Bikpela Pait Bilong Maraton—Ol i Daunim Wanpela Bikpela Gavman

WANPELA MAN LONG GRIK I RAITIM DISPELA STORI BILONG KIRAP!

INAP olsem 40 kilomita longwe long Atens, Grik, long hap bilong not-is, i gat wanpela ples daun ol i kolim Maraton. Taim ol man i kam lukim ples na wokabaut i go daun long ol liklik maunten i banisim dispela ples daun, ol i kirap nogut​—olgeta samting i stap isi, no gat wanpela liklik pairap. Olsem na i hatwok long bilip olsem, bipo wanpela bikpela pait i gat nem i bin kamap long dispela hap. Em wanpela pait i bin pasim ami bilong bikpela gavman bilong Mesopotemia na ol i no inap kam na kisim Yurop. Buk The World Book Encyclopedia i tok, dispela pait ‘i wanpela bikpela samting long ol man bilong Yurop.’ Na wanpela man bilong stori long ol samting i kamap bipo, em Will Durant, em i tok: ‘Taim ol i winim dispela pait, em i narapela kain tru.’

Ol i Daunim Wanpela Bikpela Gavman

Ol tok profet bilong Buk Daniel i kamapim klia strong bilong sampela bikpela gavman, na olsem wanem ol i kisim ol narapela kantri, na i kolim wanem gavman em narapela i kamap bihain long narapela. Daniel i tok piksa long bikpela gavman Midia na Persia, na dispela tok piksa i stret tru long en. Em i tok: “Mi lukim namba 2 animal . . . na em i olsem wanpela bikpela animal ol i kolim bea. . . . Na wanpela tok i kamap long em olsem, ‘Goan, kaikai planti mit.’ ”​—Daniel 7:5.

Dispela samting i kamap tru. Long yia 560 samting paslain long Krais, gavman Midia na Persia i gat bikpela strong, na strongpela ami bilong en, em Sairus na Darius Namba Wan i bosim, i kam long hap bilong wes na kisim kantri Lidia. Ol i daunim tupela ples long hap not bilong Grik, em Tres na Masedonia. Olsem na planti kantri bilong Grik, em Persia i bin daunim na bosim. Taim Persia i daunim kantri Lidia, ol i kisim tu ol taun Grik i stap long nambis Aionia, em ol taun bipo Lidia i bosim.

Ol taun Grik long hap bilong Aionia i singaut long sampela taun i kam helpim ol, long wanem, ol i no laik bai Persia i bosim ol. Atens na Eretria tasol i kam bilong helpim ol. Tasol dispela i no pasim ami bilong Persia. Ami i kam na givim strafe long ol dispela taun i bikhet long Persia na ami i daunim ol. Na Darius i no amamas long Atens na Eretria i laik helpim ol bikhetman bilong Aionia, olsem na em i pasim tok long givim strafe long ol tu.

Taim Atens, Sparta, na Eretria i bikhet na ol i no laik daun long Persia, orait long yia 490 paslain long Krais, strongpela ami bilong Persia, em sampela i raun long hos na sampela i wokabaut long lek, ol i go long Grik. Long mun Ogas, ol Persia i redi long daunim Atens na provins bilong en, em Atika.

Ol i Tingim Rot Bilong Pait

Ol Persia i kamap long Maraton, na bihain ol i brukim ples tais bilong Atika long nambis bilong is, em longwe long Atens olsem 42 kilomita tasol. I olsem ol Atens i no inap winim dispela pait, long wanem, ol i no gat planti soldia​—9,000 bilong ol yet, na 1,000 soldia bilong taun Plataia. Ol i no gat ol soldia i raun long hos na ol soldia i save pait long banara.a Ol i askim ol Sparta long kam helpim ol, tasol ol i no kam. Ol i mekim ol bikpela bung bilong lotu bilong litimapim god bilong ol, em Apolo. Olsem na maski ol Atens i gat liklik ami na ol i no gat planti samting bilong pait, ol yet i mas pait wantaim Persia.

Tenpela jeneral bilong ami bilong Atens i bung olsem wanpela komiti bilong pasim tok long ol bai pait olsem wanem. Ol i pasim tok long rot bilong vot. Nau ol i mas pasim tok long tupela samting. Namba 1: Larim ami bilong ol i stap long Atens bilong lukautim taun, o bungim ol Persia long wanpela ples daun na pait. Ol jeneral i save, taun Atens i no gat ol strongpela banis, olsem na ol i vot na tok, mobeta ol i pait long Maraton.

Na namba 2: Ol i no gat planti soldia olsem ami bilong Persia. Olsem na i gutpela ol yet i kirapim pait, o mobeta ol i sanap na wet, na ating ol Sparta bai kam na helpim ol long daunim strongpela ami bilong Persia?

Save Bilong Jeneral Miltiades

Wanpela man Grik, em Jeneral Miltiades, em i kamap nambawan bilong bosim ami. Em i gat save long pait na long bosim ami. Bipo em i bin insait long ami bilong Persia taim ol i bin pait long hap bilong not, olsem na em i gat save long dispela birua bilong Grik. Em i save gut long ami bilong Persia na ol bai mekim wok long wanem wanem ol samting bilong pait. Na bikpela samting, em i save long pasin bilong ol Persia long pait. Na sampela de paslain long pait, Miltiades i bin skelim gut dispela ples pait.

