Ol Yangpela—Nogut Yu Giaman Long Bihainim Stretpela Pasin
“Yes, yangpela man: Nau yu mas amamas taim yu stap yangpela yet, Tasol bihain bai God tru i mekim kot na skelim ol dispela samting yu mekim.−EKLISIASTIS 11:9, NW.
1, 2. I gat wanem stori bilong wanpela yangpela em i giaman long bihainim stretpela pasin?
WANPELA yangpela i tok: ‘Kirap long taim mi liklik yet mi go bikpela insait long pasin Kristen, namel long ol Witnes Bilong Jehova. Tasol pasin mi bihainim, long haus tu, i narapela kain olgeta long ol lo na tingting bilong papamama bilong mi. Mi bihainim pasin bilong dispela graun na laik bilong mi yet.’
2 Em i tok moa olsem: ‘Taim mi no winim yet 10-pela krismas mi kirap long mekim pasin giaman−long skul mi bihainim narapela kain pasin bambai ol wanskul i ken laikim mi na pren wantaim mi, na long haus mi bihainim narapela kain pasin gen bambai papamama i ken laikim mi na orait long mi. Long skul mi bihainim stail na pasin bilong ol narapela yangpela . . . Tasol long haus mi bihainim narapela kain pasin olgeta. Mi bihainim gutpela pasin Kristen olsem papamama i laik bai mi bihainim.’
3. (a) Ol brata i raitim ol dispela tok long ol yangpela, ol i ting olsem wanem? Tasol ol i save long wanem samting? (b) Wanem samting i kirapim ol long givim ol dispela tok long ol yangpela?
3 Mipela save yupela planti yangpela long ol kongrigesen, yupela i no mekim pasin olsem dispela yangpela man i mekim. Mipela ting klostu olgeta yangpela Witnes i bihainim stretpela pasin na ol i no giamanim papamama o kongrigesen, olsem na mipela i amamas. Tasol mipela i save, sampela i save mekim pasin i no stret na ol i haitim long ol manmeri i bikpela pinis; long ai tasol ol i bihainim gutpela pasin. Mipela laik givim dispela askim long ol: Dispela gutpela pasin yupela save mekim long ai bilong mipela, yupela save bihainim long olgeta taim, o sampela taim yupela save mekim pasin nogut na haitim? Mipela no laik sutim tok long yupela−mipela laikim yupela−olsem na mipela laik helpim yupela long i stap amamas na bai Jehova i ken laikim yupela.−Eklisiastis 11:9, 10; 12:14; 2 Korin 5:10.
4. Stori long sampela man i bikpela pinis em ol tu i bin giaman long bihainim stretpela pasin. Tasol long dispela taim planti yangpela i kirap long mekim wanem?
4 Tasol ating yu bai tok, ‘Ol man i bikpela pinis ol tu i save mekim pasin nogut.’ Tru, tasol ol tu i mas stretim pasin bilong ol. Gehasi, em wokboi bilong Ilaisa, em i mekim pasin giaman. Em i kisim sampela presen long Neman na bihain em i wok long haitim rong bilong em. (2 King 5:20-26) Na Ananaias tupela Sapaira i bikpela pinis, tasol tupela i giaman na tok ol i bin givim pe olgeta bilong graun long ol aposel, tasol hap pe bilong en tupela i holim bilong ol yet. Ol i giaman long mekim gutpela pasin long ai bilong ol man. (Aposel 5:1-4) Tasol nau mipela laik givim sampela tok long yupela ol yangpela, long wanem, long nau planti yangpela i save mekim pasin i no stret na ol i laik haitim.
I Gat Wanem As na Sampela i Giaman long Bihainim Stretpela Pasin?
5. (a) I gat wanem as na sampela yangpela i giaman long bihainim stretpela pasin? (b) Sapos yangpela man o meri i bihainim gutpela pasin, planti taim wanem samting i painim em? Olsem na sampela yangpela i mekim wanem?
