Ka Bilong Yu—Samting Bilong Lukautim Yu o Bagarapim Yu?
Lain FEMA (U.S. Federal Emergency Management Agency) i tok: ‘Bihain long planti bagarap, lain bilong painim ol man i save painim sampela man i dai pinis, na sapos ol dispela man i bin save long stap wantaim ka bilong ol o nogat, ating ol i gat rot long abrusim bagarap.’ Tru tumas, tingting kranki inap mekim na yu inap bagarap. Olsem wanem? Yu save yu mas mekim wanem taim wanpela bikpela bagarap i painim yu? Skelim tok daunbilo na mekim olsem wanpela tes. Bihain skelim ol bekim bilong yu wantaim ol tok i stap daunbilo tru.
1. GURIA
□ Stap insait long ka
□ Lusim ka
2. BIKPELA WIN
□ Stap insait long ka
□ Lusim ka
3. BIKPELA REN AIS
□ Stap insait long ka
□ Lusim ka
4. WARA I TAIT
□ Stap insait long ka
□ Lusim ka
OL BEKIM:
1. Guria: STAP INSAIT LONG KA.
Ol spring aninit long ka i mekim na ka bai seksek nogut tru, tasol mobeta yu stap insait long ka sapos yu no stap klostu long ol bikpela haus, bris, o waia bilong paua.
2. Bikpela Win: LUSIM KA.
Long taim bilong bikpela win, i nogut tru long stap insait long ka—yu inap kisim bagarap. Tasol olsem wanem sapos i no gat wanpela strongpela haus klostu? FEMA i tok: ‘Slipim skin long wanpela baret o long wanpela hap i go daun liklik, na karamapim han antap long het bilong yu.’
3. Bikpela Ren Ais: STAP INSAIT LONG KA.
Sapos i no gat wanpela hap klostu yu inap stap gut long en, mobeta yu stap insait long ka inap long ol man i kam painim yu. Wan wan taim yu inap kirapim ensin inap liklik taim bilong hatim ka insait. Tasol wanpela windo i mas op liklik na marasin nogut, em kabon-monoksait, i no ken bagarapim yu. Opim liklik lait insait long ka, olsem na ol man i kam painim yu, ol inap lukim yu.
4. Wara i Tait: LUSIM KA.
FEMA i tok: ‘Sapos wara i tait na ensin bilong ka i dai, kwiktaim yu mas lusim ka na wokabaut i go long graun i antap olsem liklik maunten. Sapos wara i wok yet long go antap, wara inap kisim ka i go.’ Nogut yu ting dispela samting i no inap kamap. Na yu inap ting wara i no daun tumas, tasol em i daun, na wara inap kam antap hariap.
FEMA i tok, i gutpela yu putim dispela toksave insait long glapboks bilong ka. Na FEMA i tok, maski wanem wanem hevi i painim yu, ‘no ken pret—em bikpela samting.’