Ol Yangpela i Laik Save. . .

Olsem Wanem Mi Inap Lusim Pasin Giaman?

“Mi bin bikhet na sakim olgeta tok bilong papamama, na mi kirap na tok giaman long ol. Mi save tokim ol mi bai go raun long stua, tasol mi save go na bungim wanpela boipren.”​—Em Anna i tok olsem.

ANN i bin giaman long bihainim stretpela pasin, na bihain em i sakim papamama na sakim maus bilong bel i bin lain pinis long ol lo bilong Baibel. As bilong dispela, em Ann i save hait na pamuk wantaim boipren bilong em. Em i tok: “Mi wok strong long rausim Jehova olgeta long tingting bilong mi.” Tasol i no longtaim na Ann i pilim truim bilong dispela tok, olsem: ‘Yu planim pikinini bilong wanem kain kaikai, em dispela kain kaikai tasol bai yu kamautim.’ (Galesia 6:7) Ann i kisim bel. Em i tok, “Mi laikim tumas pikinini bilong mi, tasol i no stret ol singel i karim dispela hevi. Em bikpela hevi tru bilong meri i stap wanpis.”

Olsem wanem long yu? Yu kalabus pinis long pasin giaman, na yu haitim pasin tru bilong yu long papamama na ol wanlotu Kristen? Ating yu save raun nating wantaim sampela wanskul, na yu save papamama bai i no amamas long ol. O ating yu insait pinis long ol bikpela rong, olsem smok, dring, pamuk. Maski em wanem samting yu mekim, bihain bai bikpela hevi i painim yu olsem i bin painim Ann.b

Tasol dispela i no pasim liklik sampela yangpela long bihainim pasin bikhet. Ol i wankain olsem man i lukim em yet long glas na “kwiktaim em i lusim tingting long em i gat wanem kain pes.” (Jems 1:​23, 24) I gutpela sapos yu narapela kain. Ating yu kirap pinis long skelim pasin bilong yu yet na yu no amamas; yu laik senisim pasin bilong yu. Tasol yu inap senisim pasin bilong yu olsem wanem?

Pastaim​—Tanim Bel

Pastaim yu mas pasim tok long bel, bai yu senisim pasin bilong yu. Aposel 3:19 i tok: “Yupela i mas senisim tingting nogut bilong yupela, na tanim bel, na bai God i rausim ol sin bilong yupela.” Tasol tanim bel i no samting bilong tingting tasol. Pasin bilong tanim bel i olsem man i ‘sori na bel hevi tru long samting em i bin mekim.’ Jems i tok: “Yupela i mas bel hevi na krai planti. . . . Yupela i mas senisim dispela pasin bilong amamas, na . . . yupela i mas daunim yupela yet long ai bilong Bikpela.” (Jems 4:​9, 10) Olsem wanem yu inap bel hevi long wanpela samting yu bin amamas long mekim inap long nau? Yu mas tingim dispela samting i olsem wanpela pasin i nogut tru. Na tingim: Pasin yu mekim, God i save bel hevi long en. Na tingim ol hevi em pasin giaman bilong yu i bin kamapim, na ol tok giaman yu bin mekim bilong karamapim. Tingim gen: God i no laikim tru pasin bilong giamanim narapela! (Song 5:6) Sapos yu tingim gut ol dispela samting, bai yu inap sakim pasin nogut long tingting na long bel bilong yu.

Sapos yu bel hevi tasol long samting yu mekim, dispela i no inap. Wanpela yangpela man, em Robert, long pasin hait em i bin mekim nabaut long ol drak, na em i tok: “Mi save bel hevi. Mi bin save long wanem ol pasin i stret na i no stret, tasol mi bin mekim yet pasin giaman.” Olsem na yu mas strongim bel na mekim sampela samting! Long 2 Stori 7:​14, God i tok long ol sinman olsem: “Sapos yupela i tanim bel na sori long ol bikhetpasin bilong yupela, na yupela i kam klostu long mi na beten long mi, na lusim ol dispela pasin nogut yupela i bin mekim, . . . bai mi harim beten bilong yupela na lusim ol sin bilong yupela.”

Bilong ‘kam klostu long God,’ yu mas beten na kamapim rong bilong yu na askim em long lusim rong bilong yu. Ating em i hatwok liklik long mekim olsem, tasol taim yu mekim pinis, tingting na bel bilong yu bai i stap isi. Man bilong raitim Song i tok: “Taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta. . . . Bihain mi bin autim sin bilong mi long yu.”​—Song 32:​3-5.

Kamapim Long Papamama

Yu mas tokim narapela long ol hevi bilong yu. Tasol yu inap tokim husat? Wanpela yangpela, em Brian, em i tok: “Mi popaia tru taim mi kamapim ol hevi bilong mi long ol pren na mi no bin kamapim long mama Kristen bilong mi. Tasol mi bin pret long toktok wantaim em, long wanem, mi ting nogut em bai kros, olsem na mi bin go long ol pren na ol i pulim mi i go longwe long tok i tru.” Yu no ken bihainim dispela pasin kranki. Olgeta tingting i stap long bel bilong yu, yu mas autim long papamama Kristen. (Lukim Jop 33:3.) I stret na ol i mas save long ol samting yu bin mekim. Sapta 2 long buk Sampela Askim Bilong Ol Yangpela​—Ol Gutpela Bekim i gat sampela tok bilong helpim yu long kamapim hevi bilong yu long papamama.c