5 Bilong wanem ol i mekim dispela pasin giaman? Wanpela yangpela i kamapim gut wanpela bikpela samting i kirapim ol yangpela long mekim olsem, em i tok: ‘Mi no laik i stap narapela kain long ol pren bilong mi na bai ol i no laik pren moa wantaim mi.’ Tru, sapos yu bihainim stretpela pasin na yu stap narapela kain, ating sampela bai tok bilas long yu. (Lukim 1Pita 3:16; 4:4.) Sampela yangpela i no laik bai ol pren bilong ol i tok bilas long ol na dispela i bin subim ol long dring longlong o mekim pasin pamuk. Wanpela yangpela meri i gat 13 krismas, em i no bilong lain Witnes, oltaim em i save kisim gutpela mak long skul na taim tisa i tokim klas ol i mas toktok wantaim long wanpela samting dispela yangpela meri i save harim tok bilong tisa na mekim sampela tok, tasol em i bel hevi na em i tok: ‘Ol manki i no ken laikim kain meri olsem mi i bihainim gutpela pasin oltaim . . . Ating mi mas slek long skul o mekim narapela samting bambai ol i ken laikim pasin bilong mi.’
6. Wanem samting i pulim Pita long mekim pasin i no stret? Dispela samting i mas givim wanem tingting long yumi long ol yangpela?
6 Aposel Pita i save long pasin i stret em i mas mekim, tasol wanpela taim em i tingting tumas long mekim pasin ol wanlain bilong em bai laikim na dispela i pulim em long mekim pasin i no stret. Em i stap long Antiok na sampela Kristen bilong Jerusalem, em ol i bilong lain Juda, ol i kain long Antiok. Pita i no laik bai ol dispela wantok i sutim tok long em, long wanem em i bung wantaim ol Kristen i no bilong lain Juda; em i sem na em i lusim ol dispela Kristen bilong Antiok. (Galesia 2:11-14) Pita i strongpela Kristen, tasol em i pundaun na mekim dispela samting. Sampela yangpela Kristen long nau, ol tu i sem long i stap narapela kain long ai bilong ol wanlain bilong ol.−Provep 22:15.
7. I gat wanem narapela samting em inap pulim ol yangpela na bai ol i hait na mekim pasin i no stret?
7 Narapela samting i kirapim sampela yangpela long mekim dispela pasin giaman, em olsem: Ol i ting, ol yangpela bilong ausait ol i kisim ol gutpela amamas, na ol yet nogat, olsem na long ai bilong ol brata ol i olsem bihainim pasin i stret, tasol long pasin hait ol i insait long sampela pasin i no stret. Ol i harim ol yangpela long skul i stori long ol samting ol i bin mekim, olsem ol i bin i go long pati, na harim ol kain musik i samting tru, na ol i bin dring na kisim drak, na ol i spak na kisim bikpela amamas! Na ol i harim ol i stori long boipren o gelpren bilong ol i kis olsem wanem na kain samting olsem. Dispela i kirapim laik long bel bilong ol na ol tu i laik mekim ol dispela samting ol yangpela bilong ausait i mekim bambai ol i ken kisim ol dispela amamas, em Baibel i kolim “amamas bilong sotpela taim tasol”−Hibru 11:24, 25; 1 Korin 10:6-8.
8. Tasol wanem as tru bilong pasin giaman sampela yangpela i bihainim?
8 Tasol as tru bilong dispela pasin giaman sampela yangpela i mekim, em olsem: Ol i no bilip tru long Jehova o long nupela taim bai kamap, olsem na long ai bilong ol brata ol i giaman tasol long bihainim stretpela pasin. Ol i no bilipim ol tok promis bilong Jehova; na Baibel wantaim oganaisesen i tok, strafe bai painim man i mekim pasin i no stret, tasol ol i no bilip tumas long dispela. (Galesia 6:7, 8) Ol i no olsem Moses, em Baibel i tok, Moses i tingting strong long “dispela gutpela pe bambai God i givim em. . . . Moses i olsem i lukim God, olsem na em i stap strong.” Moses i bilip tru olsem Jehova em i stap, na em i bilipim tru ol tok promis bilong Jehova. Tasol ol yangpela i giaman long bihainim stretpela pasin ol i sot long dispela kain bilip, olsem na long ai tasol bilong ol brata ol i lotuim God. Ol i lukim tasol ol samting Seten i laik bai ol i lukim, olsem ol aigris bilong dispela graun. Ol i wok long painim ol amamas i bilong sotpela taim tasol na ol i giaman long bihainim stretpela pasin.−Hibru 11:26, 27.
Inap Papamama i Gat Hap Asua
9. (a) Sapos papamama i mekim wanem, ating bai ol i gat hap asua long pasin giaman pikinini i mekim? (b) Ol man i bikpela pinis i mas pilim wanem samting? Na ol i mas wok strong long mekim wanem?
