Ol Samting Mipela i Lainim Long Andrew

MI DRAIVIM ka i go long wok, na mi amamas long tingim ol samting i bin kamap sampela de i go pinis. Mi kamap papa bilong wanpela pikinini man, em namba 2 pikinini bilong mi. Nau long dispela de meri bilong mi, Betty Jane, na liklik Andrew bai lusim haus sik na kam long haus.

Tasol paslain long ol i laik lusim haus sik, meri bilong mi i telefon. Taim mi harim nek bilong em, mi save em i tingting planti long wanpela samting, olsem na kwiktaim mi go long haus sik. Taim em i bungim mi, em i tok: “I gat hevi!” Mitupela i sindaun wantaim na wetim dokta i kam wantaim wanpela meri i gat save long ol sik bilong pikinini.

Tok bilong dispela meri i sutim tru bel bilong mipela na mipela i bel hevi stret. Em i tok: “Mipela i ting pikinini man bilong yutupela i gat wanpela kain sik ol i kolim Down’s syndrome.” Na em i tokim mipela em i ting kru bilong pikinini bai i no inap wok gut. Man! Ol narapela tok em i kamapim mi no inap kisim gut, i olsem kru bilong mi i dai na yau bilong mi i no inap harim tok​—⁠ai tasol i wok long kisim save.

Dispela meri i holim Andrew na soim mipela long wanpela samting em i bin lukim na em i save Andrew i gat sik. Ol masol long nek bilong em i no gat strong. Masol bilong ol nupela bebi i gat sik Down’s syndrome i olsem. Isi isi mipela inap tingim gut dispela hevi, na nau planti planti askim i pulap long tingting bilong mipela, olsem na bihain taim mipela i toktok wantaim dispela meri, mipela i givim ol askim long em. Wanem ol samting Andrew i no inap mekim? Mipela i mas was long wanem ol samting? Mipela inap skulim em long wanem ol samting na em inap save long en? Meri i tok, em i no inap bekim planti askim bilong mipela, long wanem, ol samting mipela yet bai mekim long Andrew, na sampela pasin em i bin kisim long mipela bai mekim na em inap mekim ol dispela samting o nogat.

Winim 20 yia nau mipela i bin wok strong long sori long Andrew na givim bel long em, em ol samting i stret mipela i mas mekim, na inap long save bilong mipela, mipela i bin skulim em. Tasol taim mipela i tingim ol dispela yia, mipela i save, i no olsem mipela tasol i bin givim ol samting long Andrew, nogat; em i bin givim planti samting long mipela.

Gutpela Tok

Taim Andrew i kam nupela long haus ol gutpela pren i kam na stori olsem wanem ol yet i bin winim hevi. Ol i laik helpim mipela, tasol mipela i save, olgeta tok bilong ol i no gutpela o inap helpim mipela. Tasol inap planti yia mipela mekim traim long ol dispela tok bilong ol na mipela i kisim tupela gutpela samting long en.

Sampela i laik mekim gut bel bilong mipela taim ol i tok i no olsem tingting bilong Andrew i bagarap. Tasol wanpela pren bilong bipo em i tokim mipela olsem: “No ken mekim olsem dispela hevi i no i stap! Sapos kwiktaim yu lain long ol samting em inap mekim na em i no inap mekim, kwiktaim bai yu senisim tingting bilong yu na wok wantaim em inap long skel bilong em.”

Taim mipela i bin karim dispela hevi bilong mipela, dispela tok i bin helpim tru mipela. Hevi i no inap pinis sapos yumi givim baksait long as bilong hevi. Planti taim yumi laik givim baksait long wanpela hevi, em pasin bilong yumi man, tasol sapos yumi mekim olsem inap longpela taim, dispela hevi i no inap pinis hariap na yumi no save tingim olsem “taim nogut i save painim yumi olgeta.”​—⁠Saveman 9:11.

