Ol Yangpela i Laik Save . . .

Mi Mas Autim Rong Bilong Mi?

“Mi sem nogut tru, mi no save long samting mi ken mekim. Mi laik go long papamama, tasol mi sem long mekim olsem.”​—⁠Em tok bilong Lisa.a

WANPELA yangpela meri i bel hevi na tok olsem. Inap sampela yia em i bin prenim wanpela man i no stap long tok i tru, na wanpela taim em i dring planti na em i kirap na pamuk wantaim dispela man.

Sori tru, sampela taim dispela kain samting i kamap, na sampela yangpela Kristen tu ol i save mekim olsem. Taim yumi no gat bikpela krismas na bikpela save, bai yumi popaia planti. Tru yumi olgeta inap mekim pasin kranki, tasol bikpela rong olsem pasin pamuk i narapela kain samting. (1 Korin 6:​9, 10) Yangpela i mekim bikpela rong i mas kisim helpim. Tasol em bai hatwok long autim rong bilong em.

Wanpela yangpela meri Kristen na em i singel, em i mekim maritpasin. Em i tingting long autim rong bilong em long ol elda bilong kongrigesen, na em i makim de bilong mekim olsem. Tasol em i senisim de na makim narapela de. Bihain, em i makim narapela de gen. Wanpela yia i pinis na nau em i autim rong bilong em!

‘Em Bai Kamap Ples Klia’

Sapos yu bin mekim bikpela rong, yu mas save taim yu haitim dispela rong, yu no bihainim gutpela tingting. Bihain dispela samting bai kamap long ples klia. Taim Mark i liklik em i brukim wanpela bilas ol i wokim long simen na pasim long banis bilong wanpela rum long haus. Em i tingting bek na tok: “Mi hatwok, tasol mi stretim gen wantaim glu, tasol i no longtaim na papamama i luksave olsem em i bin bruk.” Tru, yu no pikinini moa, tasol planti papamama i save sapos pikinini bilong ol i gat hevi.

Ann i gat 15 krismas em i tok: “Mi bin mekim ol tok giaman bilong haitim rong bilong mi, tasol dispela i mekim na hevi i go bikpela moa.” Planti taim ol tok giaman i save kamap long ples klia. Na taim papamama i save yu laik giamanim ol ating ol bai bel hevi stret, winim bel hevi bilong ol sapos yu bin autim rong bilong yu long ol.

Na bikpela samting moa, Baibel i tok: “Olgeta samting i stap hait, bihain bai em i kamap long ples klia. Na olgeta samting ol man i karamapim i stap, bihain bai ol i kamap long ples klia, na bai ol man i save long ol.” (Luk 8:17) Jehova i save long samting yumi bin mekim na em i save long ol samting yumi wok long mekim. Yu no inap hait long Jehova olsem Adam i no inap hait long em. (Stat 3:​8-11) Bihain, ol rong bilong yu inap kamap ples klia long ol narapela man.​—⁠1 Timoti 5:⁠24.

Na sapos yu haitim rong bilong yu, sampela hevi moa inap painim yu. Devit i tok olsem: “Taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta. Long san na long nait han bilong yu i mekim save long mi.” (Song 32:​3, 4) Tru tumas, man i haitim rong bilong em, bel bilong em i no inap stap isi. Em bai tingting planti, na bel i kotim em, na em i pret ol narapela bai kisim save long rong​—⁠olgeta dispela samting inap mekim na bel i bagarap. Rong i mekim na yu no pas moa wantaim ol pren na famili bilong yu. Na yu inap ting, yu no stap klostu moa long God! Yangpela Andrew i tok: “Bipo bel bilong mi i gat tok, long wanem, mi bin bagarapim bel bilong Jehova. Olgeta taim bel i bin kotim mi.”