9 Dispela yangpela man yumi bin stori long em long paragraf 1, em i tok: “Taim mi bihainim stretpela pasin, ol wanskul i no save laikim mi, tasol papamama i amamas long mi. Tasol mi no laik bai papamama i amamas tasol long mi. Mi mas i gat man bilong sambai long mi na toktok gut wantaim mi bambai mi inap kamapim ol tingting na hevi bilong mi long em, tasol papamama i no helpim mi olsem.” Yupela ol papamama, yupela i strongim pikinini long bihainim stretpela pasin? O em hap asua bilong yupela na pikinini i giaman long bihainim stretpela pasin? Olsem wanem? Yupela ol papamama i save tingim gut olgeta pikinini wan wan na mekim ol samting bilong stiaim tingting bilong ol na soim rot long ol? Yupela save helpim pikinini na lainim em long ol samting na bai em i ken stap strong? Yumi ol manmeri i bikpela pinis, yumi mas pilim bikpela hevi na traim i painim ol yangpela long skul, na yumi mas wok strong long mekim olgeta samting bilong strongim ol na helpim ol bai bilip bilong ol i no bagarap.−Sam 73:2, 3; Hibru 12:3, 12, 13.
10. (a) I gat wanem samting ol yangpela i laik save long en na papamama i mas givim dispela save long ol? (b) Sapos papamama i no givim save long pikinini bilong stiaim tingting bilong em, wanem samting nogut inap kamap?
10 Planti taim ol yangpela i laik save long pasin yangpela man i mas mekim long yangpela meri, na yangpela meri i mas mekim long yangpela man. Tasol sori tumas, planti papamama i no toktok wantaim pikinini bilong ol long kain samting olsem. Wanpela naispela yangpela meri em i gat 15 krismas na em i save skul gut, em i tok: “Papamama i no toktok wantaim mi long stretpela pasin bilong marit. Olgeta save mi kisim long maritpasin em mi yet mi kisim. . . . Mi gat planti askim long dispela samting, tasol mi sem long askim papamama.” Na wanem samting i bin kamap? Dispela yangpela meri i tok: “I olsem wanpela banis i stap namel long mi wantaim papamama na mipela i no inap toktok gut wantaim, olsem na mi yet mi wok long painim save na mi kirap mekim pasin longlong na kwiktaim mi pundaun.” Wanpela yangpela man i grisim em na em i mekim pasin pamuk. Tasol husat i gat hap asua long dispela samting? Yu ting olsem wanem?−Provep 22:3; 27:12.
11. (a) Papamama i mas mekim wanem na bai ol i kamapim bel bilong ol olsem ol i laikim tumas pikinini bilong ol? (b) Sapos papamama i mekim gutpela pasin sori olsem long ol pikinini, ating ol pikinini bai mekim wanem?
11 Tru tumas, papamama i mas poromanim pikinini na toktok gut wantaim em na givim tingting long em bambai em i ken save long stretpela rot em i mas bihainim. Sapos papamama i mekim olsem bai ol i kamapim bel bilong ol, ol i aikim tru pikinini. (Provep 15:22; 20:18) Narapela yangpela i tok: “Mi pilim olsem sapos papamama i laikim mi tru ol i mas givim sampela lo long mi.” Taim pikinini i yangpela yet, ating em i no ken amamas tumas long ol lo na tambu papamama i putim long em, tasol taim em i bikpela pinis bai em i tenkyu long papamama. Wanpela yangpela meri i raitim pas long mama na em i tok: “Oltaim mi bin wok long painim rot bilong abrusim o kalapim ol lo yu bin putim long mi, tasol nau mi laik tok tenkyu tru long yu long strongpela pasin yu bin mekim long mi, em yu strong long mi mas bihainim ol lo na tok bilong yu.” Bilong kamapim bel bilong yu olsem yu laikim tumas ol pikinini bilong yu, yu mas givim ol tok na lo long ol na yu mas strong long ol i mas bihainim ol dispela tok na lo. Yu mas was gut, nogut pikinini bilong yu i giaman tasol long bihainim stretpela pasin na yu yet yu gat hap asua long dispela. Nogut yu yet yu pasim rot na pikinini i pret o sem long toktok wantaim yu, o yu gat planti wok na yu no gat taim bilong harim hevi bilong pikinini na helpim em!
12. Sampela papamama i gat wanem tingting kranki na sapos pikinini bilong ol i giaman long bihainim stretpela pasin, ol yet i gat hap asua?
