Long Ples Mani i Stap Long Diwai

SAPOS mani i save kamap long ol diwai na yu gat wanpela kain diwai olsem, na dispela diwai bilong yu em i stap arere long wanpela rot em planti man i stap klostu long yu ol i save i go i kam long en long olgeta de, yu ting dispela mani bai stap longtaim long diwai bilong yu?

Sapos olgeta manmeri i stap klostu long yu ol i Witnes Bilong Jehova, diwai mani bilong yu bai i stap gut. Bilong wanem mipela i tok olsem? Long wanem, ol Witnes Bilong Jehova i save bihainim tok bilong Baibel na stretpela pasin long olgeta samting ol i mekim. (Hibru 13:18) Wanpela samting i no longtaim i bin kamap i stori long dispela samting.

Long Naijiria, Wes Afrika, wanpela man i bin painim wanpela faiv-naira pepa mani long rot 90 mita klostu long wanpela haus bilong brens-ofis bilong Sosaiti Was Taua. Man i painim dispela mani i pasim mani long lip bilong wanpela kokonas i stap klostu, long wanem, em i ting man i lusim dispela mani bai kam bek na painim mani bilong em.

Maski dispela mani i stap ples klia na planti Witnes Bilong Jehova i save i go i kam long olgeta de, i no gat wanpela bilong ol i bin kisim dispela mani. Bihain long planti de i lus ol i rausim mani na putim long bokis kontribusen bilong Sosaiti.