Olsem Wanem long Kisim Bikpela Save long Skul?

Baibel i tokim ol papamama ol “i mas lukautim [ol pikinini] na skulim ol long tok bilong [Jehova].” (Efesas 6:4, NT) Dispela kain skul inap helpim tru pikinini, winim skul bilong kisim save bilong graun.

Na wanpela papa long Naijiria em tu i tok olsem, na em i tok: “Olgeta taim mi save toktok wantaim ol pikinini bilong mi long ol samting bilong spirit, olsem teks bilong de samting. Mi laik helpim ol bel long Jehova na bihainim tok bilong em. Na mi laik helpim ol long kisim strongpela bilip.

“Mi save long skul i gat sampela pasin nogut i stap, olsem na mi no salim ol i go long skul ol pikinini i mas slip long en. Ol i go long skul long san na ol i kam bek long haus long olgeta de na bai mi ken lainim ol long tok bilong Baibel. Wanpela taim wanpela maniman i tokim pikinini meri bilong mi long i go lukim em long haus bilong em. Mi go lukim dispela man, na nau mi save, em i laik mekim pasin nogut long pikinini. Mi amamas long pikinini i no save stap long skul em ol sumatin i slip long en. Em i stap wantaim mi na mi lukautim em.

“Mi tokim ol pikinini long ol i ken mekim wok painia taim ol i bikpela. Taim 3-pela i lusim skul ol i kirap long mekim wok painia. Taim Maikel i stap yet long skul em i bin tok em i laik mekim wok kemis. Mi tokim em, sapos em i go long yunivesiti na em i lain long dispela wok, pasin bilong graun bai daunim em. Mi bin lukim sampela yangpela ol i go long yunivesiti na ol i no laikim moa ol samting bilong spirit.

“Maikel i tingim ol dispela samting, olsem na em i no i go long yunivesiti. Em i kirap long mekim wok painia. Em i maritim wanpela meri, em tu i bin kirap long mekim wok painia taim em i lusim skul. Tupela i mekim wok painia, na nau tupela i wok long Betel [em brens-ofis bilong Sosaiti Wastaua] long Lagos.”

Na narapela yangpela man, nem bilong em Kristen, em papamama na pupu bilong em i lainim em long tok i tru, na taim em i lusim skul em i mekim wok painia na em i tok em i laik i stap olgeta long wok painia.

Tasol papa bilong em i laik bai em i go long yunivesiti na kisim bikpela save bambai em i ken wok mani long bihain. Olsem na em i strong long Kristen i mas i go long yunivesiti.

Kristen bai mekim wanem? Em i save Baibel i tok em i mas bihainim tok bilong papa, olsem na em i go long yunivesiti. (Efesas 6:1) Tasol long yunivesiti em i mekim ol samting bambai em i ken i stap strong long ol samting bilong spirit. Kos bilong em i no pulim olgeta hap taim bilong em, olsem na em i kirap mekim wok painia wantaim skul.

Papa i kros long dispela samting, tasol bihain em i no kros moa. Kristen i tokim papa: “Yu bin mekim planti samting bilong helpim mi, na mi tenkyu long yu. Na mi laik bihainim tok bilong yu, olsem na mi go long yunivesiti olsem yu tok. Tasol mi dediket pinis long Jehova, olsem na mi mas tingim laik bilong Jehova i namba wan na i mas go pas long olgeta narapela wok. Mi ting wok painia em i namba wan rot bilong mekim wok bilong Jehova.”—Matyu 6:33; Eklisiastis 12:1

Dispela tupela yangpela i kisim gutpela blesing. Ol Kristen i mas ting olsem wanem long ol save bilong skul? Kaunim narapela hap.