Tru, ol bai i no ken amamas long yu bin giamanim ol. Tasol ol papamama i save laikim tumas ol pikinini bilong ol. Wanpela man bilong raitim buk (Clayton Barbeau) i tok: ‘Papamama i no inap givim baksait long yu, long wanem, yu bin mekim pasin kranki na hevi i painim yu. Ol yangpela i bin kisim bel, na sik bilong pamuk, na ol i insait long pasin bilong dring oltaim o kisim drak oltaim, o sampela narapela hevi, na ol i ting papamama bai belhat nogut tru na givim baksait long ol. Tasol taim ol i kamapim hevi long papamama, papamama i holim ol na tokim ol, “Yu gat bikpela hevi, a? Bai yumi painim rot long stretim.” ’ Tru tumas, ating planti papamama i save helpim pikinini, maski pastaim ol i kros nogut tru. Na sapos papamama i lotuim God, ol bai helpim yu moa yet! Bikpela tingting bilong ol em long helpim yu long stretim hevi​—i no bilong semim yu o bagarapim bel bilong yu. (Lukim Aisaia 1:18.) Olsem na ating ol bai stretim rot bilong yu ken toktok wantaim ol elda.​—Jems 5:​14, 15.

I stret long papamama i givim wanpela kain strafe long yu, na ating ol bai putim sampela strongpela tambu moa. Tasol dispela inap helpim yu na bai yu no pundaun gen. Na tu, taim yu stretim tok wantaim papamama na yu pilim sori bilong ol, dispela inap helpim yu long kisim narapela tingting long ol. Ating inap long nau yu save bel hevi long ol lo na tambu ol i putim. Wanpela yangpela meri, em Paulette, em i tok: “Em hatwok long kisim ol tok em papamama i save givim bilong stretim na stiaim tingting bilong mipela. Tasol nau mi save, ol dispela tok em bilong helpim mipela na bai mipela i ken stap amamas oltaim.”

Senisim Ol Poroman

I no planti yangpela em ol yet i tingting long mekim pasin giaman. Ating planti ol wanlain bilong yu i bin kirapim yu long mekim pasin bikhet, a? Bilong helpim yu na yu no ken kirap gen long mekim pasin giaman, yu mas senisim ol poroman bilong yu. Man bilong raitim Song i tok: “Mi no save raun wantaim ol man nogut. Mi no save wokabaut wantaim ol man bilong giaman.” (Song 26:4) Tasol i hatwok long lusim ol pren bilong yu bilong bipo. Ating yu tu i mas mekim wankain beten olsem: “Ol i man bilong tok giaman, na pasin bilong ol i no stret. Yu mas helpim mi na kisim bek mi long han bilong ol.” (Song 43:1) Mekim ol pasin i stret wantaim beten bilong yu, na tokim ol poroman bilong bipo olsem yu senisim pinis pasin bilong yu na bel bilong yu i strong long bihainim pasin i stret. Gutpela sapos yu kamapim bilip bilong yu olsem yu wanpela disaipel bilong Jisas​—no ken haitim. (Lukim Jon 19:38.) Ol poroman nogut bai painim hariap ol narapela pren.

Bihain, yu mas painim ol gutpela poroman bilong senisim ol poroman nogut. Olsem wanem sapos i no gat planti yangpela i lotuim God? Orait, tingim profet Jeremaia, em i tok: “Mi no bin i stap wantaim ol man i save belgut na lap. . . . Nogat. Mi sindaun wanpis tasol.” (Jeremaia 15:17) Mobeta yu stap wanpis na yu no raun moa wantaim ol yangpela ol bai pundaunim yu long ol samting bilong spirit. Planti taim sapos yu wok strong bai yu inap painim ol gutpela pren. Olsem Tammy: Em i kirap poromanim kasen sista em i save mekim wok autim tok oltaim. Tammy i tingim bek na i tok, “Mitupela i kamap gutpela poroman tru. Long ol de mi no stap long skul, mi save go autim tok wantaim em. Dispela i bin helpim mi long senisim ol pasin bilong mi.”

Tasol wanpela yangpela man Jeman i tok, “nambawan samting bilong lukautim yumi, em maus bilong bel, na bel i no gat tok taim yumi pas gut wantaim God Jehova.” Wanpela yangpela meri i bin mekim pasin giaman, em i tok: “Mi no bin kamap pren tru bilong Papa bilong mi, Jehova.” Long rot bilong beten na stadi em i kirap long stretim dispela samting. Nau em i amamas na em i tok, “I no gat wanpela man inap bagarapim pasin pren bilong mi wantaim Jehova.” Yu tu inap kamap pren tru bilong God na stap amamas olsem. Em bai stiaim yu na helpim yu, maski sampela taim yu hatwok long senisim ol pasin bilong yu bilong bipo. Song 37:24 i stori long wanpela gutpela wokboi bilong God olsem: “Maski sapos dispela man i pundaun, em i no inap bagarap olgeta. Bikpela i save holim han bilong en, na helpim em long sanap gen.” Tru tumas, yu inap lusim pasin giaman, long wanem, Jehova bai helpim yu.

[Ol Futnot]

[Rait long pes 19]

“Mi wok strong long rausim Jehova olgeta long tingting bilong mi”

[Rait long pes 19]

Yu mas pasim tok long bel​—bai yu senisim pasin bilong yu

[Piksa long pes 20]

Tokim ol pren bilong yu bilong bipo yu senisim pinis pasin bilong yu, na yu no laik mekim pasin nogut moa