NIUS I KAM LONG OLGETA HAP

Hap Saut bilong Sahara long Afrika

Wanpela ripot bilong lain UNICEF long hap saut bilong Sahara long Afrika i tok: “Inap 38 pesen tasol bilong ol pikinini aninit long 5-pela krismas i gat setifiket bilong de mama i karim ol.” Elke Wisch, nambatu dairekta bilong UNICEF long isten na sauten Afrika, i tok olsem long sampela hap bilong Afrika “em i bikpela samting long rejistaim ol pikinini i bon bambai ol i ken kisim helt kea, na ediukesen, na tu, ol pikinini em papamama bilong ol i dai pinis ol i ken kisim graun samting bilong papamama.”

Itali

Wanpela wok painimaut i tok ol tineja long Itali i save pret nogut tru long ol narapela i buli long ol long rot bilong Intenet. Ol pikinini i gat 12 i go 17 krismas, 72 pesen bilong ol i pret nogut tru long dispela samting. Dispela i winim namba bilong ol tineja i pret long drak (55 pesen), i pret long ol bikpela man i mekim pasin sem long ol (44 pesen), na i pret long kisim sik bilong pamuk (24 pesen).

Japan

Nius The Japan Times i tok, planti yangpela long Japan i no orait long kisim ol promosen long wok ples. Inap 40 pesen bilong ol i no laikim ol pasin bikhet na ol pasin giaman long ples wok. Planti wokman i pilim hatwok long kamapim tingting bilong ol o toktok wantaim bosman bilong ol. Ol lain i gat bikpela krismas i holim strong wok bilong ol, tasol 60 pesen bilong ol yangpela wok manmeri i holim tasol wok bilong ol inap long ol i kisim narapela gutpela wok.

Brasil

Long 1980 i go inap 2010, klostu 800,000 manmeri i dai long Brasil em narapela i sutim ol long gan. Winim 450,000 man i dai em ol man i gat 15 i go 29 krismas. Wanpela wok painimaut long ol pasin nogut i kamap i no longtaim i go pinis i soim olsem planti taim ol man i kilim i dai narapela taim famili i kros pait, ol neiba i kros, pasin jeles, o ol draiva i tok pait.