Sapta 22

Bai Mi Mekim Wanem Kain Wok?

ATING i no longtaim na bai yu mas tingim wanpela samting olsem: ‘Bai mi mekim wanem kain wok long bihain?’ I gat kain kain wok i stap, olsem wok dokta, o wok bisnis, o wok tisa, o wok long kompiuta, o wok kuskus, o wok saiens, o wok ensinia, o wok kamda, o wok mekenik, o samapim klos samting, na i gat kain kain wok moa. Sapos yu gat gutpela sindaun taim yu pikinini, ating yu laik kisim wanpela wok em inap helpim yu long holim yet dispela kain gutpela sindaun. Tasol sapos yu bin i stap rabis liklik, ating yu laik kisim wanpela wok em inap helpim yu long kisim gutpela sindaun na bai yu no sot moa long ol samting.

Tasol olsem wanem? Yu ting mani na gutpela sindaun em i nambawan bikpela samting? Yu ting wanpela bikpela wok mani em inap helpim yu long i stap belgut na amamas na bai yu pilim olsem i stap bilong yu i gat as tru bilong en?

“I Olsem Samting Nating Tasol”

Ol piksa wokabaut na televisen na ol buk i save stori long ol manmeri i holim ol bikpela wok na ol i gat nem long dispela na ol i kisim bikpela mani. Tasol bilong kisim dispela kain wok, ol i mas resis wantaim ol narapela na bai ol i ken i go pas na kisim dispela bikpela wok i gat namba na nem long en. Wanpela man, em Dokta Douglas LaBier, em i stori long sampela yangpela manmeri em ol i holim ol kain bikpela wok olsem, tasol ol i no amamas long i stap bilong ol​—ol i save tingting planti oltaim na bel hevi, na ol i pilim olsem i stap bilong ol i no gat as bilong en, na sampela kain sik bilong skin na tingting i painim ol long dispela.

Bipo yet King Solomon i tokaut klia olsem bikpela wok na mani kago na bikpela nem, ol dispela samting i no inap helpim man liklik. Solomon em i wanpela king na em i gat bikpela mani kago moa yet, na em i mekim kain kain bikpela wok na em i kisim biknem long ol dispela wok. (Kaunim Saveman 2:​4-10.) Tasol bihain Solomon i tok: “Mi tingting gut long ol dispela samting mi bin mekim long hatwok bilong mi, na mi pilim olsem, olgeta dispela samting i olsem samting nating tasol na i no inap long helpim mi liklik. I olsem man i ran i go bilong holimpas win.”​—Saveman 2:​11.

Tru, ating wanpela wok mani inap helpim yu long kisim bikpela mani na bikpela nem, tasol em i no inap helpim yu long kisim ol samting bilong spirit. (Matyu 5:3) Olsem na ol man i tingting tasol long kisim wanpela bikpela wok na kisim bikpela mani kago na gutpela sindaun, ol i no save stap belgut tru na amamas long i stap bilong ol.

Wanpela Wok i Givim Amamas Tru long Man

King Solomon i tok: “Bilong pinisim olgeta toktok, mi laik tok olsem, namba wan samting long laip bilong yumi man i olsem: Yumi mas aninit long God tasol na bihainim ol lo bilong em.” (Saveman 12:​13) Namba wan wok bilong ol Kristen long nau, em wok bilong autim tok bilong Kingdom. (Matyu 24:14) Sampela yangpela ol i pilim tru olsem dispela wok bilong God em i namba wan wok ol i mas mekim, olsem na ol i laik lusim bikpela hap taim bilong ol long mekim dispela wok, maski skin yet i no laik mekim. (Lukim 2 Korin 5:14.) Planti tausen yangpela ol i no tingting long kisim wanpela bikpela wok mani. Nogat. Ol i mekim wok bilong autim gutpela tok bilong Baibel long olgeta de, olsem wok painia. Na sampela moa ol i save go long ol narapela kantri na mekim wok misineri o ol i wok long ol brens-ofis bilong Sosaiti Was Taua.

