Daunim Pasin Bilong Taiet Tru

ANIL i kisim nupela wok na kampani i tok em bai kisim bikpela pe na namba. Tasol nau em i mas wok long nait na long ol wiken tu, na sampela taim em i save wok inap 80 aua long olgeta wik, dispela i mekim na em i pilim taiet tru. Em i tok: “Mi pilim olsem i gat planti wok long mekim, na mi wanpela tasol i mas mekim olgeta dispela wok. Mi tingting olsem, ‘Mi mekim wanem? Sapos mi no mekim sampela senis, pasin bilong wok oltaim bai kilim mi i dai.’” Anil i wok ovataim na em i no malolo, olsem na em i pilim taiet tru.

Ol man i wok oltaim ol i save taiet tru, tasol dispela i no wankain long pasin bilong pilim taiet long olgeta de. Dispela pasin bilong taiet em yumi stori long en i save mekim ol man i pilim olsem bodi i nogat strong na ol i no inap bosim pasin na tingting bilong ol. Ol man husat i taiet tru, ol i no save mekim gut wok bilong ol na ol i givap hariap. Na tu, ol wok painimaut i soim olsem sampela bilong ol dispela man i save kisim ol bikpela sik na ol sik bilong tingting.

Wanem samting i mekim man i taiet tru? Ol man i save taiet tru, long wanem, long olgeta de ol i mekim planti wok. I gat hevi bilong mani, olsem na planti kampani i laik bai ol man i mas wok ovataim, tasol sampela taim ol i no baim ol wokman stret long ol aua ol i wok long en. Na tu, long nau teknoloji i mekim na ol man inap wok oltaim na ol i nogat taim long mekim ol arapela samting. Na sampela man i pilim olsem bos inap pinisim ol long wok o ating ol i no inap long makim hamas wok ol bai mekim, o ol i pilim olsem bos i mekim wansait pasin. Ol kain samting olsem inap mekim man i pilim taiet tru. Na tu, ol inap taiet tru sapos ol i no kliagut long wok ol bai mekim o ol i bel hevi long wanwok bilong ol.

Sampela taim disisen bilong ol man yet i mekim na ol i taiet tru. Ol man i laik kisim gutpela wok mani we ol inap kisim bikpela pe, na sampela i laik wok ovataim. Tasol bihain ol i luksave olsem ol i nogat taim bilong malolo, na dispela i mekim na ol i pilim taiet tru.

Sapos yu pilim taiet tru long ples wok, bai yu mekim wanem bilong kisim bek strong? Ating yu inap pilim olsem yu no inap lusim pasin bilong wok oltaim. Tasol tingim 4-pela samting yu inap mekim bilong daunim pasin bilong taiet tru. Na tu, yu inap mekim sampela samting moa.

1. SKELIM OL BIKPELA SAMTING.

Wanem samting i bikpela samting long yu? Planti man i tingim pasin bilong pas gut wantaim famili na gutpela helt olsem bikpela samting long i stap bilong ol. Tasol yu no inap mekim ol dispela samting sapos yu taiet tru.

Taim yu save long wanem ol samting i bikpela samting, bai yu redi long mekim ol bikpela disisen na yu no inap bihainim laik bilong ol narapela. Olsem, ating yu luksave olsem wok bilong yu i mekim na yu taiet tru. Tasol yu inap ting, ‘Mi no inap painim narapela wok mani o wok sampela aua tasol bikos mi nidim mani!’ I tru olsem olgeta man i nidim mani, tasol skelim gut hamas mani yu nidim, na wanem ol samting i bikpela samting long yu.

No ken bihainim tingting bilong ol narapela long makim wanem ol samting i bikpela samting. Tingting bilong yu i no wankain long bos bilong yu, olsem na ol samting yu pilim olsem i bikpela samting, ating em liklik samting long em. Sampela man i tingim wok mani olsem bikpela samting, tasol i no olsem yu mas bihainim tingting bilong ol.

