Baibel i Tok Wanem?
Pasin Pamuk—Lusim Tingting o Nogat?
“YUPELA i mas lusim rong bilong dispela man. Olsem na Papa bilong yupela i stap long heven em bai i lusim rong bilong yupela.” (Mak 11:25) Dispela tok bilong Jisas i kamapim sampela bikpela askim sapos wanpela marit i mekim pasin pamuk. Olsem: Sapos man bilong wanpela meri Kristen i pamuk, meri i mas lusim tingting long dispela rong na marit i no ken bagarap?a Sapos meri i tingting long katim marit, em i no inap stap gut long God? Baibel i ken helpim yumi long save long bekim bilong ol dispela askim.
Yumi Mas Lusim Olgeta Rong Man i Mekim?
Olsem wanem? Tok bilong Jisas olsem “yupela i mas lusim rong,” i makim olgeta rong, olsem rong bilong poroman sapos em i pamuk? Wanpela Kristen i mas lusim tingting long dispela kain rong? Bilong helpim yumi long save gut long tok bilong Jisas, yumi mas tingim sampela tok moa em i bin mekim long lusim rong bilong man.
Olsem: Yumi inap save long wanpela bikpela samting long lusim rong bilong narapela taim yumi skelim tok bilong Jisas long Luk 17:3, 4. Em i tok: “Sapos brata bilong yu i mekim sin, yu mas tokim em long stretim pasin bilong em. Na sapos em i tanim bel, orait yu mas lusim sin bilong em. Na sapos em i mekim sin long yu inap 7-pela taim long wanpela de, na 7-pela taim em i kam bek long yu na i tok, ‘Mi sori,’ orait yu mas lusim sin bilong en.” Tru, taim narapela i rongim tru wanpela man tasol em i tanim bel na hevi long rong em i bin mekim, man i no gat rong i mas hatwok long lusim rong bilong dispela man. Jehova i save mekim olsem. Sapos yumi laik Jehova i lusim rong bilong yumi, yumi mas tanim bel tru.—Luk 3:3; Aposel 2:38; 8:22.
Olsem na sapos wanpela man marit i pamuk na em i no tanim bel em i wokabaut yet long pasin bilong sin, ating yumi ken save bilong wanem meri i no laik lusim rong bilong man, a?—Skelim wantaim 1 Jon 1:8, 9.
Lusim Rong—Olsem Wanem Long Ol Hevi?
Tasol olsem wanem sapos man i bin mekim pasin pamuk em i tanim bel? Taim man i tanim bel i gat as bilong lusim rong bilong em. Tasol maski poroman i lusim rong bilong em, olsem wanem? Man i no gat hevi moa long dispela pasin nogut em i bin mekim? Tingim sampela samting Jehova i bin mekim bilong lusim rong bilong ol man.
Taim ol Israel i harim ripot nogut bilong ol 10-pela man i bin go bilong lukstil long Kenan, ol i bikhet long Jehova, olsem na Moses i krai long Jehova olsem: “Mi askim yu long rausim sin bilong ol dispela manmeri.” Jehova i bekim tok olsem: “Bai mi lusim sin bilong ol, olsem yu askim mi long mekim.” Olsem wanem? Israel i no bin kisim hevi long pasin bikhet ol i bin mekim? Ol i kisim. Jehova i tok moa olsem: “I no gat wanpela bilong ol dispela manmeri inap i go insait long dispela kantri mi bin promis long givim ol tumbuna bilong yupela. Nogat tru.” (Namba 14:19-23) Jehova i truim dispela tok bilong em. Ol manmeri i bin lusim Isip ol i no bin go insait long Graun Bilong Promis, Josua na Kalep tasol i go insait.—Namba 26:64, 65.
Na i olsem tu taim King Devit i mekim sin wantaim Batseba na profet Natan i mekim sampela tok bilong stretim em. Devit i tanim bel na em i tok: “Mi mekim sin long ai bilong Bikpela.” Natan i bekim tok long Devit olsem: “Bikpela i rausim dispela sin bilong yu.” (2 Samuel 12:13) Tasol maski Jehova i lusim rong bilong Devit, Devit i karim hevi long rong em i bin mekim inap long taim em i dai.—2 Samuel 12:9-14; lukim tu 2 Samuel sapta 24.