12 I gat narapela samting tu sampela papamama i mekim na ol i gat hap asua long pikinini i giaman long bihainim stretpela pasin. Sampela tok bilong wanpela jas long Nu Jesi i kamapim gut dispela samting, em i tok: “Pikinini i mekim pasin i no stret long skul na tisa i laik stretim em, tasol papamama i krosim tisa.” I olsem sampela papamama i gat tingting kranki na ol i ting pikinini bilong ol i no inap mekim rong. Sampela taim ol elda Kristen o narapela strongpela brata long kongrigesen i tokim papamama long rong pikinini bilong tupela i bin mekim, tasol papamama i no bilipim tok bilong ol dispela brata na ol i no stretim pikinini. Olsem na sapos pikinini bilong tupela i giaman long bihainim stretpela pasin, orait tupela yet i gat hap asua long dispela.
Man i Giaman long Bihainim Stretpela Pasin Em i Wanem Kain Man Tru?
13. Sapos yumi giaman long bihainim stretpela pasin, yumi olsem wanem kain man?
13 Sapos long ai bilong ol man yumi bihainim stretpela pasin, tasol yumi mekim hait sampela pasin i no stret, yumi olsem man bilong giaman na man bilong tupela maus. (Sam 12:2; 2 Timoti 3:13) Na yumi wankain olsem Seten, em i “save senisim pasin bilong en na long skin tasol em i kamap olsem ensel bilong lait.” (2 Korin 11:14, 15) Na yumi wankain olsem ol bikpela man bilong lotu em Jisas i tokim ol: “Yupela i man bilong tupela maus! Yupela i olsem matmat ol i bin penim long waitpela pen. Ausait em i naispela bilong lukim, tasol long insait i pulap long bun bilong daiman na long olgeta samting i doti. Yupela tu i stap olsem tasol. Ol man i lukim bodi bilong yupela, ol i ting yupela i stretpela man. Tasol long insait yupela i pulap long ol pasin bilong giaman na bilong sakim lo.” (Matyu 23:27, 28) Dispela kain pasin giaman em i wanpela bikpela rong long ai bilong God.
14. I gat wanem samting na yumi no laik bihainim dispela pasin giaman?
14 Man i mekim kain pasin giaman olsem em i mas tingim gut narapela samting tu, olsem: I no inap em i haitim long olgeta taim; bihain bai dispela pasin bilong em i kamap ples klia. “Yumi lukim pasin bilong man na yumi ken save, em i gutpela na stretpela man o em i man nogut. Na long wankain pasin tasol, yumi ken save long ol pikinini tu.” (Provep 20:11; Luk 12:1-3) Tru tumas, bihain bai pasin bilong yu i kamap ples klia na bai ol man i save yu mekim gutpela pasin o pasin nogut. Baibel i tok, God bai givim strafe long ol man i mekim pasin giaman na ol man bilong tupela maus. (Matyu 24:51) Olsem na nogut yu giaman long bihainim stretpela pasin, a?
Ol Samting Yu Mas Mekim na Bai Yu Abrusim Dispela Pasin Giaman
15. Wanem samting inap helpim ol yangpela na bai ol i no giaman long bihainim stretpela pasin?
15 Sapos long ai tasol yu bihainim pasin Kristen, tasol yu mekim sampela pasin i no stret na yu haitim, yu mas askim skin bilong yu: ‘Mi laik i stap olsem man bilong tupela maus? Mi laik bihainim pasin bilong Seten na ol Farisi?’ Nogat tru, a? Narapela samting em inap helpim yu na bai yu no giaman long bihainim stretpela pasin, em olsem: Yu mas save, sapos yu mekim kain pasin giaman olsem, dispela bai bagarapim yu tru na bai yu kisim bikpela hevi long en. Tingim samting i bin painim Gehasi: Em i laik haitim pasin nogut bilong em, na sik lepra bilong Neman i kalap i go long em na dispela sik i stap long em inap long taim em i dai. Na Jehova i kilim i dai Ananaias wantaim Sapaira, long wanem tupela i giaman na tok ol i putim olgeta mani bilong ol i go bilong helpim ol man.−2 King 5:27; Aposel 5:5, 9, 10.