Yangpela meri Emili, pastaim em i holim wanpela bikpela wok kuskus, tasol em i lusim dispela wok na em i kamap painia. Em i tok: ‘Nau bel bilong mi i laikim tru dispela wok.’ Em nau, dispela wok bilong autim tok bilong God long olgeta de, olsem wok painia, em i save givim bikpela amamas long ol man i mekim na ol i stap belgut​—i no gat narapela wok i winim dispela wok! Na em i gutpela samting tru long yumi ken i stap olsem “wanwok bilong God,” a?​—1 Korin 3:9.

Skul long Yunivesiti​—Em Bai Helpim Yu Tru?

Planti painia ol i save mekim wanpela liklik wok mani olsem wok haptaim tasol, bilong lukautim ol long ol samting bilong skin. Tasol olsem wanem sapos bihain wanpela i mas lusim wok painia na kisim wanpela wok mani bilong lukautim famili bilong em? Bai em i no bel hevi long em i bin mekim wok bilong God olsem wok painia taim em i yangpela yet. Nogat. Orait, olsem wanem? I gutpela sapos em i bin i go long yunivesiti na kisim bikpela skul taim em i yangpela yet, na bihain em i ken tingting long mekim wok painia? Olsem wanem long dispela?

Tru, Baibel i no makim hamas yia yangpela Kristen i mas skul. Na Baibel i no tok, skul em i samting nogut. Jehova em i Man bilong “skulim yupela,” na em i laik bai lain bilong em i save gut long kaunim buk na save long pasin bilong toktok gut. (Aisaia 30:​20; Buk Song 1:2; Hibru 5:12) Na sapos yumi skul na kisim save, dispela bai helpim yumi long pilim tingting bilong ol man na bai yumi ken save gut long ol, na yumi ken save long ol samting i stap long ol narapela narapela hap bilong dispela graun yumi stap long en.

Tasol sapos yu go long yunivesiti, yu mas tromoi bikpela hap taim na strong. Em wanpela samting yu mas tingim gut. Wanpela buk (Planning Your College Education) i tok, i no olgeta manmeri i winim yunivesiti ol i save kisim gutpela wok. Nogat. Wan wan tasol i save kisim wanpela wok i gat bikpela pe bilong en. Ol narapela i no kisim bikpela pe olsem. Na ol dispela lain i save kisim bikpela pe tru, em ol manmeri i gat bikpela save tru long mekim ol wok, o ol i strong tru long kisim save long mekim dispela kain wok, o ol i stap long wanpela hap i gat ol dispela bikpela wok i stap.

Dipatmen bilong Leba long Amerika i tok, ‘Maski man i winim skul yunivesiti, i no olsem em inap kisim kwik wanpela gutpela wok; nogat. Long nau i gat bikpela lain ol i bin skul long yunivesiti na ol i bin kisim bikpela save, tasol i no gat planti bikpela wok inap long ol dispela lain. Olsem na namel long 1970 na 1984, long olgeta 5-pela 5-pela i bin winim yunivesiti, wanpela i mas kisim wok nating, em man i no gat pepa bilong yunivesiti em inap mekim. Na bihain long 1990 tu planti manmeri moa bai winim skul yunivesiti na bai ol i hatwok long kisim wanpela bikpela wok i stret long save bilong ol, long wanem ol dispela kain bikpela wok bai sot tru.’

Sampela Samting Moa Yu Mas Tingim

Sapos yu winim skul yunivesiti, ating yu inap kisim wanpela bikpela wok mani o nogat, em yu no save. Tasol i gat wanpela samting yumi save tru long en, olsem: “Taim i sotpela nau”! (1 Korin 7:29) Olsem na yu ting i gutpela sapos yu lusim 4-pela yia samting bilong kisim bikpela save long skul yunivesiti insait long dispela sotpela taim i stap yet?​—Efesus 5:16.

