Kam Raun Wantaim Mipela Long Wara Sobe

MAN BILONG NIUS KIRAP! LONG SAUT AFRIKA I RAITIM

MIPELA i sindaun long wanpela bot long Wara Sobe, em i stap long hap namel tru bilong Saut Afrika. Em i gutpela taim tru bilong taim malolo bilong mipela. Mipela i harim wara i paitim arere bilong bot, taim sampela pasindia moa i kalap. Mipela i pilim gutpela win tru i kamap na i meknaisim ol pitpit i stap long arere bilong wara. Mipela i amamas, long wanem maski Afrika i gat bikpela san, tasol ol sno i haitim san.

Wanpela meri nem bilong em Jil, em i manesa long wanpela haus pasindia na wok bilong em i bilong stretim rot bilong ol manmeri long i go long dispela kain raun long bot. Jil i tok: “Mi ting bai ol elefan i kam bilong kisim wara olsem ol i save mekim long olgeta taim.” Mipela i laikim olsem tu. Planti man i save long Wara Sobe, long wanem i gat planti ol elefan i stap long dispela hap. Long hap not bilong Botswana, na i kam arere long Wara Sobe i gat samting olsem 45,000 elefan i stap long en​—em i bikpela namba tru winim ol narapela hap bilong Saut Afrika. Jil i tok: “Bikpela ren i kam daun olsem na mipela i no lukim sampela elefan inap 3-pela de nau.”

Tasol Wara Sobe i gat planti ol narapela samting moa bilong lukim. Long wanpela plet long bot i gat 4-pela pis i dai pinis. Kepten bilong bot em Rainford, em i bilong Botswana na em i tok: “Planti taim mipela i bungim ol tarangau bilong kaikai pis ol i wetim mipela i tromoi ol pis long wara.” Olsem wanem? Mipela inap kisim sampela piksa taim wanpela tarangau i kam daun bilong kisim pis, o nogat. Mipela i lukim narapela bot nem bilong en Tarangau Bilong Kaikai Pis (The Fish Eagle) i karim sampela moa ol manmeri i kam lukluk raun, nau bel bilong mipela i skrap tru long lukim ol samting. Bot mipela kalap long en em Mosi-Oa-Tunya, long tok Afrika em i makim wanpela bikpela wara kalap ol i kolim Victoria Falls. Wara Sobe em i ron i go bungim bikpela wara Sambisi na bihain i go long dispela bikpela wara kalap em i longwe inap olsem wanpela aua samting sapos yumi kirap long hia na draivim ka i go.

Bihain bot Mosi i luslain na i go, orait mipela i lukluk long kompas bilong lukluk longwe na mipela i lukim ol elefan. Sori tumas, mipela i stap longwe yet na ol i go bek long bus. Dispela meri i soim rot long mipela em Sandi, em i tok: “Inap tripela wik i go pinis mipela i lukim planti handet elefan.” Bihain narapela samting i pulim ai bilong mipela. Mipela lukim 6-pela animal ol i kolim kudu​—em i wanpela kain dia i gat tupela kom​—ol i sanap arere long wara na ol i lukluk i stap. Sapos wanpela ka i kam klostu long ol planti taim ol i save ranawe. Sandi i tok moa olsem: ‘Ol i no pret tumas taim ol i lukim wanpela bot.’

Strongpela krai bilong wanpela kain pisin i sotim naispela krai bilong balus. Em wanem kain pisin? Wanpela buk (Elephants of Africa bilong Anthony Hall-Martin) em i tok olsem: “Krai bilong tarangau bilong kaikai pis i save go longwe tru na oltaim i kamap long Wara Sobe. Fopela bilong dispela naispela pisin ol i sindaun long diwai i sanap klostu long wara na ol i lukluk long mipela. Kwiktaim mipela i kisim kamera na redi i stap taim Sandi i tromoi wanpela pis long wara. Wantu namba wan pisin i lusim ples sindaun bilong en na i spit i go daun klostu long mipela. Bihain mipela harim wara i pairap taim em i hukim pis long pinga bilong lek bilong en. Em i paitim strongpela wing bilong en, na i lusim wara i kam antap na em i singaut amamas olsem​—WAOU-kayou-kwou, long wanem em i kisim pinis abus. Mipela i kirap nogut long wanem ai bilong en, na ol pinga bilong lek, na strong bilong nek, na tupela wing, olgeta i wok gut wantaim, maski kru bilong het i liklik tasol. Antap long bot i no gat wanpela pairap, ol kamera tasol i wok long pairap, na pisin i kalap i go daun tripela taim moa.