16. Wanpela yangpela man i kirap bihainim pasin bilong graun na wanem samting i painim em?
16 Na yumi ken tingim ol samting i bin painim sampela manmeri long nau. Wanpela yangpela man long Amerika em i kirap long stadi na lainim ol tok bilong Baibel na em i go long ol miting long Haus Kingdom. Tasol bihain em i insait long sampela pasin bilong graun na em i no bung moa wantaim ol Witnes. Sampela yia bihain em i raitim pas na em i tok: “Tupela mun i go pinis mi bin beten askim God long salim wanpela Witnes i kam long mi, long wanem mi laik stadi gen. Mi kirap long stadi gen na wanpela mun bihain samting nogut tru i kamap−dokta i tok mi gat wanpela sik bilong dispela nupela sik AIDS na i no gat rot bilong stretim dispela sik. Sori tru, sapos mi bin bihainim ol toksave bilong Baibel taim mi stadi pastaim, nau bai mi no gat dispela bikpela hevi.” Yu laik abrusim ol kain hevi olsem, a? Tru tumas, pasin bilong dispela graun i no inap helpim yumi liklik.−1 Jon 2:15-17.
17. I gat wanem samting moa ol yangpela i mas tingim na dispela bai helpim ol long abrusim dispela pasin giaman?
17 Sapos yu mekim pasin nogut na yu haitim, dispela bai nogutim nem bilong Jehova. Dispela yangpela man yumi bin stori long em long paragraf 1, em i tok, wanpela taim em i kisim smok na wanpela man i lukim em i kisim na em i tok: ‘Mi no save ol Witnes Bilong Jehova i orait long smok. Tasol yu tok yu wanpela Witnes, a?’ Bihain dispela yangpela man i tok, dispela askim i bin sutim tru bel bilong em, long wanem em i save, em i giaman tasol long bihainim stretpela pasin na dispela i bagarapim nem bilong Jehova. Yu no laik bagarapim nem bilong Jehova, a? Ol Isrel long bipo ol i bin lusim Jehova; ol i bagarapim nem bilong Jehova na ol i no tingim, tasol yu no laik mekim olsem, a?−Sam 78:36, 37, 41; Esikiel 36:22.
18. (a) Taim papamama i kisim save olsem pikinini i giaman long bihainim stretpela pasin, ating bai ol i pilim olsem wanem? (b) Bilong wanem dispela i mas pasim ol yangpela Kristen na bai ol i no laik giaman long bihainim stretpela pasin?
18 Na tu yu mas tingim papamama bilong yu. Dispela yangpela man hia em i tok: “Bihain papamama i kisim save long pasin giaman mi bin mekim na tupela i kirap nogut tru. Na long namba wan taim mi lukim papa tupela mama i krai.” Sapos yu mekim pasin i no stret na yu haitim, na bihain papamama i save long en, bai ol i bel hevi tru na ol i krai. Yu laik bai ol i bel hevi olsem? Nogat, a? Baibel i tok: “Sapos ol man i ting yu gutpela man na ol i givim biknem long yu, orait dispela i winim tru olgeta mani samting bilong maniman.” (Provep 22:1) Sapos yu mekim pasin nogut na yu haitim na bihain em i kamap ples klia, dispela bai bagarapim nem bilong yu. Na i no dispela tasol. Pasin yu mekim bai bagarapim nem bilong papamama tu na bai ol i gat bikpela sem.−Provep 10:1; 17:21.
19. Pasin nogut bilong ol pikinini man bilong Jekop i mekim wanem long em? Dispela inap givim wanem tingting long yumi?
19 Pasin ol pikinini man bilong Jekop i bin mekim i kamapim long ples klia olsem pasin pikinini i mekim em inap bagarapim tru nem bilong papamama. Wanpela man i bin paulim pikinini meri bilong Jekop, em Daina, na ol pikinini man bilong Jekop i kirap na kilim i dai olgeta man bilong dispela ples na kisim ol samting bilong ol. Jekop i bel hevi tru long dispela samting na em i tok: “Yutupela i mekim nem bilong mi i kamap nogut.” Na God i tokim Jekop long lusim dispela hap na i go sindaun long narapela hap. (Jenesis 34:30; 35:1) Na pasin nogut bilong yu inap mekim olsem long papamama, na bai ol i gat bikpela sem long ai bilong ol man i stap klostu na ol pren bilong ol. Baibel i tok stret, olsem: “Sapos man i bihainim longlong pasin, bai papamama bilong en i bel nogut na bel hevi tru.”−Provep 17:25.