Na i gat narapela samting tu yu mas tingim: Sapos yu go long yunivesiti, yu ting dispela bai helpim yu long mekim ol wok bilong God yu tingting long mekim o em bai pulim yu na yu lusim tingting long ol dispela wok bilong God? Bikpela pe i no namba wan samting long tingting bilong ol Kristen. (1 Timoti 6:​7, 8) Tasol sampela lain bilong bosim ol yunivesiti long Amerika i tok, planti sumatin i tingting tasol long kisim wanpela bikpela wok na kisim bikpela mani kago, na ol i tingim ol yet tasol. Wanpela lain sumatin i tok, ‘I olsem mipela i save toktok long mani tasol.’ Orait, sapos yu go long skul yunivesiti na yu bung wantaim ol kain man olsem, em narapela i laik winim narapela na oltaim ol i toktok long mani na ol samting bilong skin tasol, yu ting dispela bai mekim wanem long yu?

Na nau long sampela kantri pasin bikhet i wok long i go bikpela long ol yunivesiti, olsem na sapos Kristen i stap namel long dispela kain pasin, yu ting dispela inap helpim em long i stap stret? Nogat, a? Wanpela lain i skelim sindaun bilong ol sumatin bilong yunivesiti na i tok, ‘Yunivesiti i no save putim planti tambu long ol sumatin long sindaun bilong ol na wokabaut bilong ol​—ol i ken bihainim laik bilong ol yet. Olsem na planti ol i save kisim drak olsem maruana samting, na ol i save dring, na mekim pasin pamuk. Orait, sapos yu stap long kain skul olsem, ating bai yu hatwok long bihainim stretpela pasin, a?​—1 Korin 6:18.

Na olsem wanpela buk i tok, taim ol i go long ol bikpela skul olsem yunivesiti, dispela i save daunim bilip bilong ol na ol i no strong moa long bihainim lotu bilong ol. (The Sacred in a Secular Age) Ol tisa long yunivesiti ol i strong long ol sumatin i mas winim bikpela mak, olsem na sampela yangpela Kristen long yunivesiti ol i slek long ol wok bilong spirit na ol i wok long kisim ol tingting bilong dispela graun. Ol yunivesiti i save kamapim ol dispela kain tingting. Dispela samting i mekim na sampela yangpela Kristen i lusim bilip pinis.​—Kolosi 2:8.

Ol Narapela Samting Yu Ken Mekim

Planti yangpela Kristen i bin tingim ol dispela samting na ol i no tingting moa long i go long yunivesiti na kisim bikpela save. Long ol kongrigesen bilong ol Witnes Bilong Jehova i gat ol miting i save kamap, na i gat wanpela gutpela skul, ol i kolim Skul Bilong Wok Autim Tok, na planti yangpela Kristen i ting ol dispela miting na skul i save lainim gut ol, na dispela i save helpim ol taim ol i laik kisim wanpela wok. Tru ol i no kisim pepa olsem ol man i winim yunivesiti, tasol ol i lain long sanap gut long ai bilong man na i no sem, na ol i lain long kamapim gut tok, na ol i lain long ol narapela samting tu i save helpim ol long mekim gut wanpela wok. Na taim ol i stap yet long haiskul, sampela i save lain long paitim taipraita, o ol i lain long kompiuta, o wok mekenik, na ol kain wok olsem. Taim ol i lain long mekim dispela kain wok, i no hatwok long ol i kisim wanpela wok haptaim, long wanem i gat planti kain wok olsem. Tru, planti yangpela i no laik mekim sampela ‘wok long han bilong ol,’ tasol Baibel i save litimapim dispela kain wok. (Efesus 4:28; lukim tu Sindaun 22:29.) Krais Jisas yet em i bin lain gut tru long mekim wanpela wok, olsem na ol man i save kolim em olsem man bilong wok kamda!​—Mak 6:3.

