Ol Pikinini i Lus—Em Hevi Bilong Planti Hap?
‘PIKININI BILONG MI I LUS!’
Sapos papamama i mas tok olsem, ol bai bel hevi stret. Ating i no gat narapela hevi i winim dispela kain hevi. Yumi no save hamas pikinini tru ol i lus, tasol ripot long ol nius bilong planti kantri i makim olsem dispela em i bikpela hevi i kamap long planti hap.
SAPOS yumi skelim ol lista i gat nem bilong ol pikinini i lus long Amerika, bai yumi save olsem namel long 500,000 na 1,000,000 samting ol i lus long olgeta yia. Sampela ol i lus inap liklik taim, na sampela ol i lus olgeta. Ripot bilong Inglan i tok, 100,000 pikinini i lus long olgeta yia, tasol sampela man i tok, planti moa ol i save lus. Ripot bilong kantri bipo ol i kolim Soviet Yunion i tok, planti tausen pikinini bilong dispela kantri ol i lus. Long Saut Afrika, winim 10,000 ol i lus. Na long Latin-Amerika dispela bikpela hevi i painim planti milion pikinini.
Wanpela mausman bilong Dipatmen Bilong Intiria long gavman bilong Itali em i raitim tok long wanpela nius (L’Indipendente) na em i makim olsem dispela em i bikpela hevi long Itali. Em i tok: “Long moningtaim ol i go long skul o ol i go pilai tasol ol i no kam bek gen long haus. Ol i lus nating. Famili i painim painim ol, nogat. No gat liklik mak long ol i go we, na i no gat man i bin lukim ol, o sampela man i ting ol i bin lukim ol, tasol ol i no save tru.”
Long nau ol i bin skelim dispela hevi long Amerika em i bikpela olsem wanem. Long lista i gat het-tok “ol pikinini i lus,” ol i makim sampela samting olsem: Ol narapela man ol i no save long ol i stilim pikinini; o papa o mama i stilim pikinini, olsem long taim papamama i katim marit na ol i pait long kot long husat i ken kisim ol pikinini. Na i gat ol pikinini em papamama tru o waspapamama i rausim ol long haus, long wanem, ol i no laik lukautim ol. Na planti pikinini ol i ranawe. Na i gat sampela pikinini ol i lus inap sampela aua o sampela de tasol—em ol i no kam bek long haus long taim papamama i makim, o papamama i no bin save gut pikinini i laik mekim wanem. Wan wan tasol bilong ol dispela pikinini i lus olgeta.
Tasol olsem wanem long ol pikinini em samting nogut i painim ol na ol i lus? Bilong wanem i gat dispela hevi? Dispela Kirap! bai skelim dispela hevi na bekim askim olsem: Wanem taim dispela hevi bai pinis?