Ol i Lus Long Stilim Ol Samting Long Wes Afrika
Em stori bilong Eunice Ebuh
“Ol raskol i holim gan ol i bin tingting long i kam long haus bilong mipela long de mipela i save mekim Buk-Stadi Bilong Kongrigesen long haus bilong mipela. Mipela i save opim dua bilong banis na bai ol brata sista na ol narapela i ken i kam insait. Ating ol raskol i save pinis long ol samting mipela i save mekim, na ol i save long taim mipela i mekim dispela miting. Mipela i save tru olsem ol i bin stilim wanpela ka na ol i kam wet long dua bilong banis bilong mipela long de na taim bilong Buk-Stadi.
“Tasol dispela wik ol raskol i bin kam, em i wik bilong wasman sekit i kam lukim kongrigesen. Olsem na mipela i no bung long haus bilong mipela—mipela i bung long Haus Kingdom. Taim miting i pinis, i gat wanpela miting bilong ol elda. Long kain taim olsem, mi wantaim ol pikinini i save go bek long haus, tasol long dispela taim man bilong mi, em wanpela elda, em i laik bai mipela i wetim em. Em i tok miting i no ken i stap longtaim. Olsem na mipela i wetim em.
“Bihain mipela i lukim olsem ensin bilong ka i no laik kirap. Wasman sekit wantaim man bilong mi i no inap stretim. Mipela i singautim wanpela mekenik i kam, tasol em tu i no inap stretim.
“Ol pikinini i mas wokabaut i go bek long haus. Bihain liklik mi tu mi go bek long haus. Mi kamap long 10 klok samting. Mi na ol pikinini tu i no kam long ka na go insait bilong kompaun. Sapos mipela i mekim olsem, mipela i mas opim bikpela dua bilong banis.
“Taim mi go insait long rum slip bilong mi, mi harim wanpela gan i pairap strong tru. Mi tingting planti na mi laik ring long polis, tasol telefon i no wok. Mi siksti i go daunbilo na mi lokim strongpela dua ain bilong haus, na bihain mi go hariap na lokim dua i stap insait long haus. Mi mekim dai ol lait. Ol pikinini bilong mi i longlong nabaut, tasol mi tokim ol long i stap isi. Mipela i beten askim Jehova long lukautim mipela. Long dispela taim man bilong mi i stap yet long Haus Kingdom na em i hatwok long kirapim ensin bilong ka.
“Mi lukluk i go ausait long windo na mi lukim wanpela man i slip long rot ausait long dua bilong banis. I olsem ol raskol i go pinis, olsem na mi putim dispela man long ka bilong mi na mi bringim em i go long haus sik. Tru, mi inap kisim bagarap long dispela, tasol mi mas mekim wanpela samting bilong helpim em. Tasol sori tru, long de bihain long en em i dai.
“Tru, bagarap i painim dispela man, tasol ol samting nogut moa inap kamap long dispela taim sapos mipela i bin mekim Buk-Stadi long haus bilong mipela. Tasol wasman sekit i kam na mipela i no mekim olsem. Na ka i bagarap, olsem na mipela famili olgeta i no kam bek wantaim long ka. Sapos mipela i bin mekim olsem, ol raskol bai holim man bilong mi, tasol em i kam bek bihaintaim tru. Ol dispela samting na sampela samting moa i bin helpim mipela long dispela nait.
“Jehova em i strongpela haus na ples hait bilong mipela. Baibel i tok stret olsem: ‘Sapos Bikpela i no lukautim wanpela taun, orait ol wasman i was nating.’ ”—Song 127:1.