Sapos yumi tingim ol dispela samting i bin kamap bipo, yumi ken save Jehova i Man bilong lusim rong bilong ol man i tanim bel, tasol dispela i skulim yumi tu long wanpela bikpela samting olsem: Yumi no ken mekim sin na ting yumi inap abrusim strafe. (Galesia 6:7, 8) Maski man i mekim rong i tanim bel, i no olsem em i no ken painim hevi long dispela rong em i bin mekim. Orait olsem wanem? Ating meri bai lusim rong bilong man i bin pamuk—olsem em i no bel nogut moa long em—tasol em i tingting yet long katim marit?
Lusim Rong na Katim Marit
Taim Jisas i mekim wok bilong em, inap tripela taim em i bin stori long pasin bilong katim marit. (Matyu 5:32; 19:3-9; Luk 16:18) Tasol taim em i stori long katim marit, i no gat wanpela taim Jisas i stori long lusim rong bilong poroman. Long Matyu 19:9 Jisas i tok: “Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.” Jisas i tok, pasin pamuk i givim rot long poroman i no gat rong long katim marit na i stret long lo bilong Baibel. Tasol Jisas i no tok, sapos man i pamuk meri i mas katim marit. Tasol em i tok klia, sapos em i laik, em inap katim marit.
Marit i save pasim man na meri wantaim. (Rom 7:2) Tasol taim wanpela i pamuk, dispela inap mekim na tupela i no pas gut moa. Taim dispela kain hevi i kamap, poroman i no bin pamuk i mas tingting long tupela samting. Namba wan: I gutpela em i lusim rong bilong poroman o nogat? Olsem yumi stori pinis, meri i mas save man i tanim bel tru o nogat—em bikpela samting. Sapos man i tanim bel ating isi isi meri inap lusim rong bilong em—olsem em i no bel nogut moa long em.
Namba 2 samting meri i mas tingim i olsem: I gutpela em i katim marit? Tasol ating yumi laik save, bilong wanem meri i tingting long katim marit sapos em i lusim rong bilong man?b Orait, olsem wanem sapos bipo man i bin mekim nogut long em na ol pikinini, na nau em i pret? Na olsem wanem sapos meri i pret man i bin kisim sik AIDS na sapos em i slip gen wantaim em, em inap kisim dispela sik? Na olsem wanem sapos em i bel hevi na em i ting em i no inap bilip moa long man bilong em? Taim yumi tingim ol dispela samting, yumi ken save bilong wanem meri inap lusim rong bilong man (olsem em i no bel nogut moa long em), tasol em i tingting long katim marit, long wanem, em i pilim olsem em i no ken stap moa wantaim em. Sapos em i no bel nogut moa, dispela inap helpim meri long stretim sindaun bilong em. Na ating sapos bihain em i mas toktok wantaim man long sampela samting, em i no ken tok kros—em inap toktok gut wantaim man.
I gutpela meri i katim marit o nogat, em samting bilong em yet i mas skelim. Em i mas tingting gut na beten, na tingim olgeta hevi samting inap kamap sapos em i katim marit. (Song 55:22) I no stret sapos ol narapela i tokim meri long katim marit o long stap wantaim poroman bilong em—em samting bilong em yet. (Skelim wantaim Galesia 6:5.) Tingim: Jisas i no toksave long samting poroman i no gat rong i mas mekim. Olsem na yumi save, Jehova i no kros sapos man o meri i katim marit na i stret wantaim lo bilong Baibel.
[Ol Futnot]
a Taim mipela stori long poroman i no gat rong, mipela tok “meri,” tasol ol tok mipela i kamapim i bilong man Kristen tu, em man i no bin mekim rong.
b Sapos meri i slip gen wantaim man bilong em, dispela i makim olsem em i laik stap wantaim poroman bilong em. Olsem na long lo bilong Baibel i no stret sapos em i katim marit.
[Piksa Kredit Lain long pes 22]
Life