Sampela Tok i Kam Long Olgeta Hap
Ol i Laik Kisim Sampela Bruder
No gat wanpela taim bipo ol lotu bilong Japan i bin tokaut olsem ol i sot long ol bruder. Wanpela bikman bilong lain bruder long lain Tendai bilong lotu Buda, em i tok: ‘Ol man i holi na ol i no save tingim ol samting bilong graun, ol inap kisim wok olsem nambawan pris.’ Ol man i laik insait long wok bruder bai wokim tes nau long 1995. Wanpela bikman bilong lain Tendai i tok, sapos man i no gat save long lotu, dispela i no bikpela samting long winim tes. Bipo ol pikinini man bilong ol pris i save kisim wok bilong papa long haus lotu. ‘Tasol nau long olgeta lain bilong lotu Buda, ol pikinini man bilong ol pris i no laik insait long wok bruder.’ (Nius Mainichi Daily News) Wanpela saveman bilong lotu (Hiroo Takagi) em i stori long dispela samting olsem: ‘Pasin bilong pikinini man long kisim wok lotu bilong papa i wok long pinis nau, olsem na ol lain bilong lotu Buda i tingting planti, i no gat planti yangpela man i laik kamap pris nau.’
Samting Bilong Pasim Ol Long Kilim i Dai Skin
Nius O Estado de S. Paulo bilong Brasil i tok: ‘Long nau planti yangpela i kilim i dai skin bilong ol.’ Wanpela lain bilong gavman long Brasil (Ministry of Justice) i tok, ‘sik i mekim na planti i kilim i dai skin bilong ol. Na sampela i mekim, long wanem, poroman i no laikim em moa, o ol i dring, o ol i gat hevi long mani.’ Bikpela samting bilong helpim ol yangpela na ol i no gat laik long kilim i dai skin bilong ol, em famili na pren bilong ol. Olsem na wanpela dokta bilong tingting (Christian Gauderer) em i tok: ‘No ken ting wanpela i no inap’ kilim i dai skin bilong em. Pasin bilong toktok wantaim inap helpim man i gat hevi o bel bilong em i no stap isi, olsem na ‘askim em wanem samting i mekim na em i bel hevi, na bilong wanem em i laik kilim i dai skin bilong em, na em i laik mekim olsem wanem.’
Grasopa i Kam Bek
Wanpela nius (The Weekly Mail & Guardian) i tok: ‘Namba 8 hevi i bin painim Isip bilong bipo em ol grasopa. Long nau planti grasopa i redi long kam long Afrika.’ Ol grasopa i bin bagarapim pinis 80,000 hekta graun long Yemen na planti tru i kamap pinis long Sat, na Naija, na Mali. Mausman bilong wanpela lain i gat wok long skelim ol samting bilong ol gaden kaikai, em i tok, samting ol dispela grasopa bai mekim i moa nogut, winim taim ol grasopa i bin kam namel long 1986 na 1987. Long dispela taim ol grasopa i bagarapim ol gaden kaikai long 28 kantri long noten Afrika. Na mausman i tok moa olsem: ‘Sapos ol samting long graun i stret long grasopa, ol bai kamap planti planti tru. Grasopa i save stap 45 de na wan wan grasopa inap kamapim 10-pela pikinini.’ Ol grasopa inap bagarapim olgeta gaden kaikai long Sahel.
Bikpela Tok Long Blut
Jemani i save mekim bikpela wok long blut na ol samting ol i wokim long blut, winim ol narapela kantri. Wanpela nius (Süddeutsche Zeitung) i tok, planti man i kirap nogut tru, long wanem, bipo Jemani i wanpela kantri i save mekim stret ol samting bilong marasin, tasol nau ol man i sutim tok long dispela kantri. Wanpela kampani i save wokim planti samting long blut ol i mekim wanpela samting nogut na nau planti man i save long dispela samting. Inap sampela yia dispela kampani i bin baim i go long ol haus sik planti samting ol i bin wokim long blut, tasol pastaim long ol i wokim marasin ol i no bin glasim gut dispela blut. Planti tausen sikman inap kisim sik AIDS long ol dispela marasin kampani i bin wokim long blut. Federal Helt Minista (Horst Seehofer) i tok: ‘Sapos dokta i bin katim sikman na mekim wok long dispela blut nogut na nau sikman i gat tupela tingting—em i kisim binatang jem bilong sik AIDS o nogat—gutpela em i go long dokta na dokta i ken glasim blut bilong em.’ Nius Die Zeit i tok, ‘inap 71 pesen bilong ol man long Jemani i pret nau, nogut ol i kisim sik AIDS sapos ol i mas kisim blut.’
Sik Mun i Pinis Tasol Ol i Kisim Bel
Olsem wanem? Meri i no kisim sik mun moa, em inap kisim bel? Wanpela ripot bilong ol dokta i kamap long nius Le Figaro bilong Paris i tok, maski meri i no kisim sik mun moa em inap kisim bel. Na planti meri em dokta i tok ol i no ken kisim sik mun moa, ol i kisim bel. Long Frans 6,000 dokta bilong ol meri i bin skelim dispela samting na ol i kisim save olsem: Planti meri i no kisim sik mun moa na ol i dring marasin homon (HRT), ol inap kisim bel. Planti bilong ol dispela meri i no bin kisim sik mun moa inap 2-pela yia, na klostu olgeta i no lapun taim sik mun i pinis, na 71 pesen bilong ol i save dring marasin homon. Dokta Christian Jamin em i bin bosim dispela wok bilong ol dokta na em i tok, maski meri i no kisim sik mun moa, i no olsem em i no inap kisim bel.