Na Miltiades i save, ol i mas mekim kwik wanpela samting, long wanem, long nupela gavman demokratik long Atens, i gat sampela man ol i save laikim ol Persia na ol bai amamas sapos Persia i daunim Atens. Wanpela nait paslain long pait i kirap, wanpela man Persia i lusim ami bilong em yet na ran i kam long kem bilong ol Grik. Em i stori olsem, inap liklik taim ol soldia i raun long hos, ol i bin lusim kem bilong ol Persia. Ol man i ting, ol i bin mekim olsem bilong kirapim pait long Atens long hap bilong is long nambis bilong Atika. Ol Persia i ting ol bai winim pait long Maraton, olsem na ol i laik redi long kisim wantu taun Atens. Tasol maski i gat wanem as na ol soldia Persia i raun long hos i lusim kem, ol soldia Atens i wokabaut long lek ol i save, bikpela samting em inap bagarapim ol, em i go pinis.

Long tulait, ami bilong Grik i kirapim pait. (Lukim blok long pes 16.) Ol Persia i kirap nogut tru na ranawe, tasol bihain liklik ol i kam bek na pait. Ol i pait wantaim ol soldia i stap namel long lain ami bilong Grik. Miltiades i laik ol i mekim olsem, long wanem, ol i no gat rot long ranawe! Miltiades i no putim planti soldia namel long lain ami​—em i makim planti soldia bilong sanap long han kais na han sut. Kwiktaim ol dispela soldia i banisim ol Persia na kilim i dai bikpela hap lain bilong ol. Sampela tasol i gat rot long ranawe na ol i go bek long ol sip bilong ol. Planti soldia bilong Persia, inap 6,400 ol i dai​—long ami bilong ol Atens, 192 soldia tasol i dai.

Ol stori bilong bipo i tok, wanpela man bilong bringim tok i kam, em i bin siksti i go bek long Atens bilong toksave olsem ol Grik i winim pait na daunim ol Persia. Stori i tok, nem bilong dispela man em Faidipidis. Tasol Faidipidis i bin lusim Atens paslain long pait na ran i go long Sparta bilong askim ol long kam helpim ol Grik. Na narapela stori bilong bipo i tok, narapela yangpela man Grik i lusim Maraton na ran i go longwe inap 42 kilomita long Atens, na taim em i kamap long Atens em i singaut: “Amamas! Yumi win pinis!” Em i autim dispela tok pinis, na em i pundaun na i dai. Ol man i tok, dispela i namba wan resis maraton. Olsem na long nau, taim ol man i mekim resis bilong ran longwe, ol i kolim dispela resis olsem resis maraton.

Ol Grik i bin kukim sampela sip bilong ol Persia, tasol planti bilong ol 600 sip inap ranawe i go long hap bilong Kep Kolona, long hap saut bilong Atika, na go kamap long Atens. Tasol ami bilong Atens, em ami i bin winim pait, ol i kamap paslain na wetim ol. Olsem na ol Persia i ranawe gen. Man! Ol Atens i winim wanpela pait ol i ting ol i no inap winim!

Ol man long Atens i amamas tru, na ol i amamas moa, long wanem, ol yet i winim pait na Sparta i no bin helpim ol.

Dispela Pait i Bikpela Samting

Long Maraton na Delfi i gat ol bikpela mak ol i bin wokim long ston mabel na ain bras na ol man i ken tingim dispela taim ami bilong Atens i winim pait. Wanpela man bilong raitim ol stori bilong bipo (Pausanias), em i tok, 650 yia bihain long dispela pait, ol man i save raun na brukim dispela ples em bipo pait i bin kamap long en, ol i tok, i olsem ol inap harim pairap bilong pait.

Taim yumi tingim Baibel, bilong wanem dispela pait bilong Maraton i bikpela samting? Long wanem, dispela samting i bin kamap bipo tru i kamapim klia liklik olsem bihain bihain kantri Grik, em dispela “meme man,” em bai daunim “sipsip man i gat tupela kom,” em kantri Midia na Persia.b​—Daniel 8:​5-8.

Taim yumi lukim Mak Bilong Maraton em i sanap yet long ples pait, em i helpim yumi long tingim planti manmeri ol i dai, na planti i kisim bikpela pen taim ol gavman i resis bilong bosim graun. Planti pait i bin kamap long graun na bikpela blut i bin kapsait, na ol ples pait i stap nating, na ol “bikpela man,” na ol “man i gat nem,” na ol “man i bin lus long pait”​—ol i pulap tru long ol ples matmat, long wanem, ol gavman i resis bilong bosim graun. Tasol taim i klostu nau na dispela wok nogut bilong ol gavman bai pinis. God i tok profet olsem: “Taim ol dispela king i stap yet God bai i kirapim wanpela kingdom na dispela kingdom bai i stap oltaim oltaim. Ol arapela king i no inap daunim kingdom bilong God, tasol em bai i daunim ol na bagarapim ol arapela king na kingdom bilong en bai i stap oltaim.”​—Daniel 2:44.

[Ol Futnot]

[Blok/Piksa long pes 16]

Ol Samting Bilong Soldia na Ami i Helpim Ol Long Winim Pait

Buk A Soaring Spirit i stori long tupela bikpela samting i bin helpim ol Atens long winim pait. Buk i tok: ‘Ol soldia bilong ami bilong Grik i gat strongpela klos pait, na ol strongpela plang, na ol longpela spia, winim ol Persia. Tasol taim ol i pait, ol i pait strong na mekim save. Ol soldia i sanap long 12-pela lain na ol i pas pas, olsem na plang bilong ol i stap olsem wanpela banis. Taim ol Persia i kam pait, nau ol i save bilong wanem dispela kain pasin bilong ol Grik long pait long bipo, i wanpela samting bilong pret long en.’

[Kredit Lain]

The Complete Encyclopedia of Illustration/J. G. Heck

[Ol Piksa long pes 15]

Ples Daun Bilong Maraton. Ol liklik blok: Mak bilong ol 192 man Atens i bin dai long pait