Pas Bilong Ol Man
Slip Tenkyu tru long stori “Skin Bilong Yu i Mas Kisim Slip.” (Disemba 8, 1995) Mi laik tok olsem dispela stori i bin givim save long mi. Mi skul bilong kamap dokta, olsem na mi save lusim planti aua long nait bilong mekim gut stadi na mi no kisim gutpela slip. Sampela hevi olsem yupela i bin kamapim i bin painim mi. Bai mi traim long stretim gut taim bilong mi long slip.
L. H., long Trinidat
Famili i No Laikim Em Mi gat 14 krismas, na mi rait bilong tok tenkyu long yupela long stori “Wanpela Famili i Save Laikim Mi Tru.” (Disemba 8, 1995) Dispela stori i bin strongim tru bilip bilong mi. Udom Udoh i stap olsem gutpela piksa bilong ol yangpela long olgeta hap. Em i bin kamapim klia olsem, maski yumi yangpela yet, yumi inap sanap strong long bihainim tok i tru.
A. M., long Amerika
Olsem Udom, bihain long taim mi kirap na stadi long Tok Bilong God, hevi i painim mi. Ol i bin tokim mi tu long lusim haus. Bihain long ol i mekim nogut tru long mi na toknogutim mi, mi lusim haus. Wanpela elda na meri bilong em i bin lukautim mi long pasin sori. Stori bilong yupela i bin strongim mi tru. Em i gutpela tru long i stap insait long dispela narapela kain famili i stap long olgeta hap!
L. J., long Amerika
Pasin Pamuk Tenkyu tru long stori “Baibel i Tok Wanem? Pasin Pamuk—Lusim Tingting o Nogat?” (Janueri 8, 1996) Inap planti yia man bilong mi i bin mekim nogut long mi, na bihain mi katim marit, na as bilong mekim olsem i stret wantaim lo bilong Baibel. Tasol maski i stret mi bin mekim olsem, sampela i mekim na mi pilim olsem mi gat asua long mekim dispela samting na inap planti yia mi bin karim hevi long daunim dispela tingting. Na tu, mi bin ting olsem Jehova i bin givim baksait long mi. Tasol dispela stori i bin kamapim tingting bilong mi long planti samting na i strongim mi tru.
A. K., long Ripablik Sek
Ol Tambaran Bilong Afrika Stori bilong yupela “Tambaran Em i Makim Wanem Samting?” (Epril 8, 1996) i bin helpim mi gut tru. Yupela i stori olsem, ol Kristen tru i no inap long putim ol kain tambaran olsem long haus. Tasol olsem wanem long ol tambaran ol i bin wokim tasol bilong ol turis samting o ol i no bin mekim wok long en long wok bilong lotu?
J. A., long Amerika
Stori bilong mipela i bin mekim planti tok long ol tambaran ol i wokim bilong mekim wok long en long lotu giaman. Mipela i bin tok olsem, “ol tambaran bilong lotu na ol tambaran bilong ol turis i ken baim i narapela narapela kain.” Long hap bilong Wes, ol kain tambaran ol i save wokim long faktori i no samting bilong lotu, ol i samting bilong bilasim ol haus samting. Olsem na ol wan wan Kristen yet i mas skelim long tingting bilong ol, olsem ol bai bilasim haus bilong ol long kain tambaran olsem o nogat. Na ol i mas tingim, sapos ol i mekim olsem, ol narapela i gat tok long dispela o nogat. (1 Korin 10:29)—Edita.
Rainoseros Mi laik tok amamas long yupela long save bilong yupela long kamapim gut ol stori i olsem i no bikpela samting mipela i mas save long en, na yupela i mekim i kamap naispela stori tru bilong ol man olsem mi, em bipo mi no bin amamas long kaunim ol stori olsem. Nau tasol mi kaunim pinis stori “Animal i Gat Nambawan Kom.” (Epril 8, 1996) Mi save kaunim ol kain stori olsem, long wanem, mi pilim olsem em wanpela samting mi mas mekim. Tasol taim mi kaunim pinis, mi save kirap nogut—ol i gutpela stori bilong kaunim!
J. M., long Amerika
Kosta Rika Mi kisim nius i gat dispela stori “Kosta Rika—Liklik Kantri, Kain Kain Samting i Pulap Long En” (Februeri 8, 1996) sampela de paslain long mi raun i go long dispela hap. Mi kisim nius i go wantaim mi bambai mi ken lukim bilong helpim mi. Tru tumas, dispela kantri i pulap long kain kain samting na ol samting bilong amamas long en! Olgeta hap mipela i go long en, ol manmeri i amamas na tromoi han long mipela. Mi tingim nupela taim na olgeta man long olgeta hap bai i mekim kain pasin pren olsem.
T. N., long Amerika