20. Ol papamama Kristen i mekim na ol pikinini bilong ol inap kisim wanem gutpela presen?
20 Tasol mipela save, yu no laik givim bikpela hevi olsem long papamama bilong yu. Olsem na yu mas tingim gut ol samting pasin bilong yu bai mekim long papamama. Na sapos papamama bilong yu i Kristen, orait yu mas tingim gutpela samting tru ol i bin givim long yu, i winim dispela laip ol i bin givim long yu. Baibel i stori long Jehova olsem: “Laip bilong dispela graun i gutpela tasol marimari bilong yu i nambawan tru.” (Sam 63:3) Papamama i bin lainim yu long tok i tru na yu inap kisim sori na marimari bilong God, na yu inap i stap pren bilong God. Dispela i winim laip bilong yu, long wanem sapos yu dai, bai God i kirapim bek yu na yu ken i stap oltaim long Paradais bihain bai kamap long graun.
Helpim Ol Narapela long Abrusim Dispela Pasin Giaman
21. (a) Ol yangpela i save long rong narapela i bin mekim, ol i gat wanem wok? (b) Wanpela yangpela i gat 13 krismas em i mekim wanem na em i stap olsem gutpela piksa?
21 Sapos yu save narapela man i mekim pasin nogut na em i haitim, orait yu mas mekim wanem? Pastaim yu mas toktok wantaim em na kirapim em long i go lukim ol elda. Tasol sapos em i no laik mekim olsem, orait yu mas mekim wanem? Baibel i tok, yu yet yu mas i go tokim ol elda long dispela rong. (Levitikas 5:1) Mipela i save i hatwok long yu mekim olsem, tasol i stret yu mas mekim. Baibel i tok: “Ol pren tru i save givim pen long yu bilong helpim yu.” (Provep 27:6) Wanpela yangpela meri i gat 13 krismas em i harim wanpela tok i stori long dispela wok Baibel i tok em i mas mekim, olsem na em i go lukim wanpela pren bilong em i bin mekim pasin i no stret na em i haitim, na em i tokim dispela pren bilong em, em i mas i go autim rong bilong em long ol elda. Dispela yangpela meri i raitim pas na em i stori olsem: “Bihain mi go painimaut em i bin toktok wantaim wanpela elda o nogat, na em i no bin mekim. Olsem na mi yet mi go toktok wantaim wanpela elda. Bipo dispela meri i stap gutpela pren bilong mi, tasol mi kamapim rong bilong em. Ating mi mekim pasin i stret?” Em i mekim pasin i stret! Taim yu kamapim rong bilong narapela man olsem, ating pastaim bai bel hevi i kamap, tasol bihain bai amamas i kamap, long wanem dispela samting yu mekim inap helpim dispela man i bin mekim rong na bai em i no lus long kisim laip.−Hibru 12:11.
22. Gutpela sapos ol yangpela i bihainim wanem savepasin? Sapos ol i mekim olsem, wanem gutpela samting bai kamap?
22 Tasol gutpela sapos yu no giaman long bihainim stretpela pasin, na bai ol dispela hevi i no ken bungim yu. Olsem na yu mas bihainim gutpela tingting na savepasin. Stap gut long God long tingting na long bel, na kamap pren bilong em. Beten oltaim long em na askim em long helpim yu. Wok strong long kisim save long tok bilong Baibel na bai yu ken pilim tru ol gutpela pasin bilong God. Sapos yu mekim olsem, Jehova bai blesim yu na papamama bai amamas long yu. Na bikpela samting tru, em Jehova bai belgut long yu.−Provep 27:11.
Bai Yu Bekim Wanem Tok?
□ Wanem samting i kirapim sampela yangpela na ol i giaman long bihainim stretpela pasin?
□ Sampela papamama i mekim wanem na ol i gat hap asua long pasin giaman pikinini bilong ol i mekim?
□ Sapos yumi giaman long bihainim stretpela pasin yumi olsem wanem kain man?
□ Ol yangpela i mas mekim wanem na dispela inap helpim ol long abrusim pasin bilong giaman long bihainim stretpela pasin?
□ Sapos yangpela man o meri i save narapela yangpela i bin mekim bikpela rong, em i mas mekim wanem?
[Piksa long pes 20]
Sapos papa o mama i toktok gut wantaim pikinini dispela i kamapim bel bilong em, em i laikim tumas pikinini
[Piksa long pes 22]
Sapos yu save narapela i bin mekim bikpela rong, yu mas kirapim em long i go tokaut long dispela rong