Sampela Tok i Kam Long Olgeta Hap
Ol i No Bilip Moa Long Gavman
Wanpela nius (The Washington Post) i tok: ‘Long olgeta hap ol man i no bilip moa long gavman, na long planti man dispela tok “gavman” i olsem wanpela tok nogut.’ Dispela nius i kamapim tok bilong sampela ripot bilong sampela yia i go pinis na i tok: ‘Kirap long Kanada i go long Japan na long ol kantri i stap namel, planti man i tokim ol man i skelim ol samting bilong gavman, ol i no bilip moa long gavman bilong ol, na ol wok bisnis i bagarap, na ol hevi i no ken pinis, ol bai go bikpela moa.’ Long olgeta wan handet wan handet man long Frans, 60 i tok, bihain ol samting bai go moa nogut na ol i no amamas long ol samting gavman i mekim bilong lukautim kantri. Long olgeta wan handet wan handet man long Itali, 75 i tok, gavman bilong nau i no wok gut olsem bipo, olsem long 5-pela o 10-pela yia i go pinis. Long Kanada winim 50 pesen bilong ol man ol i ting ol lain i kamap bihain bai karim bikpela hevi long mani, winim hevi bilong nau.
Ol Man i Bel Hevi Long Ol God Bilong Ren
I gat bikpela san long wanpela hap bilong saut-is India, em Andra Prades, olsem na gavman bilong dispela provins i bin mekim narapela kain pasin bilong kamapim ren. Nius India Today i tok, gavman i baim ol pris bilong mekim pasin tumbuna bilong mekim gut long ol god bilong ren. Wanpela minista bilong gavman i tok: ‘God bai helpim yumi.’ Gavman i makim sampela pris bilong 50 haus lotu bilong mekim sampela pasin bilong lotu inap 11-pela de. Wanem samting i kamap? Nius India Today i tok: ‘Samting ol dispela pris i mekim ating ol god bilong ren i no amamas long en. Lotu i lus tru long mekim dispela wok, olsem na nau Gavman i tingting long mekim sampela samting bilong saiens. Gavman i kirap na mekim sampela samting long sno bilong antap bilong kamapim ren.’
Ol i Mekim Wok Long Dok
Ating ol nius i no save stori tumas long ol liklik hul i save kamap long ol paip i stap insait long wara o graun na ol marasin nogut i wok long kapsait i go insait long wara o graun. Ol i save toktok tasol long ol bikpela hevi olsem wel bilong sip i kapsait i go long solwara. Tasol nius National Geographic i tok, maski ol hevi i stap hait, ol bikpela kampani i save lusim planti milion kina long olgeta yia. Na maski ol man i no lukim dispela hevi, samting dispela hevi i kamapim i bagarapim win na wara na graun. Wanpela kampani long Kanada i save stretim dispela hevi long narapela kain rot. Ol i save mekim wok long ol dok. Maski ol hul long paip i liklik tru olsem het bilong pin, nus bilong ol dok Labrado i gutpela tru bilong harim smel bilong wel o ges o narapela marasin i stap insait long paip na kapsait i go insait long wara o graun. Taim kampani i ting marasin i kapsait long wanpela paip, ol i save pamim wanpela kain marasin i gat smel nogut i go insait long wanpela hap bilong dispela paip. Nau ol dok i kirap na mekim wok bilong ol. Nius Geographic i tok: ‘Maski paip i stap 5 mita insait long wara, ol dok inap harim smel bilong marasin nogut i kapsait. Long wanpela ples tais long Luisiana ol paip i stap olsem 1.8 mita insait long wara na 1.5 mita insait long graun, tasol maski olsem, ol dok i sanap long ol liklik bot ol i harim smel bilong marasin nogut i kapsait. Planti kampani long olgeta hap i laik kisim ol dispela dok.’
Bikpela Wok Bisnis Long Smok Long Rasia
Wok bisnis long smok i kamap bikpela bisnis tru long Rasia na long ol narapela hap bipo Soviet Yunion i bin bosim. Nius Maclean’s bilong Kanada i kamapim dispela ripot. Long kantri bipo ol i kolim Soviet Yunion i gat 70 milion manmeri i smok, em 25 pesen bilong olgeta manmeri long dispela hap. Ol i save smok 350 bilion smok long olgeta yia. Bipo Soviet Yunion i bin tambuim ol kampani long toksave long smok bilong grisim ol man long baim, tasol dispela lo i pinis. Olsem na planti kampani bilong Wes i save mekim wok bisnis long smok i save kamapim tok gris bilong ol long redio, televisen, niuspepa, nius, na long ol bikpela notisbot bilong grisim ol man long baim smok bilong ol. Pe bilong ol smok bilong Wes i antap tru long pe bilong ol smok bilong Rasia, tasol planti man i amamas long baim maski i gat bikpela pe, long wanem, taim ol i pulim smok bilong Wes i olsem dispela samting i givim biknem long ol. Dispela nius Maclean’s i tok: ‘Gavman i tok, long olgeta yia 500,000 man bilong Rasia i save kisim sik kensa long wetlewa bilong ol o narapela sik smok i as bilong en.’
Ol i Tok Hamas Man Bai Go Long Bikpaia
Planti man i no amamas long tok bilong lotu Sauten Baptis long Alabama, Amerika. Dispela lotu i bin kamapim wanpela ripot i tok olsem: Long olgeta manmeri i sindaun long Alabama, 46.1 pesen bilong ol bai go long bikpaia taim ol i dai, em bikpaia ol Baptis i bilip long en. Wanpela nius (The Birmingham News) i kamapim dispela ripot i bin stori long hamas man long olgeta wan wan distrik i no inap abrusim bikpaia. Wanpela lain (Associated Press) i tok, pastaim ol Baptis i bungim namba bilong ol man bilong lotu bilong ol long olgeta wan wan distrik, na bihain ol i mekim wok long ‘wanpela tok hait’ bilong kisim save long hamas man bilong ol narapela lotu ol i ting ol tu bai go long heven. Ol man i save ritim nius The Birmingham News i no amamas na sutim tok long dispela ripot. Wanpela man i raitim pas olsem: ‘Em i pasin hambak nogut tru bilong dispela lotu long tok hamas man i no inap abrusim bikpaia.’