2. LUSIM SAMPELA SAMTING LONG SINDAUN BILONG YU.

Bilong daunim presa na bai yu gat taim long mekim ol samting i bikpela samting moa, askim bos long daunim ol aua bilong yu long wok, o ating yu ken tokim em long makim ol narapela long helpim yu long mekim wanpela wok, o yu inap painim narapela wok. Maski yu mekim wanem disisen, dispela i makim olsem yu mas senisim pasin bilong tromoi mani, na tu, yu mas mekim sampela senis long sindaun bilong yu. Pastaim bai yu pilim olsem i hatwok long mekim ol dispela senis, tasol isi isi bai yu luksave olsem yu inap mekim.

Long planti kantri ol man i save mekim wok bisnis long baim na salim ol samting. Na dispela i kirapim ol man long ting olsem pasin bilong kisim planti mani kago inap mekim man i stap amamas tru. Tasol ol dispela samting i no mekim man i amamas. Sapos yu lusim sampela samting long sindaun bilong yu, bai yu gat planti taim long mekim ol narapela samting, na tu, yu inap stap amamas. Bilong mekim olsem, kisim pasin bilong seivim mani na no ken kisim dinau long narapela. Toktok wantaim famili bilong yu long ol senis yupela i laik mekim na sapotim narapela narapela.

3. KISIM MALOLO LONG WOK.

Sapos yu gat planti wok long mekim o i gat wanpela hevi long ples wok, toktok wantaim bos bilong yu long dispela samting. Na tu, yu inap mekim ol samting bilong helpim bos bilong yu, na helpim yu yet. Kamapim klia long bos olsem yu amamas long wok, tasol tokim em olsem i gat sampela wok em yu no inap long mekim.

Yusim savetingting na skelim gut olgeta samting. Sapos yu laik daunim ol aua bilong yu long wok, ating bos bilong yu bai daunim pe bilong yu. Na tu, tingim olsem ating em inap pinisim yu long wok, so redim tingting long samting yu bai mekim. Bikpela samting yu mas tingim em olsem, em isi long painim wok taim yu wok yet long wanpela kampani.

Maski bos bilong yu i wanbel long samting yu laik mekim, em inap givim planti wok na dispela bai putim presa long yu. Wanem samting inap helpim yu long wokim ol disisen na bihainim? No ken senisim ol disisen bilong yu. Taim yu mekim olsem ating bos bilong yu bai wanbel long ol tok yupela i pasim long ol samting long sait bilong wok.

4. KISIM GUTPELA MALOLO.

Maski i no gat hevi long sait bilong wok, ating yu inap pilim presa, o yu gat hevi wantaim wanpela, o ol arapela samting i kamap. Olsem na kisim sampela haptaim long malolo na mekim ol samting bilong kisim amamas. Tingim, i no olsem yu mas lusim bikpela mani na bai famili i ken kisim amamas.

Soim olsem yu tingim ol narapela na yu laik i stap pren bilong ol, na no ken stori tumas long ol narapela long ol wok yu save mekim. Buk Your Money or Your Life i tok: “Pasin bilong yu i bikpela samting moa long wok mani bilong yu.” Sapos yu kisim biknem long wok yu save mekim, dispela inap mekim na i hatwok long lusim ol samting bilong wok.

Yu ting yu inap mekim ol senis we inap helpim yu long lusim pasin bilong taiet tru? Yes, yu inap mekim olsem. Anil, em yumi stori long en long dispela atikol i bin mekim olsem. Em i tok: “Mi ringim bos bilong mi na askim em sapos mi inap wok gen wantaim ol, na em i tok orait. Tasol ol i daunim pe bilong mi, na tu, mi sem long lukim ol wanwok bilong mi, long wanem, mi bin tokim ol olsem mi bai painim narapela wok. Maski i olsem, nau bel bilong mi i stap isi, na mi inap lusim bikpela haptaim long stap wantaim famili bilong mi, na mekim ol narapela samting we i bikpela samting long mi.”