Long ol yia mipela i bungim sampela papamama em pikinini bilong ol i no inap skul gut, o ol i mas go long wanpela kain skul bilong helpim ol pikinini i gat hevi long skul, mipela i bin ting​—⁠hamas bilong ol dispela pikinini ol i gat sik long kru o ol i gat narapela sik, olsem na ol i no inap skul gut. Ating sampela bilong ol dispela pikinini ol tu i gat sik, tasol yumi “no inap lukim sik bilong ol”​—⁠skin bilong ol i no olsem bilong Andrew​—⁠ol i gat gutpela skin na skin i olsem bilong ol narapela pikinini. Ol man inap save kwik long pikinini i gat sik Down’s syndrome. Tasol sampela kain sik yumi no inap luksave long en. Olsem na ating sampela papamama i laik pikinini bilong ol i mekim ol samting ol i no inap mekim, dispela i mekim na papamama na pikinini i bel hevi na kros.​—⁠Skelim wantaim Kolosi 3:21.

Na narapela samting mipela i bin lain long en i olsem: Pasin YU mekim long pikinini bilong yu bai helpim ol man long mekim wankain pasin long em. Ol samting yu mekim long pikinini, ol bai mekim tu.

Insait long 30 o 40 yia samting, tingting bilong ol man long ol man i gat sik long kru o long skin i bin senis. Tasol planti senis i kamap, long wanem, ol sikman yet, o wanblut bilong ol, o ol dokta samting, ol yet i bin kirap na mekim sampela samting. Na sampela papamama i no pret long lukautim pikinini bilong ol​—⁠ol i no putim pikinini long haus sik bilong ol longlong man samting. Dispela i mekim na ol man i senisim tingting bilong ol long ol dispela kain sikman. Inap 50 yia i go pinis klostu olgeta buk bilong dokta i save stori long Down’s syndrome, ol i bin kisim dispela save long ol haus sik bilong ol dispela kain man. Tasol nau tingting bilong ol dokta i senis, long wanem, papamama na sampela man moa ol i bin mekim narapela kain pasin long ol dispela kain sikman.

Lain Moa Yet Long Gutpela Pasin

I no hatwok long giamanim bel bilong yumi na yumi ting yumi save mekim gut long ol narapela. Tasol inap long yumi yet i gat wanpela hevi, yumi no save gut long planti hevi o yumi no inap pilim hevi bilong narapela.

Andrew i helpim mipela long save, planti man i sot long sampela samting ol i no gat rot long senisim sindaun bilong ol. Dispela i mekim na mipela askim skin bilong mipela yet olsem: Mipela i gat wanem kain tingting na pasin long ol man i no gat strongpela skin, o ol i no inap kisim kwik save, o ol i lapun?

Planti taim wanpela samting i save kamap taim mipela stap wantaim Andrew long wanpela hap i gat planti man, na ol man i lukim pasin mipela i mekim long Andrew olsem mipela i no sem long em. Ol man mipela i no save long ol, ol i kam long mipela na stori long hevi bilong ol yet. I olsem Andrew i stap wantaim mipela, olsem na ol i ting mipela inap pilim hevi bilong ol.

Strong Bilong Sori

Andrew i skulim mipela long planti samting, tasol wanpela bikpela samting em i skulim mipela long en em olsem: Pasin sori i no wanpela samting bilong kru tasol. Mi laik stori. Wanpela bikpela samting long lotu bilong mipela ol Witnes Bilong Jehova i olsem: Ol trupela Kristen i amamas long man bilong narapela skin o sindaun o kantri na mipela i no bel nogut long ol. Dispela bilip i strongim bel bilong mipela na mipela save ol brata sista bilong mipela long spirit bai orait long Andrew. Mipela i no tingim tok bilong ol dokta olsem Andrew bai i no inap long sindaun gut long ol miting bilong lotu na harim tok. Kirap long taim meri bilong mi i karim Andrew, mipela i bin kisim em i go long ol miting, na em i save go wantaim mipela long wok autim tok taim mipela i go long haus bilong ol man. Olsem mipela i ting ol bai mekim, ol brata sista insait long kongrigesen i mekim gut long Andrew na sori long em.

Tasol sampela i save mekim sampela samting moa. Ol i laikim tru Andrew. Na maski tingting bilong Andrew i no wok gut, em i save ol i laikim em tru. Taim em i stap wantaim ol dispela man, em i no sem moa, na taim ol miting i pinis, wantu em i go long ol. Planti taim mipela i lukim, maski planti man i stap, Andrew i save long ol man i laikim em tru.

