Ol Yangpela i Laik Save . . .
Mi Inap Stap Pren Bilong God?
PREN bilong God? Yangpela meri Doris i gat 20 krismas i ting em i no inap kamap pren bilong God. Em i tok: ‘Mi ting mi no gutpela olsem ol narapela na i no gat wanpela i ken laikim mi. Na mi no save beten long God Jehova, long wanem, mi pilim olsem i no stret mi mekim olsem.’ Long bel sampela yangpela i pilim olsem ol i no gutpela man na ol i no inap kamap pren bilong God. Ating ol i laik kamap pren bilong God, tasol ol i ting ol i no inap kamap olsem. Olsem wanem? Sampela taim yu bin ting olsem?
Ating sampela taim popaia bilong wanpela yangpela i mekim na em i pilim olsem em i no gutpela man inap long em i ken beten long God. Tingim yangpela Michael. Em i tok, taim em i no save long ol pasin bilong God, em i save ‘tingting na mekim olgeta samting nogut tru.’ Tasol taim Michael i stadi long Baibel em i save God i bel hevi long pasin nogut em i mekim. Em i tok: ‘Ol tok i kamap long ol wan wan miting Kristen i save kamapim klia long mi wanpela rong bilong mi. Mi save mi bin mekim planti rong na mi yet i no inap lusim rong bilong mi, olsem na mi bin ting Jehova tu i no inap lusim.’
Na sampela samting ol narapela i mekim long wanpela yangpela inap mekim na em i pilim olsem em i no inap kamap pren bilong Jehova. Tingim Doris, em yumi bin stori long em pastaim. Taim Doris i liklik pikinini mama i ranawe lusim em. Doris i tok: ‘Ating i no gat wanpela i laikim mi. Olsem wanem wanpela i ken laikim mi sapos mama na famili bilong mi i no laikim mi na ol i lusim mi?’ Tru tumas, taim wanpela i mekim nogut long pikinini i go inap long taim em i bikpela liklik, em inap ting em i nogut pinis na God i no laik tru long kamap pren bilong em.
O yumi ken tingim wanpela yangpela em i stap pren bilong God tasol em i kirap na mekim wanpela bikpela rong. Dispela samting i bin painim Tracy i gat 21 krismas. Em i bel hevi na tok: ‘Mi sem nogut tru. Mi bel hevi stret na bel i kotim mi; i olsem mi no inap karim dispela bel hevi. Mi save Papa bilong mi, Jehova, i bel hevi long pasin mi bin mekim.’
Olsem wanem? Yu gat wankain hevi? No ken tingting planti. God inap kamap pren bilong yu!
Yu Inap Kamap Pren Bilong God
Tru, taim yumi brukim lo bilong God na mekim pasin nogut, yumi no inap kamap pren bilong God. Tasol gutpela tru, Papa bilong yumi em i opim rot bilong helpim yumi. Aposel Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” (Rom 5:8) Jisas i dai, olsem na em i baim bek ol man i hevi long rong bilong ol na sin i bin bosim ol. (Matyu 20:28) Pol i tok moa olsem: “Taim yumi stap yet olsem birua bilong God, Pikinini Bilong God i dai bilong pinisim pasin birua na mekim yumi i kamap wanbel wantaim God.”—Rom 5:10.
Taim sampela yangpela i no save yet long ol lo bilong Jehova olsem Michael, em yumi stori long em pastaim, ol i bin mekim ol bikpela rong. Tasol long rot bilong ofa bilong Jisas, Jehova inap lusim rong bilong ol, maski em i bikpela rong. Baibel i givim gutpela tok long yumi olsem: “Sapos yumi autim sin bilong yumi, orait God . . . bai i mekim stretpela pasin na lusim sin bilong yumi. Na em bai i rausim olgeta pasin nogut i stap long yumi na mekim yumi i kamap klin.” (1 Jon 1:9) Tasol kain man olsem i mas mekim sampela samting na God i ken save em i amamas God i bin mekim olsem bilong helpim em. Aposel Pol i kamapim wanpela lo em i ken bihainim, olsem: “Nogut yupela i pas long ol samting i no klin long ai bilong God. Na bai mi yet [God] mi kisim yupela na bai mi stap Papa bilong yupela.” (2 Korin 6:17, 18) Man! Em gutpela samting tru long save, sapos wanpela man i lusim pasin nogut na em i tanim bel tru, God bai amamas long kisim em olsem pren bilong Em.
Olsem wanem long ol yangpela em papa o mama i bin mekim nogut long ol taim ol i liklik i go inap long taim ol i yangpela? Yumi mas save, God i no ting em asua bilong ol yangpela sapos wanpela i bin mekim nogut long ol na ol i no laik em i mekim olsem. Ol i no orait long mekim dispela sin, ol narapela yet i bagarapim ol. Na tingim, maski long ai bilong ol man yu olsem man nating, long ai bilong God i no olsem. Jehova inap kamap Pren bilong yu maski yu gat wanem kain sindaun. Mama bilong Maureen em wanpela Kristen tasol papa bilong em, em man bilong dring oltaim, na olgeta taim i gat kros pait i kamap insait long famili. Tasol Maureen i tok: ‘Maski i gat bikpela hevi insait long famili, mi inap pas gut wantaim Jehova. Mi kisim save olsem Jehova i no inap ranawe lusim mi.’
Olsem Wanem Sapos Yu Mekim Bikpela Rong?
