Pas Bilong Ol Man
Bihainim Tingting Bilong Yumi Yet Planti taim mi save larim tingting bilong mi i wokabaut na tingting long ol kain kain samting i no klin. Olsem na mi bin kirap nogut long kaunim stori “Baibel i Tok Wanem? Yu Ting Baibel i No Orait Long Man i Bihainim Tingting Bilong Em Yet?” (Jun 8, 1995) Mi no bin ting sapos wanpela man i tingting oltaim na bihain em i mekim wanpela rong, i olsem wanpela sin long ai bilong Jehova. Mi laik tok tenkyu long Jehova long dispela gutpela tok bilong helpim mi long stretim ol tingting nogut bilong mi.
J. P., long Filipin
Sampela Tok i Kam Long Olgeta Hap Mi laik tok amamas long yupela long pasin bilong yupela long redim na raitim gut Kirap! Mi save amamas tru long kaunim stori “Sampela Tok i Kam Long Olgeta Hap.” Maski dispela hap i save stori liklik tasol long ol kain kain samting, ol gutpela tok bilong en i bin helpim mi long senisim sampela pasin bilong mi. “Sampela Tok i Kam Long Olgeta Hap” i gat ol gutpela stori tru bilong kaunim.
T. C. C., long Brasil
Lukautim Ol Man Mi bin tingting planti tru long ol Witnes Bilong Jehova long Ruanda. Mi kaunim pinis stori “Ol i Lukautim Ol Man i Kisim Hevi Long Ruanda” (Ogas, 8 1995). Nau mi save long ol samting i wok long painim ol. Dispela stori i tok, planti long dispela hap ol i dai. Wanpela samting i helpim mi long pilim gutpela liklik em olsem, mi inap tingting long bungim ol long Paradais. Tasol nau, mi bai beten long ol wanbilip bilong mi long Ruanda.
J. D., long Japan
Ol Meri Singel i Gat Pikinini Tenkyu long stori “Ol Yangpela i Laik Save . . . Ol Meri Singel i Gat Pikinini Ol i Ken Mekim Wanem?” (Julai 8, 1995) Yupela i bin tok olsem ol meri singel i save kisim bel, long wanem, ol i mekim wanpela pasin i no stret, tasol yupela i no stori planti long dispela samting bilong mekim bel bilong ol yangpela meri i hevi moa yet, nogat; yupela i bin kamapim sampela gutpela tok bilong helpim ol.
J. D., long Amerika
Mi bin kamap wanpela mama singel tenpela yia i go pinis. Tasol Jehova na papamama Kristen bilong mi i bin helpim mi gut tru na mi inap karim ol hevi. Bihain long taim mi pinisim skul, inap sikspela yia mi bin mekim wok bilong Jehova long olgeta de. Mi maritim wanpela man Kristen na nau em i mekim wok olsem wanpela elda long kongrigesen. Mi bin pilim tru pasin sori na marimari bilong Jehova na mi inap helpim ol narapela, long wanem, mi yet i bin pilim ol kain hevi olsem.
A. M., long Amerika
Mi no inap pasim aiwara bilong mi taim mi kaunim dispela stori. Mi bin karim wankain hevi olsem yupela i bin stori long en. Nau mi wanpela Kristen, na mi amamas mi inap mekim bikpela long pikinini meri bilong mi long gutpela rot.
C. R. S., long Brasil
Narapela Kain Sik Mi bin kirap long kaunim ol nius bilong yupela taim mi gat faipela krismas. Mi bin amamas tru long kaunim stori “Ol Narapela Kain Sik Long Guam.” (Epril 8, 1995) Mama bilong mi i bin i stap gut long wok bilong God i go inap long taim em i dai long 1972. Em i dai long wanpela kain sik olsem. Mi laik tok tenkyu long yupela long dispela stori em yupela i bin kamapim gut tru. Mi bin soim dispela nius long ol wanblut na pren bilong mi bambai ol i ken save olsem dispela nius bilong yupela em inap tru long helpim yumi.
W. A., long Amerika