Pas Bilong Ol Man

Ol Skul i Gat Hevi Mi sanap long bas-stop taim wanpela i givim mi dispela nius i gat stori “Ol Skul i Gat Hevi.” (Me 8, 1996) Em i gat ol gutpela tok moa na i winim wanpela buk i stori long dispela samting em mi bin kaunim i no longtaim i go pinis. Mi bai amamas tru sapos yupela i salim sabskripsen bilong Kirap! i kam long haus bilong mi.

V. C., long Amerika

Dispela hap i stori long Skul Bilong Wok Autim Tok i mekim na mi tingim bek long taim mi stap long skul. Mi mas kamapim wanpela ripot long klas, tasol mi no bin save gut long tok Inglis long dispela taim. Taim mi pinisim tok bilong mi, tisa i tok em i amamas tru na mi wanpela tasol i bin sanap gut na lukluk long ol narapela. Mi inap mekim olsem, long wanem, yumi save kisim gutpela skul long rot bilong Skul Bilong Wok Autim Tok long Haus Kingdom.

G. A., long Amerika

Mi no bin ting ol dispela stori inap kirapim bel bilong mi long pilim tru dispela samting. Taim mi stap long skul, papamama i gat planti hevi bilong ol yet na ol i no gat taim bilong helpim mi. Long dispela as, sampela taim, mi pilim olsem mi stap wanpis taim mi stap long skul. Ol kain stori olsem i mekim na mi save olsem, Jehova i save laikim ol yangpela na em i no laik bai ol i pilim olsem ol i stap wanpis olgeta long dispela graun.

M. M., long Amerika

Kamap Pren Bilong God Olsem Doris, em yupela i bin toktok long em long stori bilong Kirap! (Janueri 8, 1996), mi pilim olsem mi no inap stap pren bilong God. Mi tok tenkyu long Jehova long em i helpim mi long dispela rot. Dispela i helpim mi long save olsem, sapos mi tanim bel na lusim ol pasin nogut bilong mi, em bai amamas long lusim ol rong bilong mi na kamap pren bilong mi. Mi laik yupela i raitim yet ol stori bilong helpim ol yangpela.

B. M. A., long Spen

Kosta Rika Mi laik stretim tingting bilong yupela long dispela stori “Kosta Rika​—⁠Liklik Kantri, Kain Kain Samting i Pulap Long En.” (Februeri 8, 1996) Yupela i bin tok olsem “klostu 27 pesen bilong graun long Kosta Rika i gat tambu, i no gat narapela kantri i bin makim bikpela hap graun olsem.” Tasol wanpela buk (World Almanac) i tok, Ekwado i bin makim pinis klostu 40 pesen bilong graun bilong en bilong lukautim ol animal pisin samting.

M. E., long Ekwado

Tenkyu long stretim tingting bilong mipela.​—⁠Edita

Andrew i Lainim Mipela Nau tasol mi bin kaunim stori “Ol Samting Mipela i Lainim Long Andrew,” em stori bilong yangpela man i gat sik Down’s syndrome. (Epril 8, 1996) Pikinini bilong mipela tu i gat sik long tingting, na planti tok bilong papamama bilong Andrew i kamapim ol samting mipela i save pilim. Sampela taim i hatwok long ol brata Kristen bilong mipela long pilim ol hevi bilong mipela long lukautim pikinini i gat sik long tingting na ol hevi dispela i save kamapim long famili. Olsem na tenkyu long dispela stori.

J. B., long Inglan

Mi ting olsem dispela em i wanpela gutpela stori tru yupela i bin raitim, long wanem, yupela i pilim tru dispela hevi. Long tripela pes tasol, yupela i bin kamapim gut olgeta tok olsem yumi mas kisim wanem kain tingting long ol man i gat kain sik olsem. Stori i skulim yumi gut long pasin bilong tingim narapela.

M. L., long Spen

Long kirap bilong dispela yia, meri bilong mi i bin karim wanpela pikinini man i gat sik Down’s syndrome. Kain olsem papamama bilong Andrew, mipela tu i pilim ol samting planti papamama i bin pilim taim ol i save olsem pikinini bilong ol i gat kain sik olsem. Mipela tu i bel hevi na tingting planti, na planti askim i pulap long tingting bilong mipela long ol samting bai painim mipela long nau na long bihain. Mipela i bin kisim stretpela tingting long sik bilong pikinini bilong mipela. Klostu em bai winim sikspela mun, na em i wok long i stap i orait. Wanpela de bihain long em i kamap, meri bilong mi i bin kisim bikpela amamas tru taim planti brata sista Kristen bilong mipela i kam bilong lukim mipela. Mipela i bin pilim tru olsem famili spirit em i bikpela samting. Na i no pasin sori bilong ol brata sista tasol, Jehova i save tingim yumi tu. Tenkyu long dispela stori.

G. C., long Frans