Kamapim Rong

Olsem wanem? I gat rot bilong winim dispela bel hevi? Yes, i gat rot! Man bilong raitim Song i bin tok: “Bihain mi bin autim sin bilong mi long yu. Mi no haitim pasin nogut bilong mi. . . . Mi autim pinis na yu tekewe asua bilong mi na sin bilong mi tu.” (Song 32:5; skelim wantaim 1 Jon 1:⁠9.) Bel bilong Andrew tu i bin stap isi taim em i kamapim rong bilong em. Em i tok: “Mi beten strong long Jehova na askim em long lusim tingting long rong bilong mi.”

Yu inap mekim olsem tu. Beten long Jehova. Em i save long samting yu bin mekim, tasol long pasin daun kamapim rong bilong yu long rot bilong beten. Askim em long lusim tingting long rong bilong yu. Yu no ken surik long beten na yu ting yu man nogut tru na God i no inap helpim yu. Jisas i dai bambai yumi ken stap gut long ai bilong God maski yumi man bilong sin. (1 Jon 2:​1, 2) Na yu ken askim God long givim strong long yu inap long yu ken senisim pasin bilong yu. Sapos yu kaunim Song 51, ating dispela i ken helpim yu long beten long God olsem.

Toksave Long Papamama

Tasol i no olsem yu ken autim rong bilong yu long God na em tasol, nogat; i gat narapela samting yu mas mekim. Yu mas toksave long papamama. God i bin putim lo long ol olsem taim ol i mekim bikpela long yu, ol i mas ‘stretim gut yu na skulim yu long tok bilong Bikpela.’ (Efesus 6:⁠4) Ol i no inap mekim olsem sapos ol i no save long hevi bilong yu. Tru i hatwok long tokim ol na ating hevi bai kamap. Ol bai bel hevi long save long dispela samting, tasol ating bihain bel bilong ol bai kol liklik. Ating ol bai amamas yu bilip long ol na yu kamapim hevi bilong yu long ol. Tok piksa bilong Jisas long pikinini i bin lusim papa i stori olsem em i go na pamuk nabaut. Tasol taim em i kamapim rong bilong em, papa i amamas long kisim bek em! (Luk 15:​11-24) Ating papamama bilong yu tu bai amamas long helpim yu. Maski yu mekim wanem, ol i laikim yu yet.

Tru, ating yu pret yu bai bagarapim bel bilong papamama. Tasol taim yu autim rong bilong yu, dispela i no save bagarapim bel bilong papamama, nogat; pasin nogut yu bin mekim i save bagarapim bel bilong ol! Autim rong i olsem namba wan samting bilong mekim gut bel bilong ol. Ann, em bipo yumi stori long em, em i tokaut long papamama long rong bilong em, na bihain bel bilong em i stap isi.b

Narapela samting i save pasim man long autim rong bilong em i olsem: Nogut em i sem. Gutpela man Esra i no bin mekim rong, tasol taim em i autim ol rong bilong ol wantok Juda, em i tok: “God, mi sem nogut tru. Olsem na mi ting mi no inap i kam beten long yu.” (Esra 9:⁠6) Tasol i gutpela sapos yu sem taim yu bin mekim rong. Dispela i makim olsem maus bilong bel i mekim yet wok bilong en. Na bihain, isi isi sem bilong yu bai pinis. Andrew i tok: “I hatwok long tokaut long wanpela rong, na em i samting bilong mekim yumi i sem. Tasol taim yumi save olsem Jehova bai marimari moa yet na lusim rong bilong yumi, dispela i mekim na bel bilong yumi i stap isi.”

Tokaut Long Ol Elda

Sapos yu wanpela Kristen, yu no ken toksave long papamama tasol, i gat narapela samting yu mas mekim. Andrew i tok: “Mi save mi mas kamapim hevi bilong mi long ol elda. Mi amamas tru long save ol i stap bilong helpim mi!” Tru tumas, ol yangpela long lain Witnes Bilong Jehova, ol i gat rot long go long ol elda bilong kongrigesen bilong kisim helpim na strong, na i stret ol i go long ol. Tasol bilong wanem yu no inap beten tasol long Jehova na dispela em inap? Long wanem, Jehova i putim yu long han bilong ol elda na em i givim wok long ol bilong “was long [yu] oltaim.” (Hibru 13:17) Ol inap helpim yu na yu no ken pundaun gen long sin.​—⁠Skelim wantaim Jems 5:​14-16.

