Pas Bilong Ol Man

Pilai Laki I no longtaim i go pinis mi bin beten bambai wanpela nius i gat stori bilong pilai laki i ken kamap, long wanem, ol wanblut bilong mi i insait tru long dispela samting na ol i mas kisim helpim. I no longtaim na bai ol i pinisim olgeta mani bilong ol. Mi laik ol dispela stori “Pilai Laki​—⁠Planti Moa i Kalabus Long En” (Disemba 8, 1995) i ken helpim ol. Ol i karim bikpela hevi, long wanem, ol i kalabus tru long dispela samting. Bipo mipela famili i save pilai laki 6 i go inap 12-pela aua! Nau mi amamas tru, long wanem, mi inap tingim ol lo bilong Jehova long i stap bilong mi.

L. D., long Amerika

Ol samting yupela i bin kamapim long stori i painim mi inap 20 yia, long wanem, man bilong mi i kalabus tru long pasin bilong pilai laki. Mi bin kisim strong long rot bilong ol nius long ol dispela taim, tasol nau mi kisim wanpela samting mi gat bikpela laik long kisim na mi bin wet inap 20 yia long kisim.

F. E., long Japan

Sakim Birua Mi bin amamas tru long stori “Ol Yangpela i Laik Save . . . I Stret Mi Lain Long Sakim Birua?” (Disemba 8, 1995) Hia long Yukren mipela i save kisim nius Kirap! wanpela taim tasol long olgeta mun, na dispela stori “Ol Yangpela i Laik Save . . . ” i no stap insait long en. Mi save long kaunim tok Inglis, olsem na mi bin kaunim dispela stori. Dispela i helpim mi long save long tingting bilong God long dispela samting.

V. L., long Yukren

Mi gat 12-pela krismas, na mi laik tok tenkyu long yupela long ol stori yupela i save raitim. Dispela stori bilong sakim birua i bin helpim mi tru. Em i helpim mi long save long pasin mi mas bihainim taim ol wanskul i laik mekim nogut long mi.

D. C., long Itali

Skul Bilong Afrika Mi wanpela bilong lain Akan, na skul bilong ol tumbuna long Afrika na bilong ol lain long Wes i bin helpim mi gut. Mi amamas tru long kaunim stori bilong yupela “Skul Bilong Afrika​—⁠Skulim Ol Man Long Wanem Ol Samting?” (Februeri 8, 1996) Mi bin pilim tru gutpela pasin yupela i bin mekim bilong tingim na givim biknem long skul bilong Afrika. Sampela man i ting olsem lotu bilong yupela i ting pasin tumbuna bilong Afrika em i samting nogut tru. Dispela stori i kamapim klia dispela tingting bilong ol i no stret.

S. N., long Gana

Stap Pren Bilong God Tenkyu tru long stori “Ol Yangpela i Laik Save . . . Mi Inap Stap Pren Bilong God?” (Janueri 8, 1996) Dispela stori i mekim na aiwara bilong mi i kam daun. Mi gat 13 krismas na mi bin mekim sampela pasin nogut tru. Ol narapela i bin traim long strongim mi, tasol mi hatwok tru long beten long Jehova. Mi ting em i no laikim mi moa, long wanem, mi bin mekim planti popaia. Dispela stori i givim save long mi olsem God i save lusim tingting long ol popaia na mi inap beten long em.

J. D., long Jemani

Pilai Nogut Long Meri Tenkyu tru long stori bilong yupela “Ol Yangpela i Laik Save . . . Pilai Nogut Long Meri​—⁠Olsem Wanem Mi Inap Abrusim?” (Jun 8, 1996) Mi gat 17 krismas, na mi bungim wanpela manki long skul em i no Kristen. Mi ting em i gat gutpela pasin, tasol bihain em na ol poroman bilong em i mekim kain kain tok doti long mi na tok long bagarapim mi. Mi mas lusim dispela skul bambai mi ken abrusim dispela samting. Mi bin kisim planti gutpela save long rot bilong dispela stori. Nau mi save long samting mi mas mekim sapos ol man i laik mekim samting nogut long mi.

T. G., Potugal

Wanpela wanwok bilong mi i bin pilai nogut long mi na tok long bagarapim mi. Taim mi liklik yet wanpela i bin mekim pasin sem long mi, olsem na sampela taim em i hatwok long mi long sanap strong na lukautim mi yet. Tasol maski planti taim mi tokim em long em i mas larim mi, em i mekim mekim na bihain mi tokim ol bos long dispela samting, na nau em i no moa mekim dispela samting long mi. Mi amamas tru long dispela stori. Ol meri i mas save long rot bilong sakim dispela kain hevi.

V. A., long Amerika