Long sampela kantri planti manmeri tru i bin winim skul yunivesiti na ol i laik painim wok, olsem na sapos man i no bin lain gut long mekim wanpela wok, em bai hatwok long kisim wanpela wok, maski em i wanpela wok nating tasol. Tasol i gat sampela skul i stap na yu ken lain long mekim sampela wok, olsem skul vokesenel, na skul tek, na i gat sampela kos yu ken mekim inap sotpela taim, na i no gat bikpela pe bilong baim ol dispela kain skul, na yu no lusim planti yia samting long kisim save long mekim ol dispela wok. Na yu mas tingim wanpela bikpela samting olsem: God i tok promis pinis long lukautim ol man i save tingim wok bilong em pastaim.​—Matyu 6:33.

Sampela ples i gat planti wok mani na ol skul vokesenel na skul tek samting, na sampela ples i no gat planti. Na ol yangpela tu, save na laik bilong ol i narapela narapela kain, na sampela i gat save long mekim narapela wok, na sampela i gat save long mekim narapela wok. Na wok bilong autim tok bilong God long olgeta de em i wanpela gutpela wok tru bilong helpim yu​—tasol em i samting bilong yu yet long tingim, olsem yu laik mekim o nogat. Olsem na yu wantaim papamama i mas skelim na tingim gut wanem kain skul i gutpela bilong helpim yu yet na wanem kain wok bai yu lain long mekim. Olsem Baibel i tok, ‘olgeta wan wan i mas karim hevi bilong ol yet’ taim ol i skelim dispela kain samting.​—Galesia 6:5.

Olsem: Sapos papamama i strong long yu mas i go long yunivesiti, na sapos yu stap yet long han bilong ol, orait yu mas bihainim tok bilong ol. (Efesus 6:​1-3) Sapos yu inap slip yet long haus bilong papamama na go long yunivesiti, em gutpela. Tasol sapos yu slip yet long haus bilong papamama, o yu mas slip long yunivesiti, yu mas was gut. Yu mas skul tasol na yu no ken insait long ol narapela samting ol yangpela i save mekim long yunivesiti. Sapos yu mas go long yunivesiti, orait skelim gut ol samting yu laik lain long en. Gutpela sapos yu lain long mekim wanpela wok​—maski lain long kisim ol save na tingting bilong ol man bilong dispela graun i no gat as bilong en. Skelim gut ol yangpela yu laik poroman wantaim ol. (1 Korin 15:33) Yu mas i go long olgeta miting na autim tok na stadi long ol tok bilong Baibel bambai yu inap i stap strong long ol samting bilong spirit. Sampela yangpela ol i mas bihainim tok bilong papamama na ol i go long yunivesiti, tasol ol i tingim sampela kos i no pulim bikpela hap taim bilong ol, olsem na ol i gat taim bilong mekim wok painia haptaim long sampela mun.

Taim yu tingim wanem wanem wok bai yu lain long mekim, tingim gut dispela samting na beten askim Jehova long givim sampela tingting long yu. Sapos yu mekim olsem, bai wok bilong yu i helpim yu long i stap belgut na amamas, na bai yu inap ‘bungim ol gutpela samting bilong yu long heven.’​—Matyu 6:20.

Toktok Wantaim long Ol Dispela Askim

◻ Bilong wanem sampela taim ol wok mani i no save helpim man long i stap belgut na amamas?

◻ Bilong wanem olgeta yangpela Kristen i mas tingting long mekim wok painia, olsem mekim wok bilong God long olgeta de?

◻ Sampela i save tok, sapos yu skul long yunivesiti, dispela bai helpim yu olsem wanem? Tru em inap helpim yu olsem ol i tok, o olsem wanem?

◻ Taim yu skul long yunivesiti, wanem ol samting inap painim yu na yu mas lukaut long dispela samting?

◻ I gat wanem ol narapela kain skul bilong helpim ol yangpela long lain na kisim save long mekim wanpela wok?

[Rait long pes 177]

‘Maski man i winim skul yunivesiti, i no olsem em inap kisim kwik wanpela gutpela wok’