Yu no ken giamanim yu yet na ting yu inap helpim yu yet. Sapos yu gat strong long mekim olsem, ating yu no inap pundaun na mekim rong. Tru tumas, narapela i mas helpim yu. Andrew i strongim bel na mekim olsem. Andrew i givim wanem gutpela tok? Em i tok: “Mi laik kirapim ol man i mekim bikpela rong long kamapim bel bilong ol long Jehova na long wanpela wokman bilong em.”

Tasol yu ken tokaut long elda olsem wanem? Makim wanpela elda yu no pret long toktok wantaim em. Yu ken kirapim tok olsem: “Mi laik toktok long wanpela samting” o “Mi gat hevi” o yu ken tok, “Mi gat hevi na mi laik yu helpim mi.” Kamapim tru tingting bilong yu na elda i ken save yu tanim bel pinis na yu laik senisim pasin bilong yu.

‘Mi Pret Ol Bai Rausim Mi’

Olsem wanem? Dispela samting inap kamap? Tru, man i mekim bikpela rong em inap raus long kongrigesen, tasol dispela samting i no save kamap nating. Ol man i no laik tanim bel​—⁠ol i strong long bihainim yet pasin nogut bilong ol​—⁠ol dispela kain man i save raus. Sindaun 28:13 i tok: “Man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” Sapos yu go lukim ol elda bilong ol i ken helpim yu, dispela i makim olsem yu laik senisim pasin bilong yu. Bikpela wok bilong ol elda i bilong stretim bek man; ol i no man bilong givim strafe tasol. Ol i mas mekim pasin isi na gutpela pasin long lain bilong God. Ol i laik helpim yu long “wokabaut long ol stretpela rot.”​—⁠Hibru 12:⁠13.

Tru, sapos wanpela i giaman o inap longtaim em i mekim bikpela rong, ating pasin bilong em i no soim olsem em i tanim bel pinis. (Aposel 26:20) Sampela taim dispela kain man i save raus long kongrigesen. Na maski man i bin mekim bikpela rong em i tokaut long ol elda, ol elda i mas putim sampela tambu long em. Olsem wanem? I stret sapos yu kros o bel nogut long tok bilong ol elda? Long Hibru 12:​5, 6, Pol i tok: “Pikinini bilong mi, sapos Bikpela i mekim wanpela samting long yu bilong stretim yu, yu no ken ting dispela em i samting nating, na tu, yu no ken bel hevi tumas. Long wanem, Bikpela i save stretim ol man em i laikim tumas. Na sapos em i kisim wanpela man na i kolim em pikinini bilong en, orait em i save givim kanda long en tu.” Maski wanem strafe i painim yu, tingim dispela samting i olsem samting i kamapim klia olsem God i save laikim yu. Na tingim: Man i tanim bel tru, em bai stap gutpela gen wantaim God Jehova, em Papa bilong yumi long heven na em i save marimari long yumi.

Yu mas i gat strongpela bel bilong kamapim ol rong bilong yu. Tasol sapos yu mekim, yu inap stretim bek ol samting wantaim papamama bilong yu na wantaim God Jehova tu. Yu no ken larim pret, o pasin antap, o sem i pasim yu long kisim helpim. Tingim: Jehova “i save marimari moa yet.”​—⁠Aisaia 55:⁠7.

[Ol Futnot]

[Rait long pes 12]

‘Mi laik kirapim ol man i bin mekim rong long kamapim bel bilong ol long Jehova.’​—⁠Andrew

[Piksa long pes 11]

Autim rong bilong yu long papamama inap helpim yu long kamap strong gen long spirit