Skulim Ol Man i Gat Pasin Daun Long Wokabaut Long Rot God i Makim
1 Long taim bilong ol aposel, ol disaipel bilong Krais i gat nem olsem ol i bihainim “rot” bilong Jisas. (Ap. 9:2) Pasin bilong bihainim lotu Kristen tru i mas bosim olgeta samting man i mekim. (Snd. 3:5, 6) Olsem na taim yumi mekim ol Baibel stadi, yumi mas helpim ol sumatin long kisim stretpela save long ol tok bilong Baibel, tasol i no dispela samting tasol. Yumi mas wok tu long helpim ol long wokabaut long rot Jehova i makim.—Sng. 25:8, 9.
2 Laikim Tru Jehova na Jisas: Em i hatwok long yumi ol sinman long mekim ol samting na bai tingting, pasin, na toktok i ken stret wantaim laik bilong God! (Ro. 7:21-23; Ef. 4:22-24) Tasol pasin bilong laikim tru God na Pikinini bilong em i save kirapim bel bilong ol man i gat pasin daun na ol i gat laik long mekim olsem. (Jo. 14:15; 1 Jo. 5:3) Olsem wanem yumi inap helpim ol Baibel sumatin bilong yumi long kisim dispela pasin laikim?
3 Helpim sumatin bilong yu long kisim save long Jehova i wanem kain man. Wanpela brata i tok: “Ol man i no inap laikim wanpela man ol i no save long em. Olsem na taim mi kirapim wanpela Baibel stadi mi save skulim ol long nem bilong God long Baibel, na mi wok long painim rot bilong kamapim ol gutpela pasin bilong Jehova.” Wanpela gutpela rot long mekim olsem em long rot bilong kamapim klia ol gutpela pasin bilong Jisas. (Jo. 1:14; 14:9) Na tu, mekim wok long blok bilong riviu long pinis bilong olgeta wan wan sapta long buk Baibel i Tok bilong helpim ol sumatin long tingim ol gutpela pasin bilong God na Pikinini bilong em.
4 Stap Olsem Gutpela Piksa: Long pasin bilong yumi, yumi inap skulim ol man na soim rot long ol long wokabaut long rot God i makim. (1 Ko. 11:1) Olsem: Em i no pasin bilong planti sumatin bilong Baibel long kamapim bilip bilong ol long ol man em ol i no save long ol. Olsem na yumi no ken les kwik long helpim ol long kisim pasin laikim, bilip, na strongpela bel bilong ol i ken insait long dispela wok bilong autim tok na kamapim disaipel. (2 Ko. 4:13; 1 Te. 2:2) Yumi gat laik long helpim ol sumatin bilong yumi na dispela bai kirapim yumi long go wantaim ol na helpim ol taim ol i kirap mekim wok autim tok.
5 Gutpela pasin bilong yu inap skulim ol sumatin long ol narapela bikpela samting long i stap bilong ol olsem Kristen. Taim yu go lukim ol sikman o yu tok amamas long ol lain i kam long ol miting bilong kongrigesen, ol i lukim klia pasin bilong laikim narapela. (Jo. 15:12) Taim yu insait long wok bilong klinim Haus Kingdom o yu mekim sampela wok bilong helpim ol narapela, yu skulim ol long pasin bilong helpim ol narapela. (Jo. 13:12-15) Taim ol i lukim olsem yu save kisim liklik samting tasol bilong skin, ol bai kliagut long mining bilong tok “wok pastaim long painim kingdom.”—Mt. 6:33, Nupela Testamen na Ol Sam.
6 Wok bilong skulim ol narapela long Tok Bilong God na kamapim disaipel em i bikpela wok tru. Tasol yumi amamas tru long lukim ol man i gat pasin daun ol i “bihainim tok tru”!—3 Jo. 4.
[Askim Bilong Stadi]
1. Wanem ol samting i insait long wok bilong kamapim disaipel?
2. Wanem samting inap kirapim Baibel sumatin long bihainim ol lo bilong God?
3. Olsem wanem yumi inap helpim ol sumatin long laikim tru Jehova na Jisas?
4. (a) Bilong wanem i hatwok long planti sumatin long autim tok? (b) Olsem wanem yumi ken helpim ol sumatin bilong yumi long kirap mekim wok autim tok?
5. Olsem wanem gutpela pasin bilong yu inap helpim ol sumatin long save long wanem samting i insait long pasin bilong bihainim ol lo bilong God?
6. Wanem samting i save kamap taim yumi helpim ol man i gat pasin daun long mekim wok bilong Jehova?