Ol Traipela Haus Bilong Isip i Wok Long Bagarap
Ol traipela haus matmat bilong ol bikman bilong bipo em ol i bin stap planti planti yia pinis long ol hap bilong Isip ol inap bagarap, long wanem, wara i stap insait long graun i wok long kam antap. Long Kairo 400 traipela haus matmat olsem inap bagarap. Long hap bilong saut tu wankain samting i kamap long ol traipela haus bilong bipo, wanpela bilong ol em bikpela haus lotu Temple of Luxor. Nius The UNESCO Courier i tok, traipela ston ol i sapim i gat bodi bilong laion na i gat het bilong man na ol i kolim Spinks, em i wok long bagarap nau. Wanpela han bilong en i bruk pinis. Dispela hevi i kamap, long wanem, ol i wokim wanpela bikpela banis bilong pasim wara (Aswân High Dam). Olsem na wara Nail i wok long ran tasol na ol wara insait long graun i no save go daun, em i stap antap long mak bilong en. Taim ol i no wokim yet dispela bikpela banis bilong pasim wara, wara Nail i no gat bikpela wara long en inap 9-pela mun, olsem na wara i save drai na go liklik. Na narapela samting i save bagarapim ol traipela haus, em ol olpela paip insait long graun bilong rausim ol samting bilong toilet. Ol i olpela tru olsem 100 yia pinis, na long sampela hap ol i bruk na planti taim samting bilong toilet i kapsait. Taim wara i go insait long as bilong ol dispela traipela haus, em i no stap long as bilong haus tasol, nogat; wara i go antap insait long ol banis ston bilong haus. Orait, taim wara i bung wantaim ol marasin insait long ol dispela banis ston, dispela i mekim na wanpela kain sol i kamap na sol i bagarapim ol banis bilong haus.
Talinga i Laik Pinis Olgeta
Wanpela nius (Frankfurter Allgemeine Zeitung) i tok: ‘Long Jemani i gat olsem 4,400 kain talinga, tasol long olgeta 10-pela 10-pela talinga, 3-pela i laik pinis olgeta.’ Ol saientis i tokaut olsem, i no talinga bilong kaikai tasol em bai pinis olgeta, nogat; planti kain kain talinga olsem mosong bilong diwai samting, ol tu bai pinis long Yurop. Bilong wanem dispela samting i wok long kamap? Long wanem, win na wara na graun i wok long bagarap na ol man i no tingim talinga, ol i wok long pinisim tasol. Talinga i save helpim planti samting na ol i no ken bagarap, olsem diwai yar na pain, na kain kain binatang. Olsem na ol saveman i tingting planti, long wanem, bikpela hevi bai painim graun sapos ol dispela talinga olsem mosong i pinis.
Ol Saientis i Bilip
Wanpela nius bilong Saut Afrika (The Star) i tok: ‘Maski man i wanpela saientis, em inap bilip long God.’ Dispela nius i kamapim tok bilong Profesa David Block taim em i stori inap 90 minit long ol man. Profesa Block em i wanpela saveman bilong glasim ol sta samting long wanpela yunivesiti (Witwatersrand) long Johanisbek. Profesa Block i tok, olgeta samting antap i save wok stret tru. Profesa Block na planti saientis moa i save, ol dispela samting antap olsem ol sta mun san samting i kamapim klia olsem i gat wanpela Man i bin wokim ol, em i save tru na em i bin tingim gut na wokim ol olsem. Nius The Star i kamapim tok bilong Profesa Block, em i tok, i gat planti planti samting i makim olsem God i stap na sapos ‘wanpela man i no bilip long God, em i mas i gat strongpela bilip [olsem ol samting i bin kamap nating], winim bilip bilong man i tok God i stap.’
Ol Bikbus Inap Paia
Long taim bilong bikpela san long 1983 na 1991, paia i bin bagarapim 3.5 milion hekta bikbus long Is Kalimantan, Indonisia. Tasol ol man i tingting planti long ol paia i kamap insait long bikbus bilong Amason, em bikbus i save kisim ren planti taim. Bilong wanem ol man i tingting planti? Long wanem, long kain bikbus olsem, het bilong ol diwai samting i pas pas, na taim ren i kam daun, ples aninit long ol diwai i save kol, na dispela i mekim na ol diwai i gat wara long en i no inap paia. Tasol insait long 5-pela yia i go pinis ol kampani bilong katim diwai i wok long painim ol gutpela diwai mahogani. Ol i wokim planti rot i go nabaut insait long bikbus Amason long hap is bilong en bilong painim dispela diwai na katim. Taim ol i katim planti diwai, win i gat planti wara long en i lus pinis. Na tu, ol i kukim ol pipia diwai i slip nabaut long graun, olsem na bikbus inap bagarap long paia. Wanpela lain i skelim dispela samting ol i kisim save olsem: Sapos ol kampani i katim 2 pesen tasol bilong ol diwai ol i laik kisim, ol i save bagarapim 56 pesen bilong ol narapela diwai samting. Ol fama bilong Brasil i tok, ol i bin lukim paia i ran i go inap 5-pela kilomita insait long bikbus.—Nius Manchester Guardian Weekly.