Pasin Giaman na Konpesio
Tupela man bilong Itali i save raitim ol buk, ol i bin giaman taim ol i go lukim planti pris Katolik bilong askim ol long lusim rong bilong ol. Tupela i tok giaman olsem ol i man bilong mekim wok politik o wok bisnis na ol i bin mekim pasin giaman long paulim mani samting. Bihain tupela man hia i tokaut long ol samting ol pris i bin tokim ol long mekim. Wanpela nius (La Repubblica) i tok: ‘Misin i ting tupela man bilong raitim buk i bin bagarapim ol samting i holi, na misin i sutim tok pinis long ol na ating ol i raus pinis long misin.’ I gat 36,000 pris Katolik long Itali na dispela nius i tok, samting tupela man i bin mekim ‘i save kamapim klia olsem tingting bilong planti pris i paul, na ol i sot long sampela save, na maski man i mekim bikpela rong ol pris i no givim strongpela tok bilong stretim em. I olsem ol pris i tingting tasol long ol sin man i mekim long maritpasin samting, ol i no tingim ol narapela sin i save bagarapim sindaun bilong ol man.’ Wanpela bilong tupela man bilong raitim buk, em Pino Nicotri, em i tok, long olgeta 49 pris em i bin go long ol na kamapim ‘konpesio’ giaman, wanpela tasol i no laik lusim sin bilong em na em i tokim em long tokaut long polis long samting em i bin mekim. Nius La Repubblica i tok moa olsem: ‘Long tingting bilong ol narapela pris pasin bilong givim o kisim gris mani i no wanpela sin, o pasin bilong tokaut long kot i no inap helpim em. Em i mas tingting long wanpela samting tasol—God i mas lusim rong bilong em.’
Ol Gutpela Samting i Painim Man i Save Helpim Skin Bilong Em
Wanpela nius bilong Jemani (Nassauische Neue Presse) i kamapim tok bilong sampela saveman taim ol i skelim ol samting tingting i mekim long skin na skin i strong long pasim ol sik o nogat. Nius i tok: ‘Skin bilong man i no inap strong sapos bel na tingting bilong em i no stap isi, tasol amamas i save kirapim skin long strong long sakim ol sik.’ Sapos long ples wok o long famili man i harim ol tok i daunim narapela, dispela inap mekim na skin i no gat strong long pasim ol sik. Wanpela profesa (Dr. Anton Mayr) i tok, taim man i strongim bel na em i no tingting tasol long ol hevi, em i tingim ol gutpela stori o ol gutpela samting i kamap, dispela inap strongim skin bilong em. Profesa i kamapim sampela samting bilong helpim skin bilong man, olsem: ‘Bilip, wetim gutpela samting bai kamap, pasin sori, bilip long wanpela man, bel isi, toktok gut wantaim ol narapela, sampela kain amamas, na bikpela laik long mekim ol samting na skin i ken strong na stap laip.’
Planti i Winim Hevi
Wanpela saveman bilong pasin bilong dring oltaim na kisim drak, em Arthur Guerra de Andrade, em i tok: ‘Long nau ol samting long Brasil i wok long senis. Bipo ol narapela kantri i save brukim boda bilong Brasil bilong kisim ol drak i go long kantri bilong ol, tasol nau ol man long Brasil yet i wok long kamapim drak na kisim.’ Wanpela nius (O Estado de S. Paulo) i tok: ‘Long olgeta wan handet wan handet man long Brasil, 6-pela i go inap 8-pela i save mekim nabaut long ol drak. Na long olgeta yangpela i gat 12-pela i go inap 16-pela krismas, 90 pesen i bin dring wanpela taim.’ Dispela man Andrade i tok: ‘Insait long 10-pela yia i go pinis, namba bilong ol man i dring na kisim hevi long skin na tingting, i go antap olsem 50 pesen.’ Na long olgeta wan handet wan handet man i kisim birua long ples wok long Brasil, 25 i kisim, long wanem, ol i mekim nabaut long ol drak olsem dring. Tasol Brasil i winim planti kantri moa long helpim ol man i gat dispela hevi long dring oltaim. Long olgeta wan handet wan handet man i wok mani na ol i dring oltaim, 60 i go inap 80 i lusim dring.
Haus Sik i Raun Long Wil
I gat narapela kain haus sik long India bilong helpim ol sikman. Em wanpela tren i gat nem Lifeline Express. Ol dokta i mekim wok volantia i save stiaim dispela tren, na nius Asiaweek i tok: ‘Em i wanpela haus sik i raun long wil.’ Dispela tren i save go long ol liklik ples na stap wanpela mun o wanpela mun na hap, olsem na ol dokta bilong katim man i gat taim bilong helpim ol sikman. Ol i save helpim olsem 600 sikman long olgeta wan wan ples. Lain Impact India Foundation i save bosim dispela tren na i no save kisim winmani. Inap long nau dispela haus sik long tren i bin helpim olsem 400,000 manmeri. Wanpela meri (Zelma Lazarus) bilong dispela lain i bosim tren, em i tok: ‘Mipela mekim bikpela wok tru, olsem na sampela kantri i askim mipela long helpim ol long kisim wanpela haus sik olsem.’