gat save long givim susu long pikinini, olsem na pikinini i dai. Marlee Breese i no ting as bilong dispela i olsem Kekaimalu em hap weil na hap dolfin, nogat. Em i ting Kekaimalu i yangpela yet, olsem na em i no gat save long givim susu long pikinini. Dispela meri i tok: ‘Ol dolfin i save karim pikinini taim ol i gat 8-pela i go inap 10-pela krismas.’ Kekaimalu i gat 5-pela krismas tasol taim em i karim namba wan pikinini bilong en.
Long Novemba 8, 1991, Kekaimalu i karim namba 2 pikinini bilong en. Tasol ol man i wok long si-pak ol i redi bilong helpim Kekaimalu. Ol i was i stap inap 24 aua bilong save, Kekaimalu bai helpim dispela pikinini long dring susu o nogat. Em i no mekim, olsem na ol wokman i pasim rop long Kekaimalu na apim em long wara. Ol i bin mekim wok long wanpela kain pam bilong pulim susu bilong en. Marlee Breese i tok: ‘Namba wan susu bilong mama i bikpela samting, long wanem, i gat planti samting long en olsem marasin bilong helpim pikinini long sakim sik.’ Inap sampela wik long olgeta de, ol wokman i bin rausim olsem wanpela lita susu long Kekaimalu.
Ol i bin tanim susu bilong Kekaimalu wantaim wanpela kain susu ol saveman i bin wokim. Kirap long 6 klok long olgeta moningtaim i go inap long biknait, ol i bin mekim wok long wanpela gumi bilong givim susu long pikinini wolfin. Ol i bin mekim olsem long olgeta 2 na hap aua. Long olgeta de skin bilong pikinini i go bikpela olsem hap kilo. Taim pikinini i no kisim susu, em wantaim mama wolfin na bubu dolfin i bin pilai pilai long bikpela tang wara bilong ol.
Taim mipela raitim dispela stori i olsem dispela pikinini bai stap, em i no ken dai. Na ol man i no save long narapela pikinini olsem dispela—bubu papa bilong en i wanpela weil na bubu mama bilong en i wanpela dolfin. Yumi no save, tasol ating bihain em bai mekim wankain samting em mama na bubu mama na bubu papa bilong en i mekim—em bai mekim ol pilai na ol man i ken kam na lukim. Dispela samting i bin kamap long Punahele i helpim yumi long save, ol samting God i bin wokim, em inapim ol long kamap kain kain insait long famili bilong ol.
[Piksa long pes 15]
Wanpela wolfin wantaim sampela dolfin
[Kredit Lain]
Monte Costa, Sea Life Park Hawaii