Bot i ran yet na mipela i lukim wanpela lain elefan inap olsem 26 olgeta, ol bikpela wantaim ol liklik i pilai long wara. Mi lukluk long ol i stap na mi tingim tok bilong wanpela buk (The Lions and Elephants of the Chobe) em i tok: “Taim ol elefan i inapim pinis nek drai bilong ol, ol elefan i bikpela pinis i pulimapim wara long nus bilong ol na i kapsaitim long ol liklik elefan. Ol yangpela elefan na ol elefan man tu ol i waswas long wara na bai yu inap lukim nus bilong ol tasol i kam antap long wara bilong pulim win. Ol pikinini elefan i amamas tru na ol i kalap nabaut nabaut. Ol i dring wara pinis na em taim bilong pilai na tantanim long graun malumalum. . . . Bihain ol mama elefan i singaut long olgeta i mas lusim wara na i go.

Bot i bikpela na i gat tupela plua, olsem na taim mipela kam klostu long ol dispela lain elefan ol i no stap isi​—ol i kirap na i go, tasol pastaim long ol i go, kwiktaim mipela kisim sampela piksa.

I laik apinun nau, tasol Wara Sobe i gat sampela samting moa bilong lukim. Ples wesan nating bilong Kalahari i gat bikpela das tru, olsem na taim san i go daun antap long wara em i olsem wanpela gutpela piksa tru. Tu, long apinun ol traipela animal bilong wara ol i kolim hipopotamus i lusim wara na i kam antap, long wanem nait em taim bilong ol long painim kaikai. Mipela i stap long bot, olsem na mipela i no pret long i go klostu tru long ol.

Taim bot i ran i kam, mipela i harim singaut bilong ol hipopotamus na mipela i save mipela kamap klostu long wanpela raunwara ol hipopotamus i stap long en. Em nau, tupela hipopotamus i kam antap long wara, long arere arere bilong bot. Wantu narapela i laik pait long narapela na maus bilong ol i op nogut tru​—maus em i bikpela inap long wanpela man i ken brukim skru na sindaun insait long en. Narapela hipopotamus em i stap klostu long ailan na em i wokabaut i kam olsem long mipela. Man! Em i traipela nogut tru na traipela bodi bilong em i pasim ai bilong kamera. Nau em i go insait long wara i daun tru, na em i putim het i go pas insait long wara, tasol baksait bilong en i stap ples klia. Bihain em i rausim win long wetlewa bilong en, na nau em i daunim bodi olgeta i go insait long wara.

Nupela samting mipela i kisim save long en i olsem: Maski hevi bilong wanpela hipopotamus em inap olsem 4-pela ton, tasol em i raun gut tru insait long wara na hevi bilong en i olsem samting nating tasol. Long wanpela buk (The Life of the Hippopotamus, bilong Bradley Smith) i tok: “Wanpela hipopotamus em inap subim wara hariap tru winim planti pis em ol i liklik tasol long ol hipopotamus, na sapos wara i klin gut tru yu inap lukim em i subim wara na em i spit tru aninit liklik long wara.” Man i Wokim Olgeta Samting em i tok stret taim em i tok:

“Yu go lukim ol traipela animal ol i kolim hipopotamus. Mi yet mi bin wokim ol na mi bin wokim yu tu. Ol hipopotamus i save kaikai gras olsem ol bulmakau. Bodi bilong ol i bikpela na ol i gat bikpela strong. Na bel na baksait bilong ol tu i gat bikpela strong moa yet. Taim tait i save kamap na wara i ran strong, ol i no save pret. Maski tait i kam antap inap long maus bilong ol, ol i stap isi tasol.” (Jop 40:​15, 16, 23) Ol dispela samting i gat ‘bikpela strong’ i raunim yumi i stap na dispela i mas kirapim yumi long daun long Man i bin wokim ol. Baibel i tok: “Taim ol i was i stap, husat inap holimpas ol? Na husat inap wokim trap bilong hukim nus bilong ol na kalabusim ol?” God Jehova i tok olsem bilong kirapim tingting bilong yumi olsem yumi ol man i no gat bikpela strong olsem ol dispela animal.​—Jop 40:24.

