Pas Bilong Ol Man

Resis Long Kisim Mani Mi yangpela na mi save kaunim Kirap! Mi kirap nogut long ol stori “Resis Long Kisim Mani​—Olsem Wanem Long Dispela?” (Disemba 8, 1994) I olsem ol wanlain bilong mi i tingting long winim wanpela mak tasol​—kisim planti mani. Tasol long bihainim ol samting Jehova i skulim yumi long en i gutpela moa, winim pasin bilong givim bel long ol samting inap bagarap.

K. R., long Frans

Nau tasol mi kaunim ol dispela stori na yupela i stori gut long dispela samting. Mi no bin save olsem ol man i wok leba, na famili bilong ol, ol i stap nogut tru na karim bikpela hevi long nau. Bel bilong mi i pilim tru hevi bilong ol.

G. M., long Amerika

Yupela i stori stret long ol samting bilong ol man i wok planti planti aua long bikpela san long wok leba na ol i kisim liklik mani tasol. Sori tru tingting bilong sampela man long ol dispela man i wok leba i kranki olgeta​—ol i no ting ol i man wankain olsem yumi na ol tu i pilim hevi. Tru tumas, man “i wok long daunim ol arapela manmeri na mekim nogut long ol”!​—Saveman 8:9.

K. V., long Amerika

Sik AIDS Mi bin kaunim stori bilong yupela “Helpim Ol Man i Gat Sik AIDS.” (Disemba 8, 1994) Mi gat dispela sik na mi no inap bilipim tok bilong yupela. Famili bilong mi i bin krai na bel hevi stret long pasin ol man i mekim long givim baksait long mi.

B. J., long Amerika

Mipela pilim tru hevi bilong ol man i gat kain sik olsem. Stori bilong mipela i laik kamapim ol samting ol man i ken mekim bilong helpim man i gat sik AIDS, na skelim dispela wantaim tingting bilong planti man. Lo God i givim long Israel i strong long ol i mas mekim sampela samting bilong lukautim skin bilong ol na ol i no ken sik tumas, olsem na mipela i ting i stret long kamapim sampela samting ol man i ken mekim bilong lukautim skin bilong ol yet taim ol i stap klostu long wanpela man i gat dispela sik. (Skelim wantaim Wok Pris 13:​21, 33.) Mipela i bin tok “ating yumi no ken pret long stap klostu long man i gat sik AIDS.” Tasol planti man i pret yet, maski ol dokta i ting yumi no ken kisim sik AIDS taim yumi stap klostu long wanpela man i gat dispela sik. Olsem na mipela i bin strongim bel bilong ol man i gat sik AIDS long pilim tingting bilong ol man long dispela sik na ol i no laik go klostu long ol, holim ol, o kis long ol. Man i no gat dispela sik, em laik bilong em yet long em i laik go klostu long man i gat sik AIDS o nogat. Tasol olgeta Kristen i mas laik long mekim gutpela pasin na marimari na sori long man i gat dispela sik.​—Edita.

Long pasin sori yupela i raitim stori long dispela sik na mi amamas long kaunim. Na mi amamas long kaunim tok bilong yupela olsem yumi mas “mekim sampela samting” bilong was gut, tasol yumi mas sori na helpim man i gat dispela sik.

M. H., long Amerika

Ol Piksa Komik Mi laik tok tenkyu long yupela long stori “Ol Piksa Komik Bilong Pait Inap Bagarapim Yumi?” (Oktoba 8, 1994) Mi gat 8-pela krismas na bipo mi save lukim ol dispela kain piksa komik. Tasol taim mi kaunim nius bilong yupela, mi save ol dispela kain piksa komik i no gutpela, na nau mi no lukim ol moa.

L. T., long Itali