“Bikpela Bagarap Long Mani”
WANPELA MAN LONG NAIJIRIA I RAITIM DISPELA STORI BILONG KIRAP!
LAIN UNICEF (United Nations Children’s Fund) i kamapim wanpela ripot i tok, long Afrika long hap saut bilong Sahara, ol kantri i gat “bikpela bagarap long mani.” Inap 220 milion man long dispela hap i stap rabis tru—ol i no inap tru long kisim ol samting inap long ol. Long 10-pela yia i go pinis ol dispela man i rabis, tasol nau ol i rabis tru.
Ripot i tok: ‘Long 1980 i go inap 1989 ol pikinini i no skul gut.’ Long olgeta wan handet wan handet pikinini i go long komyuniti skul, mani bilong gavman inap helpim 33 tasol. Na bipo ol skul i kisim 79 pesen bilong ol pikinini, tasol nau ol i kisim 67 pesen tasol. Na nau long planti kantri long Afrika i no gat marasin bilong helpim ol sikman. Planti klinik i pas, long wanem, i no gat wokman o marasin.
Ripot i kamapim sampela as na Afrika i gat bikpela hevi long mani. Olsem: Ol i tromoi mani long ol samting bilong ami; ol i no gat planti rot bilong mekim wok bisnis wantaim ol narapela kantri; ol i gat bikpela bikpela dinau long ol narapela kantri. Ol saveman i tok, Afrika i no inap tru bekim ol dinau bilong en. Ripot bilong UNICEF i tok, ‘Afrika i no inap orait bek sapos ol narapela kantri i no helpim em. Na wok ol i mas mekim bilong helpim Afrika i bikpela tru, na ol i no bin tingting yet long mekim.’
Yu ting ol man inap helpim Afrika? Baibel i tok: “Ol king na ol man bilong graun i no inap kisim bek yu. Olsem na nogut yu bilip long ol.” (Song 146:3) Ol gavman bilong man i no inap pinisim ol bikpela hevi bilong Afrika. Kingdom bilong God tasol inap stretim ol hevi na helpim tru ol man. Na dispela Kingdom i no ken stretim ol hevi bilong Afrika tasol, nogat; em bai stretim olgeta hevi bilong dispela graun.—Matyu 6:10.
[Piksa Kredit Lain long pes 31]
WHO/OXFAM