OL TISA i tokim ol sumatin bilong wanpela skul long Kalifonia, Amerika, long raitim wanpela stori i gat het-tok olsem i stap antap. Wanpela sumatin i raitim gut wanpela stori insait long dispela resis, em Eric, em i gat 11-pela krismas na em i pikinini man bilong wanpela famili Witnes. Em yet i raitim dispela stori em Baibel i as bilong en.

“Namba 2 Pait em i wanpela pait nogut tru. Planti man i no gat asua ol i bin i dai. Tasol sapos mi inap senisim wanpela samting i bin kamap bipo, dispela pait i no inap tru long kamap na ol i no inap raitim ol stori bilong en. Tingim taim ol i kilim i dai John F. Kennedy. Tasol sapos mi inap senisim wanpela samting i bin kamap long bipo, stori bilong en tu ol i no inap raitim long ol buk. Long 1968, Martin Luther King, Jr., i dai long wanem, em i laik traim long senisim tingting bilong ol man. Tasol sapos mi inap senisim wanpela samting i bin kamap bipo, dispela tu i no inap kamap. Sapos mi inap senisim wanpela samting i bin kamap bipo, sindaun bilong ol man bai narapela kain, olgeta samting yumi save long en long nau bai senis. Na olgeta samting, olsem i stap bilong yumi ol man long nau, em tu bai senis. Wanpela samting i bin kamap long bipo i senisim sindaun bilong ol man na i kamap olsem nau yumi lukim​—⁠pait, bagarapim man, sik na pasin nogut tru.

“Ating yu tingting planti, ‘Dispela samting em wanpela sik? Wanpela gavman? O wanpela pait?’ Askim yu yet, ‘Sapos em i wanpela sik, olsem wanem em inap pasim ol man long mekim pasin nogut?’ Yu bai tok: ‘Em i no inap.’ Nau yu ting, ‘Ating em wanpela gavman em inap stretim olgeta hevi bilong yumi.’ Tasol ol man i bosim gavman na ol man i no nambawan olgeta na ol i save dai. Olsem na ol gutpela wok bilong ol bai lus, a? Nau yu tok, ‘Em mas wanpela pait olsem Namba 2 Pait.’ Nogat! Em i no wanpela pait, long wanem, long pait wanpela lain tasol i save win, na narapela lain i save lus. I nogat wanpela bilong ol dispela samting yumi kolim em inap pinisim tru i dai, pait na bagarapim man, sik, na pasin nogut. Ating yu tingting planti, wanem dispela samting i bin kamap bipo na mi laik senisim.

“Sin. Indai. Sin na indai em samting mi laik senisim. Tasol olsem wanem? Sin na indai i stap yet. Sin na indai i save painim yumi olgeta. Orait olsem wanem yu inap senisim dispela samting i bin stap long bipo yet i kam inap nau? Yu mas pinisim long taim em i kirap nupela. Taim Adam na Iv i bikhet long wok bos bilong God dispela i as bilong ol samting yumi lukim long nau. Ol i laik mekim ol samting long laik bilong ol yet, na long dispela rot sin na indai i kisim yumi.

“Olsem na dispela samting i bin kamap bipo mi laik senisim, em taim Satan i mekim namba wan tok giaman long nambawan wok bos bilong God. Adam na Iv i bihainim dispela tok giaman na long dispela as, ol hevi i painim yumi olgeta. Ol i bin mekim sin long Bos tru bilong wok gavman, em God.”

Long Sarere, Ogas 12, 1995, Eric i kaunim stori bilong em long taim bilong bikpela de kibung bilong ol Witnes Bilong Jehova long Noko, Kalifonia. Ol manmeri i amamas tru long harim stori bilong wanpela yangpela, em i kamapim dispela stori long skul bilong kirapim tingting bilong ol man long save long as bilong ol hevi i painim ol manmeri. Taim God Jehova i bagarapim “dispela snek bilong bipo yet” na pinisim olgeta hevi em Satan i as bilong en, em bai gutpela tru!​—⁠KTH 12:9; 21:​3, 4; Stat 3:​1-6.