Pasin Bilong Ol Afrika na Not Amerika Long Karim Bebi
WANPELA MAN LONG NAIJIRIA I RAITIM DISPELA STORI BILONG KIRAP!
LONG olgeta hap ol manmeri i save bihainim kain kain pasin bilong karim bebi bilong ol. Pasin bilong ol Not Amerika long karim bebi bilong ol i narapela kain tru long pasin bilong ol Afrika.
Sindaun bilong ol manmeri long dispela tupela hap i narapela kain stret, olsem na yumi inap save—pasin bilong ol long karim pikinini bai narapela kain tu. Pastaim yumi ken kisim save long ol manmeri bilong Not Amerika long mekim dispela samting.
Pasin Bilong Ol Not Amerika
Long Amerika na long planti kantri moa, ol mama i save mekim wok long karis bilong bebi i gat 4-pela wil. Long nau ol faktori i wokim karis i no hatwok long ol mama i ken mekim wok long en, na ol i gat stail, na i gutpela long bebi i sindaun insait long en. Planti karis i gat ol gutpela gutpela pilo, na ol liklik matres mama inap kamautim na wasim, na sia inap sanap o slip.
Ol karis i mekim na pikinini bai slip, o sindaun gut—em i no inap ran nabaut, olsem na lek bilong em i malolo. Long pikinini i laik slip, karis i olsem bet i gat wil. Na karis i wokabaut inap helpim pikinini long stap isi sapos em i skin les na krai.
Na karis i helpim papamama tu. Wanpela mama i tok: “Karis i winim pasin bilong karim nabaut pikinini.” Ating i no hatwok long karim pikinini taim em i liklik, tasol taim em i go bikpela liklik na skin i go patpela moa, i hatwok. Na papamama i amamas long save pikinini i sindaun gut long karis ol i bosim.
Long Amerika ol faktori i wokim gut ol karis bambai pikinini i no inap kisim bagarap. Braitpela bilong aninit bilong karis i bikpela liklik na i stap klostu long graun, olsem na karis i no ken kapsait hariap. Ol brek i mas strong na stap long wanpela hap em pikinini i sindaun long karis i no inap holim na lusim. Faktori i save putim sampela huk bilong holim gut bun bilong karis bambai em i no ken bruk. Na ol i tingim gut ol hap bilong karis pikinini inap subim liklik pinga bilong em i go insait na kisim bagarap, na ol i pasim gut. Na sia bilong karis i gat let bilong pasim pikinini.
Pe bilong karis i kain kain—sampela i olsem 20 dola i go inap 160 dola o 200 dola samting. Pe bilong wanpela nambawan karis i olsem 300 dola. Basket bilong dispela kain karis i bikpela moa, na karis i gat ol nambawan pilo, na maski ren o san em i no inap bagarap, na ol wil bilong en inap i go i kam na senisim rot bilong ol, na em i no hevi—kwiktaim mama inap brukim na apim. I gat wanpela karis ol i wokim na taim papamama i ran bilong kisim eksasais, ol i ken subim pikinini long dispela karis—pe bilong en i olsem 380 dola.
Pasin Bilong Ol Afrika
Long Afrika na long planti kantri bilong Esia, planti mama i save karim bebi long baksait bilong ol, olsem mama bilong ol yet na tumbuna mama bilong ol i bin mekim bipo. Dispela kain pasin i no gat pe na long ol Afrika em i gutpela, winim ol narapela rot. Ol i mas holim wanpela strongpela hap laplap tasol. Mama i save brukim baksait na long gutpela rot em i slipim pikinini long baksait bilong em, nau em i raunim laplap long em na pikinini wantaim na pasim.