Doug i go bikpela insait long famili Kristen, tasol taim em i gat 18 krismas em i pamuk. Em i mekim olsem, long wanem, em i gat ol poroman nogut. Doug i tok: ‘Mi bin save pamuk i no stret tasol mi mekim planti taim, long wanem, mi laik kisim amamas.’ Bihain Doug i save, pasin em i mekim i no inap helpim em liklik. Em i tok: ‘Bihain mi save ol poroman bilong mi ol i no pren tru, ol i laikim tasol mani bilong mi o ol i laik raun na kisim amamas, em tasol.’ Olsem na Doug i mekim sampela samting bilong stretim wokabaut bilong em na bilong kamap pren bilong Jehova gen. Tasol wanpela bikpela samting i pasim em.
Doug i tok: ‘Mi hatwok tru long kam bek long lain bilong God, long wanem, mi pilim olsem mi nogut pinis. Na mi pilim olsem olgeta samting mi bin mekim i nogut tru long ai bilong Jehova. Mi save Jehova i gutpela olgeta na em i no bin les long mi maski mi bin mekim ol pasin nogut tru. Tasol mi bin ting Jehova i no inap lusim rong bilong mi, long wanem, mi nogut pinis.’ Tasol wanpela elda long kongrigesen i helpim Doug long winim dispela hevi bilong em, na Doug yet i bin skelim gut stori bilong Manase.
Manase em husat? Em wanpela king bilong Juda bilong bipo. Baibel i tok papa bilong Manase, em Hesekia, em i man bilong lotuim Jehova na em i bin skulim Manase long laikim Jehova. Tasol bihain long papa i dai na Manase i kamap king taim em i gat 12-pela krismas, em i bihainim tingting bilong em yet. Em i lusim Jehova na em i kirap lotuim god Bal. Ol man bilong lotuim Bal ol i save mekim pasin pamuk i nogut tru. Manase “i mekim planti sin moa long ai bilong Bikpela.” Long rot bilong ol gutpela mausman, Jehova “i tokim Manase wantaim ol manmeri long givim baksait long ol dispela pasin nogut bilong ol, tasol ol i no harim tok.” Bilong givim strafe long Manase, Jehova i bin larim ol Babilon i holim em. Ol i pasim han bilong Manase long sen na kisim em i go long Babilon.—2 Stori 31:20, 21; 33:1-6, 10, 11.
Taim Manase i tingim bek ol pasin nogut em i bin mekim na skelim wantaim ol lo bilong Jehova em i save long en, em i pilim hevi nogut tru, na bel i gat tok, na em i krai long Jehova i ken lusim rong bilong em. Em i daunim em yet long ai bilong God na “askim God long helpim em. Na God i harim prea bilong Manase na i helpim em na larim em i go bek long Jerusalem na bosim kantri gen.” Yes, Papa bilong “olgeta pasin marimari na pasin sori” i orait long dispela man i tanim bel long kam klostu gen long em. God i marimari moa yet na em i lusim rong bilong Manase, olsem na Manase ‘i save gut olsem, Jehova tasol em i God tru.’—2 Stori 33:12, 13; 2 Korin 1:3.
Sapos Jehova inap lusim rong bilong Manase, yumi ken save em i redi long larim wanpela yangpela i bin mekim sin na em i tanim bel long pas gen wantaim Em. Ol wasman bilong kongrigesen bilong Doug i bin mekim sampela samting bilong helpim Doug na em i amamas long bihainim tok bilong ol. Ol i helpim em long save gut olsem “belhat bilong [God] i no save stap longpela taim.”—Song 103:9.
No Ken Lusim God
Taim God i kamap Pren bilong yu, yu mas laikim em tru na no ken larim wanpela man o wanpela samting i bagarapim pasin pren bilong yu. Wanpela yangpela meri i baptais na em i gat 18 krismas, em i kamapim nating wanpela pikinini. Maski dispela hevi i painim em, ol elda i helpim em long stretim tok wantaim Jehova. (Lukim Aisaia 1:18.) Wanem samting i bin helpim em? Em i tok: ‘Mi kisim save olsem Jehova em wanpela Papa bilong sori, em i no Man bilong bagarapim mi. Na mi save em i bel hevi long samting mi bin mekim. Na bikpela samting: Yumi mas tingim God i olsem Pren bilong yumi, na em tu i save pilim tru ol hevi i painim yumi. Yumi no ken ting em i wanpela Spirit i stap longwe na wanpela samting bilong lotu long en, tasol yumi no ken laikim em, nogat.’ Olsem Manase, dispela yangpela meri i kirap na mekim bikpela wok bilong lotuim Jehova. (2 Stori 33:14-16) Dispela i bin lukautim em. Na em i tokim ol narapela yangpela olsem: ‘Wok strong long litimapim nem bilong Jehova maski i hatwok long mekim olsem. Long pasin sori Jehova bai stretim gen wokabaut bilong yu.’
Yu mas stap pren wantaim ol man i pren bilong God—em tu i bikpela samting. Na yu mas abrusim ol man i no laik bihainim ol lo bilong God. (Sindaun 13:20) Yangpela Linda i pamuk wantaim wanpela yangpela man na pasin pren bilong em wantaim dispela man i ‘bikpela samting, winim tru olgeta samting.’ Taim Linda i kamap strong gen long spirit em i tok: ‘Yu inap bagarapim i stap bilong yu olgeta sapos yu no pas gut wantaim Jehova.’
Olsem wanem? Yu pas gut wantaim Jehova? Sapos nogat, gutpela yu wok strong long mekim olsem. Linda i stori long pasin pren i olsem bikpela samting, em i tok: ‘I no gat narapela samting long dispela graun i winim pasin pren wantaim Jehova. I no gat wanpela yangpela man o meri o wanpela samting i bikpela samting olsem dispela. Sapos yumi no stap pren bilong Jehova, orait, ol narapela samting i samting nating.’
[Piksa long pes 27]
Sampela yangpela inap pilim olsem ol i no inap kamap pren bilong God