Pas Bilong Ol Man
Wok Bisnis Long Smok Ol stori “Kilim i Dai Planti Milion Bilong Kisim Planti Milion Kina” (Janueri 8, 1996) i bin givim gutpela tingting na save. Piksa long skin bilong nius (“Skull With Cigarette”) bilong Vincent van Gogh em wanpela samting tru bilong pretim man! Ating dispela piksa yet inap helpim sampela man long lusim smok o helpim sampela bambai ol i no ken kirap long smok.
M. B., long Amerika
Mi save wok wantaim lain American Cancer Society, olsem na mi bin amamas tru long kaunim ol dispela stori. Mi salim wanpela bilong dispela nius i go long meri i wok olsem siaman bilong wanpela lain i save wok wantaim bilong pinisim tabak. Em i bin amamas tru long yupela i raitim gut stori na yupela i bin skelim gut, na em i laik kisim 35 nius moa bilong givim long ol wanwok bilong em.
J. O., long Amerika
Maski mitupela man bilong mi i bin lusim smok inap 3-pela mun, bikpela laik long smok yet i no lusim mi. Tasol taim mi kaunim dispela stori, mi kisim save olsem, sampela marasin ol i save putim insait long smok, em i samting nogut tru na i tambu tru long kapsaitim dispela kain marasin long graun na karamapim! Dispela i strongim mi long mi no ken laikim tru ol samting nogut.
L. T., long Saut Afrika
Ol Yangpela i Bikhet Mi amamas tru long dispela stori “Ol Yangpela i Laik Save . . . Olsem Wanem Mi Ken Stretim Wokabaut Bilong Mi?” (Septemba 8, 1995) Em i bin strongim mi long ol samting bilong spirit. Dispela stori i strongim mi long beten long Jehova na askim em long lusim tingting long ol rong mi bin mekim bipo. Taim mi no kaunim yet dispela stori, olgeta taim mi bin bel hevi stret long ol dispela sin. Planti nait taim mi laik slip, mi ting pasin bilong kilim i dai mi yet em tasol i rot bilong stretim hevi. Nau mi save, ol lo bilong Jehova em bilong helpim yumi, na ol popaia mi bin mekim bipo bai skulim mi long no ken mekim gen.
Q. B., long Amerika
Taim mi yangpela mi bin lusim Jehova na oganaisesen bilong em. Klostu 5-pela yia nau mi kam bek pinis, tasol sampela taim mi pilim olsem Jehova i no inap lusim tru ol rong bilong mi. Nau mi save dispela tingting bilong mi i no stret; dispela tingting kranki i bin stap oltaim long bel bilong mi, nau em i pinis.
R. D., long Trinidat
Kirap! i Helpim Mipela Sampela yia i go pinis wanpela Kirap! (Oktoba 8, 1984) i bin stori olsem, i gutpela sapos famili i toktok long ol samting ol i mas mekim sapos haus i paia, na mekim traim ol dispela samting. Mitupela man bilong mi i bin bihainim dispela tok. Long Janueri 1995, mipela inap bihainim tru dispela tok bilong nius. Mi kirap long nait na mi lukim plua bilong haus daunbilo i paia bikpela. Mitupela i bin bihainim ol samting mipela i bin traim traim planti taim na ranawe lusim haus na i no kisim bagarap. Mi amamas moa yet long dispela stori bilong Kirap!
G. E., long Jemani
Kalabusman Long Japan Taim mi kaunim stori “Bom Atom i Tromoi Papa Bilong Mi i Go Ausait Long Kalabus” (Julai 8, 1995), dispela i bin strongim mi tru. I no longtaim i go pinis mi kisim baptais na kamap wanpela Kristen, na planti taim mi bin ting, sapos wanpela traim i kamap long mi, bai mi stap gut long God o nogat. Taim mi kaunim stori long strongpela bilip bilong Brata Katsuo Miura, bel bilong mi i pilim tru. Dispela i bin helpim mi long luksave long samting mi yet i sot long en long bilip—olsem mi mas larim God Jehova i stap olsem as bilong bilip bilong mi.
K. T., long Japan