Ol Misineri—Ol i Mas i Stap Olsem Wanem Kain Man?
DISPELA tok “misineri” inap kirapim nating bel bilong ol man. Sampela i amamas long gutpela pasin bilong sampela misineri olsem Mama Teresa na wanpela man i dai pinis, Albert Schweitzer.
Tasol sampela man i no amamas long ol misineri—ol i les. Na taim ol i harim stori long ol misineri ol i save kros. Taim ol dispela kain man i harim dispela tok ‘misineri,’ ol i tingim man bilong paulim tingting na bel bilong ol man, na sampela strongpela lain i daunim ol narapela man na bosim ol.
Olsem na taim yumi tingim ol misineri yumi ken askim olsem: Ol i bin stap olsem ol wokman bilong lait o ol i bin stap olsem ol wokman bilong tudak?
Misineri Em Wanem Kain Man?
Misineri i olsem ‘wanpela man i mekim wanpela kain wok,’ olsem ‘mekim wok misin i makim em long mekim bilong helpim ol man long save long ol bilip bilong misin, o bilong mekim sampela samting bilong helpim ol man long skin.’
Tasol Krais Jisas i helpim yumi long save long wok ol misineri Kristen tru i mas mekim taim em i tokim lain bilong em olsem: “Yupela i mas i go mekim olgeta lain manmeri i kamap disaipel bilong mi.” Olsem na misineri tru i mas autim tok long gutnius bilong Krais long olgeta hap.—Matyu 28:19.
Jisas em i wanpela misineri. Papa bilong em, Jehova, i bin makim em bilong mekim dispela wok. Jisas i lusim heven na i kam daun long narapela ples, em graun, bilong mekim dispela wok. (Filipai 2:5-8) Olsem na i stret misineri Kristen i bihainim gut pasin bilong Jisas. Wanpela misineri bilong pastaim i bin mekim olsem, em aposel Pol. Em i bihainim pasin bilong Jisas long wok misineri, olsem na olgeta misineri Kristen i ken bihainim pasin bilong Pol.—1 Korin 11:1.
Tru, Jisas i pilim hevi ol man i karim, tasol em i no bin wok long painim rot bilong stretim olgeta hevi i kamap long taim bilong em. Sapos em i bin mekim olsem, dispela bai helpim ol man inap liklik taim tasol. (Jon 6:26, 27; 12:8) Wanpela samting i winim dispela. Jisas i tokim Pailat olsem: “Mama i karim mi na mi kam long dispela graun bilong mekim wanpela wok tasol, em bilong autim tok tru.” Save long tok tru i bikpela samting, olsem Jisas i kamapim long beten bilong em: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”—Jon 17:3; 18:37.
Olsem wanem? Ol misineri bilong ol misin ol i bin bihainim pasin bilong Jisas? Ol i bin stap olsem ol wokman bilong lait olsem Jisas na kamapim lait o save bilong Baibel long ol man, em save i helpim ol man long kisim laip oltaim? O ol man i stap yet long tudak? Ating yumi olgeta i laik save long bekim bilong ol dispela askim, long wanem, inap planti handet yia pasin bilong ol misineri bilong ol misin, i helpim yumi long save long wanem lotu i tru na wanem lotu i giaman.
Pasin Bilong Ol Misineri
Ol misineri i bin mekim sampela bikpela wok tru bilong helpim ol man long save long gutnius bilong Krais. Olsem: Sampela misineri i bin mekim bikpela wok long tanim Baibel long tok ples bilong ol man, olsem na ol man inap kaunim Baibel long tok ples bilong ol yet.
Tasol nau i olsem sampela misineri i ting wok bilong helpim ol man long ol samting bilong skin na long sindaun bilong ol i bikpela samting, na dispela i winim wok bilong autim tok long Baibel o tanim Baibel long tok ples bilong ol man. Wanpela stori long nius Time i gat het-tok olsem: “Misineri Bilong Nau.” Nius i tok: ‘Nau ol misineri Talatala i tingting long sindaun bilong ol man, ol i gat ol samting bilong skin o nogat.’ Na bikman bilong lain Jesuit long Amerika i stori long ol misineri Katolik na i tok, ‘ol i tingim wok bilong helpim sindaun bilong ol man i namba wan wok bilong ol, na autim bilip Kristen i nambatu wok tasol.’ Na wanpela kuskus bilong misin Katolik i tok: ‘Bipo mipela i tok mipela i strong long helpim ol man long tanim bel na bihainim gutpela pasin. Mipela tenkyu long God, long wanem, mipela bilip olsem, nau God i amamas na sori long olgeta man na olgeta lotu, na em bai marimari long ol na kisim bek ol.’
Olsem wanem? I no gat wok moa long lainim ol man long Baibel olsem Jisas i bin mekim?
Wok i Stap Yet?
Wanpela nius i tok, long 1985 sampela handet volantia i bin telefon long haus bilong 18,000 man long Hambek, Jemani, bilong mekim wanpela ‘bikpela wok misineri long telefon.’ Sori tru, dispela wok bilong ol i no kamapim planti gutpela samting. Long Disemba 1993, nius The European i tok: ‘Kirap long 1991 i kam inap nau, ol man i save go long lotu Talatala long Jemani i no planti. Namba bilong ol i go daun olsem 500,000 samting.’
Tasol dispela hevi i no hevi bilong ol lotu long Jemani tasol. Planti milion manmeri long olgeta hap i givim baksait pinis long lotu. Ol i ting long taim bilong yumi, lotu i no bikpela samting. Tasol yumi mas kisim save long lotu i Kristen tru bilong helpim yumi long karim ol hevi nogut bilong dispela graun, na dispela save bai helpim yumi long wetim nupela taim em bai kamap bihain. Na rot stret bilong helpim ol man, em olsem Jisas i tok—helpim olgeta lain manmeri long kamap disaipel.
Olsem na Krais Jisas i laik ol misineri Kristen i stap olsem ol wokman bilong lait, em i no laik ol i stap olsem ol wokman bilong tudak. Olsem wanem? Ol misineri bilong ol misin i bin inapim dispela wok Jisas i laik ol i mekim? Ol i bin bihainim wanem ol kain pasin?
[Piksa Kredit Lain long pes 3]
Culver Pictures