Na pasin sori bilong Andrew i no liklik. Em i save mekim gutpela pasin isi long ol bebi, ol lapun, na ol animal ol man i save lukautim. Sampela taim em i save go long bebi bilong wanpela man mipela i no save long em, na taim em i mekim olsem mipela save stap klostu long Andrew, nogut em i pilai wantaim bebi na em i no isi long em. Tasol planti taim mipela sem, long wanem, taim Andrew i holim bebi em i mekim olsem wanpela gutpela mama i save mekim long bebi bilong em!

Ol Samting Mipela i Bin Lain Long En

Skin bilong ol pikinini i gat sik Down’s syndrome i wankain liklik, olsem na mipela i bin ting pasin bilong ol tu i wankain. Tasol nogat. I no longtaim na mipela i save, planti pasin bilong ol i wankain long famili bilong ol, na olgeta i gat pasin bilong ol yet.

Andrew i olsem planti yangpela, em i no amamas long wok strong. Tasol mipela i kisim save olsem, sapos mipela i no les long lainim em planti taim long wanpela wok inap long em inap mekim, em i no ting em wanpela wok, em i ting em wanpela pilai. Ol wok bilong em long haus em i save mekim planti taim, em i amamas long mekim​—⁠ol nupela wok tasol em i no amamas tumas long mekim.

Taim mipela tingting i go bek long ol samting mipela i bin lain long en long i stap bilong Andrew, mipela save long wanpela bikpela samting. Klostu olgeta samting mipela i bin lain long en taim mipela mekim bikpela long Andrew, i bin helpim mipela long pasin mipela i mekim long ol narapela pikinini bilong mipela na long ol man.

Olsem: Yumi olgeta i amamas sapos wanpela i sori tru long yumi, a? Sapos wanpela man i skelim save na strong bilong yu wantaim bikpela save na strong bilong narapela man, ating yu bai bel hevi long dispela samting na yu ting pasin em i mekim i no stret, a? Na ating pastaim yumi planti i no amamas long mekim wanpela kain wok, tasol yumi mekim i go i go na bihain yumi amamas long mekim dispela wok, a?

Sampela taim mipela i no bin kisim stretpela tingting long Andrew, olsem na planti taim mipela i krai, tasol planti taim mipela i bin kisim ol bikpela na liklik amamas wantaim em. Na mipela i save, Andrew i bin helpim mipela long stretim sampela pasin bilong mipela. Mipela i save, maski wanpela samting i painim mipela i hatwok tru, em i no inap bagarapim mipela, nogat; em inap helpim mipela long kamap gutpela man.

Na mipela i save tingim narapela bikpela samting. Mipela save amamas long tingim dispela taim bihain na mipela bai lukim sik bilong Andrew i pinis. Baibel i tok promis olsem klostu nau God bai kamapim nupela taim na stretpela pasin tasol bai stap long en, na ol man i aipas, yaupas, lek nogut, o mauspas​—⁠skin bilong ol bai kamap gutpela olgeta. (Aisaia 35:​5, 6; Matyu 15:​30, 31) Tingim bikpela amamas bilong ol man long lukim tingting na skin bilong olgeta man i kamap gutpela na ol inap mekim gutpela wok long en! (Song 37:​11, 29)​—⁠Wanpela man i salim dispela stori i kam.

[Blok long pes 13]

Sik i Bikpela Olsem Wanem

Sampela saveman i tok yumi ken tilim ol man i gat sik Down’s syndrome i go long 3-pela lain. Olsem: (1) Educable (Sik i liklik): ol inap kisim bikpela save liklik. Sampela bilong ol i insait long ol pilai bilong televisen samting, o ol i mekim wok tisa. Na sampela inap lukautim ol yet, wan wan taim tasol man i mas helpim ol. (2) Trainable (Sik i bikpela liklik): ol inap lain long mekim sampela wok. Ol inap lain long lukautim skin bilong ol yet, tasol wanpela i mas lukautim ol. (3) Profound (Bikpela sik): ol inap mekim ol liklik samting tasol, na olgeta taim man i mas lukautim ol.

Olsem wanem long Andrew? Nau mipela i save em i stap long dispela lain ol i kolim Trainable.