Pas Bilong Ol Man
Holim Meri na Karim i Go Tenkyu tru long dispela stori “No Ken Mekim Wanpela Samting, Nogut Mi Kilim Yu.” (Julai 8, 1992) Dispela stori i mekim na mi krai. Samting i bin painim Lisa Davenport i no bin painim mi, tasol mi stap bel hevi inap longtaim liklik na sampela taim mi pilim olsem mi laik i dai. Dispela stori i kirapim mi long tingim tru bikpela helpim Jehova i save givim yumi na olsem wanem em i save helpim yumi taim yumi gat hevi samting.
N. O., long Japan
Ol Famili i Pas Gut Wantaim Mi bin amamas tru long ol dispela stori “Yupela Ol Famili Yupela Mas Pas Gut Wantaim—No Ken Lusim Taim.” (Jun 8, 1992) Aiwara i kamap long ai bilong mi taim mi lukim naispela piksa long skin bilong dispela nius. Yupela i skelim gut tru olgeta tok yupela i laik kamapim na yupela i raitim long pasin sori! Pasin bilong famili long pas gut wantaim em i bikpela samting. Tenkyu long helpim mipela long tingim dispela samting.
K. E., long Amerika
Mi pilim tru tok bilong ol dispela stori. Planti bilong yumi i ting, sapos yumi stadi long Baibel wantaim ol pikinini, na yumi go wantaim long ol miting Kristen, na yumi wok wantaim long autim tok, bai wok papamama bilong yumi i kamap gutpela. Tasol nau mi save, ol gutpela papamama i mas mekim sampela samting moa—ol i mas pas gut wantaim ol pikinini, olsem na pikinini i ken save papamama i laikim tru em. Dispela tok i bin kamap long ol narapela nius bilong yupela tu, tasol nau mi pilim tru as bilong dispela tok.
T. H., long Amerika
Taim mi no marit yet mi save mekim wok kuskus. Mi laikim tru wok bilong mi. Bihain taim mi gat ol pikinini, mi lusim wok na mi stap long haus wantaim ol pikinini. Tasol sampela taim mi les na mi laik go bek long wok. Taim mi kaunim ol stori bilong yupela, mi save mi gat wok long lukautim ol pikinini bilong mi.
S. M., long Amerika
Pilai Laki Tenkyu long dispela stori “Ol Yangpela i Laik Save . . . Pilai Laki Em i Samting Nogut o Olsem Wanem?” (Me 8, 1992) Long skul bilong mipela, planti manki i save pilai laki. Long wanpela pilai, man i win i save kisim 20 yen; sampela wanklas bilong mi i save kisim 2,000 yen i kam long skul! Wanpela taim ol i singautim mi long insait long pilai. Mi gat tupela tingting na mi ting, ating pilai laki i no nogut olgeta, na mi laik traim wanpela taim tasol. Tasol taim mi kaunim dispela stori, nau mi save, pasin bilong pilai laki em i no gutpela samting, na sapos yu traim wanpela taim tasol, bai yu laik mekim long olgeta taim.
N. N., long Japan
Bihainim Stretpela Pasin Mi laik kamapim tingting bilong mi long dispela stori “Gutpela Yumi Bihainim Pasin i Stret?” (Epril 8, 1992) Ol Witnes Bilong Jehova i no save kirapim ol pikinini bilong ol long pilai spot bihain long skul, olsem na mi ting dispela stori inap mekim na ol man i gat tingting kranki long dispela samting.
C. P., long Amerika
Nius i stori long wanpela yangpela manki em i pilai sofbal. Tisa i amamas long en, long wanem, em i bin mekim tok tru. Tasol nius “Sports Illustrated” i bin kamapim dispela stori. Olsem na dispela yangpela em i no wanpela Witnes Bilong Jehova. Mipela i no raitim dispela stori bilong kirapim ol man long insait long spot, nogat. Mipela i raitim bilong soim ol man olsem pasin bilong bihainim stretpela pasin em i gutpela samting.—ED.
Pas Bilong Ol Man Mi save amamas long kaunim dispela hap, olsem “Pas Bilong Ol Man.” Mi kirap nogut long pasin bilong yupela long bekim tok bilong ol man. Sapos yupela i popaia long prinim wanpela tok samting, long pasin daun yupela i save tokaut long dispela. Na maski man i no amamas long wanpela tok bilong yupela, yupela i no save lusim tok i tru bilong Baibel.
C. W., long Amerika