Mipela i laik tru long lukim san i go daun, na tu mipela i laik lukim ol hipopotamus. Olsem na taim ol i tok long mipela i go bek, mipela i sori tru. Bihain taim mipela i stap long liklik haus kunai klostu long wara, mipela i lukim gutpela kala bilong skai i senis i kamap retpela, na i gutpela tru taim ol dispela kala i holim wara. Mipela i stori liklik long planti gutpela samting mipela i bin lukim long san. Sandi em i tok: “Sapos yupela laik go klostu tru na lukluk long ol kain kain animal, yupela ken kisim wanpela liklik bot i gat mota.” Mipela i mekim olsem Sandi i bin tok​—mipela i baim wanpela bot olsem sata samting.

Yes, olsem Sandi i bin tok, nau mipela inap lukluk long ol kain kain animal, wanpela hipopotamus tasol em i birua na mipela i no go klostu long en. Na mipela inap putim han long ol pitpit bilong wara na ol plaua bilong wara. Mipela i lukim ol liklik pisin i raun antap na i painim ol liklik pis bilong kaikai. I gat ol narapela pisin i gat ol naispela naispela kala bilong ol na ol i flai nabaut i stap. Na i gat ol kain kain bikpela pisin bilong wara i stap long ol liklik ailan long dispela wara. Mipela abrusim wanpela hap diwai i gat sampela bilong ol dispela pisin bilong wara ol i sindaun long en.

Bihain mipela kamap long hap mipela i bin lukim wanpela lain elefan olsem long asde. I gat wanpela elefan man tasol i sanap long wara na em i givim baksait long mipela na i wok long dring na kaikai i stap. Stret long mipela i laik go nau, mipela i lukim wanpela mama elefan wantaim tupela liklik ol i kam ausait long bus. Taim mama i lukim mipela em i sanap na mipela i tingting, bai ol i kam o nogat? Em nau, em i bringim tupela liklik i kam. Mipela i amamas tru long lukim tripela wantaim ol i ran i kam klostu long mipela.

Long buk bilong Aiken em i stori moa long ol laion na elefan olsem: “Nek drai bilong ol dispela bikpela animal i moa yet . . . ol i stap longwe hap tru, tasol ol i wokabaut wantaim tuhat na long bikpela san bilong kam painim wara. Taim ol i kam klostu long hap i gat wara, ol i spit nogut tru, lusim bus na ran i kam long ples bilong dring wara. Na maski wara i stap longwe yet inap olsem 35 o 80 mita, ol i harim smel bilong wara na ol siksti i kam.” Mipela i lukim tripela wantaim ol i sanap, pikinini i stap namel na mama bilong en na narapela ol i was long arere arere, na ol i dring. Em apinun pinis, olsem na nau mipela i mas go bek hariap, nogut tudak i painim mipela.

Mipela lukim planti elefan na ol narapela animal tu i stap, olsem ol bikbel, na ol kain kain dia, na monki, na ol pik bilong bus. Mipela i tok tenkyu tru long Man i bin wokim ol dispela animal, ol i narapela narapela kain na em i putim ol long hap i stret na i gutpela long ol. Long taim bilong bikpela san, bai yu lukim ol pisin na ol kain kain animal, olgeta i kam bung long dispela wara, na ol bikpela animal olsem laion, na lepet, na raino tu ol i stap.

Maski yu stap longwe tru long dispela hap bilong Afrika, mipela i pilim olsem yu bin raun wantaim mipela na nau yu inap save long wanem ol gutpela samting ol man i kam long wara Sobe ol bai lukim.

[Piksa Kredit Lain long pes 24]

All wood engravings: Animals: 1419 Copyright-Free Illustrations of Mammals, Birds, Fish, Insects, etc. by Jim Harter