Pas Bilong Ol Man
Laikim Tumas Mani Tenkyu tru long stori “Laikim Tumas Mani—Em As Bilong Planti Hevi.” (Disemba 8, 1994) Long kantri bilong mi pasin stil, brukim haus bilong ol narapela, na pasin bilong mekim nogut long man long ples klia i go bikpela—em ol i mekim olsem bilong kisim mani tasol. Olsem na dispela nius i kamap long taim stret na i gat gutpela tok tru, na mi kisim bikpela amamas tru long tilim dispela nius long ol narapela. Sampela lain bilong baim bret i go long ol man, ol yet i pait bilong kisim ol dispela nius, long wanem, ol nius bilong mi i no inap!
A. F. S., long Wes Afrika
1914 Nau tasol mi bin kaunim ol stori bilong yupela “1914 Gan i Pairap na Hevi i Stap Yet.” (Ogas 8, 1995) Mi laik tok olsem mi no bin kaunim wanpela stori i tokaut klia long wanpela bikpela samting planti man i save tok pait long en olsem dispela stori yupela i bin raitim. Ol skul long kantri bilong mi i no save lainim mipela tumas long ol stori bilong ol bikpela pait bilong olgeta hap i bin kamap long bipo. Tasol taim mi kisim save long Namba Wan Pait, em i helpim mi long save gut long ol samting i wok long kamap nau long dispela graun.
W. S., long Veneswela
Ol Spot Bilong Kisim Amamas Long stori “Ol Yangpela i Laik Save . . . Ol Spot Bilong Kisim Narapela Kain Amamas i Gutpela Mi Traim?,” yupela i bin mekim gutpela wok tru long raitim na long tokaut long ol birua ol yangpela inap kisim long kain spot olsem. (Me 8, 1995) Sampela de bihain long taim mi kaunim dispela stori, wanpela nius long redio (British Broadcasting Corporation) i bin tok olsem, 4-pela yangpela i kisim bikpela bagarap tru long ai bilong ol, long wanem, ol i bin insait long spot bungee jumping. Tenkyu tru long gutpela nius bilong yupela.
D. F., long Inglan
Dispela stori long ol spot man inap kisim bagarap long en i mekim na tingting bilong mi i kirap tru! Wanpela taim mi bin wokabaut i go antap long wanpela maunten ston na mi no inap wokabaut i kam daun gen o long go antap moa. I kam inap long nau mi save pret tru taim mi tingim bek dispela samting i bin painim mi na klostu mi bagarap. Em wanpela longlong pasin mi bin mekim, na sapos bagarap i bin painim mi bai i olsem mi lusim nating laip bilong mi!
L. T., long Amerika
Mi bin pilim tru dispela stori. Long hap mi stap long en, ol manki i save insait long planti kain spot bilong kisim narapela kain amamas olsem. Ol i save mekim traim long subim mi long mekim wantaim ol. Long ol stori bilong nius, planti taim mi save harim ol ripot long man i dai o kisim bikpela bagarap long ol dispela spot ol i save tokim mi long en na ol i ting em spot bilong kisim amamas. Bihain long taim mi kaunim dispela stori, mi save, mi no bihainim gutpela tingting sapos mi insait long wanpela spot bilong kisim narapela kain amamas inap sotpela taim tasol na bagarapim laip bilong mi, em laip God Jehova i givim long mi.
J. S., long Amerika
Susu Bilong Mama Tripela mun bihain bai mi karim namba tu pikinini bilong mi. Olsem na taim mi kisim Kirap! bilong Jun 8, 1995, na opim i go long stori “Susu Bilong Mama,” mi amamas tru. Em i gutpela samting tru long kaunim wanpela stori i litimapim biknem bilong Man bilong givim laip long yumi. Taim yumi lukim ol mama em Man bilong wokim yumi i bin inapim gut ol long lukautim gut pikinini bilong ol, mi no save olsem wanem wanpela man inap tok, i no gat wanpela man i gat gutpela tingting na pasin sori i bin wokim yumi.
L. K., long Amerika
Mi ting bai yupela kisim planti pas bilong tok tenkyu long dispela stori. Taim mi tingting i go bek long taim mi givim susu long ol 3-pela pikinini bilong mi, mi ting dispela i olsem wanpela blesing mi kisim taim mi bihainim dispela gutpela rot. Mi save dispela stori bai strongim olgeta mama na husat ol bai kamap mama long bihain.
C. S., long Amerika