Taim mama i pasim bebi olsem, sampela i save pundaun? Nogat, em i no kamap planti taim. Taim mama i wok long pasim bebi, em i putim wanpela han long bebi bilong holim em na pasim laplap wantaim narapela han. Wanpela meri bilong Naijiria, nem bilong em Blessing, em i stori long sampela pikinini na em i tok: “Ol bebi i no sakim mama; ol i holim strong mama. Ol i amamas tru long sindaun long baksait bilong em. Sampela taim ol i krai, long wanem, ol i laik sindaun long baksait bilong mama. Tasol sapos bebi i no laik sindaun long baksait, mama bai pasim wanpela o tupela han bilong bebi aninit long han bilong em na holimpas klostu long skin bilong em, na nau em bai pasim laplap long bebi.”
Bilong lukautim gut nek bilong nupela bebi, mama bai mekim wok long narapela hap laplap na pasim dispela laplap olsem em i save pasim bikpela hap laplap. Na narapela samting mama bai mekim bilong lukautim gut liklik bebi o wanpela bebi i slip, em bai pasim tupela han bilong em insait long laplap. Tasol ol pikinini i bikpela liklik ol i amamas sapos han bilong ol i no pas.
Ol mama Afrika i save karim pikinini long baksait bilong ol hamas yia? Bipo, sampela lain Afrika olsem ol Yoruba bilong Naijiria, ol i bin karim pikinini olsem i go inap long taim pikinini i kisim 3-pela krismas. Long nau pikinini bai raun long baksait bilong mama i go inap long taim em i kisim 2-pela krismas, o sapos mama i karim narapela bebi insait long dispela 2-pela yia, nupela bebi i kisim ples bilong em.
Bebi i sindaun gut long baksait bilong mama, olsem na em inap i go long ol hap mama i save go long en—go antap o kam daun long lata, o wokabaut long ples nogut, o kalap long PMV samting. Tru dispela pasin long karim bebi long baksait i no gat pe na i helpim mama, tasol em i helpim bebi tu—em i helpim tingting na bel bilong bebi, olsem mekim gut bel bilong em. Taim bebi i krai, mama i pasim em long baksait bilong em—bebi i slip na mama i mekim yet wok bilong em.
Taim bebi i slip na mama i laik rausim em long baksait na putim em long bet, em i mas isi tru long mekim, long wanem, planti bebi i no amamas sapos mama i bagarapim slip bilong ol. Olsem na bilong mekim olsem, mama bai slip long sait bilong em na isi isi em bai lusim laplap na karamapim laplap long bebi olsem blanket. Na sampela mama i save putim pilo klostu long bros bilong bebi na pilo bai lukautim bebi olsem baksait bilong mama i bin mekim.
Pasin bilong karim bebi long baksait i helpim pikinini na mama long ol narapela samting tu—mama inap save long ol samting pikinini i laik kisim. Sapos skin bilong pikinini i no gat strong, o em i no sindaun gut, o em i gat fiva, o em i pispis—mama inap save. Na dispela pasin bilong karim pikinini long baksait i save helpim pikinini inap longpela taim. Wanpela buk (Growth and Development) i tok: ‘Taim mama i stap klostu long bebi dispela i save helpim mama na bebi long pas gut wantaim, na narapela i laikim tru narapela. Dispela i mekim na bihain taim pikinini i go bikpela, em i pas gut wantaim ol narapela man. Ol saveman i ting wanpela bikpela samting i save helpim tupela long stap olsem, em bebi i stap klostu long mama em inap pilim klok bilong mama i meknais, olsem em i bin pilim taim em i bin stap insait long bel bilong mama.’
Ol bebi i amamas tru long stap klostu long mama, na dispela pasin bilong karim bebi long baksait i save inapim dispela laik bilong bebi. Long Afrika i no hatwok long painim ol pikinini i amamas long sindaun long baksait bilong mama. Sampela i slip, o sampela i pilai na holim gras o yau o bis bilong mama. O sampela mama i singsing isi isi tasol taim ol i wokabaut na lek i pairap, na bebi bilong ol i mekim liklik pairap bilong em yet olsem em tu i singsing.
Yes, pasin bilong planti mama Afrika long karim pikinini i narapela kain stret long pasin bilong ol Not Amerika. Tasol maski i olsem, tupela wantaim i gutpela na i stret long sindaun bilong ol.