Samting Ol Pris i Mekim Bilong Helpim Ol Yangpela
Nius The Gazette bilong Montriol, Kanada, i tok: ‘Wanpela lain i kamap long Yunivesiti Mekgil, em ol i pasim ol kain saket olsem bilong ol lain raskol samting na ol i no komim gut gras.’ Tasol ol dispela “raskol” ol i narapela kain—em ol pris bilong sampela yunivesiti. Nius i tok, ‘ol dispela pris i narapela kain na ol i wok wantaim ol sumatin bilong ol yunivesiti, em ol sumatin i wok long kisim save long laik bilong God.’
Ol pris i pasim klos bilong “ol raskol” bilong wokim piksa bilong pasim long banis na piksa i ken toksave long ol sumatin olsem ol pris i stap bilong helpim ol. Wanpela bilong ol dispela pris, em pris meri bilong lotu Presbitirian, nem bilong em, Roberta Clare, em i tok: ‘Mipela i bin tingting long wokim dispela kain piksa na ol sumatin i no ken kisim tingting bilong planti man, olsem ol i man nogut na mipela yet i stretpela man.’
Dispela pris i tok, planti sumatin i laik stadi long lotu long skul, winim ol sumatin bilong bipo. Planti i gat ol strongpela askim na ol i laik ol tisa na pris bilong yunivesiti i bekim askim bilong ol. Dispela nius i givim sampela askim long wanpela sumatin na sumatin i tok, em i laik save bilong wanem lotu i gat bikpela strong moa long stiaim wokabaut bilong ol man, na bilong wanem i gat planti lotu, na bilong wanem i olsem lotu i as bilong planti hevi long nau. Em i no save Krais Jisas i husat tru na em i hatwok long save husat tru i bin wokim heven na graun.
Olsem wanem? Ol dispela pris i mekim wok long Baibel bilong helpim ol dispela sumatin long save long tingting bilong God long ol askim bilong ol? Ating nogat. Ol dispela narapela kain pris i pasim tok wantaim long ol i no ken subim ol sumatin long bihainim narapela lotu, long wanem, dispela pasin i olsem pasin bilong “stilim ol sipsip.”
Tru, ating ol dispela pris i laik helpim ol sumatin, tasol wok ol i mekim i no wankain liklik long wok Krais na lain bilong em i bin mekim. Ol Kristen bilong bipo i no bin ting wok bilong ol i olsem pasin bilong “stilim ol sipsip,” na ol i no bin surik long skulim ol man i gat gutpela bel long Tok Bilong God. (Luk 24:44, 45; Aposel 20:20) Ol i mekim olsem, long wanem, ol i save man i mas kisim stretpela save long God Jehova na Pikinini bilong em, Krais Jisas, sapos em i laik kisim laip oltaim. (Jon 17:3) God i laik olgeta manmeri i ken “save long as bilong tok tru,” na em i ken kisim bek ol.—1 Timoti 2:3, 4.
Wanpela hap wok bilong ol Witnes Bilong Jehova em long lukim ol man long haus bilong ol na lainim ol long tok bilong Baibel, no gat pe. Ol i laik helpim ol man i gat askim long tok bilong Baibel. Ol Witnes Bilong Jehova i stap long hap bilong yu bai amamas long helpim yu.