Hipopotamus i Helpim Narapela!

HEVI bilong hipopotamus i olsem 4-pela ton​—wanpela animal tasol i winim hevi bilong en. Em i gat strongpela maus. Sapos em i kaikaim wanpela kanu wanpela taim tasol, em inap brukim. Olsem na taim sampela man i raun long Wange Nesenel-Pak long Simbabwe, ol i kirap nogut tru long lukim wanpela hipopotamus i mekim wanpela samting i no pasin tru bilong en.

Ol dispela man i stap klostu long wanpela banis bilong pasim wara na ol i lukim 9-pela weldok i raunim tupela impala. Impala i no gat rot, olsem na ol i sut i go insait long wara. Ol dok i ran nabaut arere long wara bilong painim ples ol i ting tupela impala bai kam antap long en.

Bihain, wanpela impala em skin i no gat strong moa, em i subim wara i go long wanpela hap i longwe liklik​—em i no save ol dok i wet i stap long dispela hap. Taim dispela impala i kam klostu long nambis ol man i lukim wanpela hipopotamus i stap klostu, i subim wara i go long impala. Wanpela nius (African Wildlife) i tok, taim hipopotamus i kamap long impala, ‘isi isi em i subim impala long baut na makim olsem em i mas subim wara i go long narapela hapsait.’ Impala i mekim olsem. Hipopotamus i bihainim impala na taim impala i no strong, isi isi hipopotamus i subim em.

Taim impala i kam klostu long nambis ol man i lukim hipopotamus i subim isi isi impala long kamap long nambis. Impala i wokabaut liklik, sanap na skin i guria. I no longtaim tumas na impala i wokabaut i go. Hipopotamus i bihainim em inap long ol man i no inap lukim tupela moa.

Wanem samting i painim narapela impala? Ol man i tok, ai bilong ol dok i pas tru long lukim hipopotamus i helpim dispela wanpela impala, olsem na rot i op bilong narapela impala i ken ranawe.