Ol Yangpela i Laik Save . . .

I Gutpela Mi Insait Long Tim Bilong Pilai Spot?

“LONG go insait long wanpela tim em gutpela samting tru o olsem wanem?” Dispela askim i bin kamap long nius Seventeen. Bilong bekim dispela askim nius i tok: “Yu wok wantaim ol narapela long winim wankain mak, olsem na yupela i pas gut wantaim. Na tu, yu lain long pasin bilong ol narapela olsem: Stretim ol hevi wantaim, redi long senisim toktok na pasin, tingim gut narapela, na redi long lusim sampela pasin bilong yu yet.”

Olsem na taim yu insait long wanpela tim, i olsem i gat planti gutpela samting bai painim yu​—⁠olsem amamas na mekim eksasais samting.a Sampela man i ting, taim man i insait long tim bilong spot, dispela inap helpim em long kisim gutpela pasin. Olsem na wanpela tim bilong pilai beisbal na ol yangpela i insait long en, ol i gat kain tok olsem bilong helpim ol: “Gutpela Pasin, Strongpela Bel, Stap Gut.”

Tasol wanpela hevi em olsem, i no olgeta taim ol tim bilong pilai spot i bihainim ol gutpela pasin. Wanpela buk (Kidsports) i tok: “Sampela taim ol yangpela i lain long tok nogut, giaman, pait, pretim narapela, bagarapim narapela.”

Tingting Tasol Long Win?

Wanpela stori i bin kamap long nius Seventeen i tok: “Ol hevi i save painim ol manmeri i pilai spot em ol i save tingting strong olsem ol i mas win.” Dispela i narakain olgeta long tok bilong Baibel em i tok: “Yumi no ken litimapim nating nem bilong yumi yet, na yumi no ken sutim bel bilong ol arapela long kirapim pait, na yumi no ken mangal long ol samting bilong ol arapela.” (Galesia 5:26) Sapos long gutpela pasin sampela taim yumi pilai, bai yumi kisim amamas long en, tasol pasin bilong tingting strong long pilai resis na win, bai kamapim kros na tok pait, em nau yumi no painim amamas long pilai.

Taim Jon i stap long haiskul em i bin pilai kikbal. Em i tok: ‘Kosa bilong mipela long dispela taim em i man bilong givim bel tumas long win; oltaim em i bikmaus long mipela. Mi no laik tru long go long trening. Mi bin pilim olsem mi stap long wanpela banis kalabus nogut.’ I no olgeta kosa i gat kain pasin nogut olsem, tasol planti i save tingting strong long tim bilong ol i mas win. Wanpela man bilong raitim stori i tok: ‘Bihain planti man bilong pilai spot i no amamas moa long pilai, nogat; ol i tingting long win tasol. Dispela i mekim na ol i bel hevi stret.’ Wanem samting inap kamap?

Nius Science News i kamapim wanpela ripot i tok olsem: Namel long ol yangpela i save pilai basketbal o kikbal taim ol i stap yet long skul koles, “12 pesen bilong ol i tok, 2-pela bilong ol 5-pela hevi i bin painim ol: Hevi bilong tingting, hevi bilong skin, hatwok long abrusim ol drak o strongpela dring, bagarap long tingting na skin, na ol i no skul gut.” Wanpela buk i tok: “Klostu olgeta man i mekim sampela samting wantaim ol tim bilong pilai spot i ting, pasin bilong kisim drak i stap insait long olgeta kain kain spot.”​—⁠On the Mark.

Sakim Ol Gutpela Pasin

Tingting strong long win inap mekim na wanpela yangpela man bilong pilai em inap sakim pasin i stret na giamanim ol man. Buk Your Child in Sports i tok: “Long ol spot long nau, pasin bilong win em i no wanpela gutpela samting tasol, yu mas win. Sapos yu lus em i no wanpela samting nogut tasol, yu mekim bikpela rong na ol i no inap lusim tingting long en.”

Narapela samting nogut: Ol kosa i save subim strong ol man bilong pilai long bagarapim skin bilong ol man long narapela tim. Wanpela stori bilong nius Psychology Today i bin tok: “Bilong kamap hapman stret bilong pilai spot, yu mas kamap man nogut. Planti man bilong pilai spot, ol kosa, na ol manmeri i lukim pilai ol i ting olsem.” Wanpela man i save pilai kikbal bilong kisim mani em i stori long pasin tru bilong em olsem em i man bilong ‘toktok isi, tingim ol narapela na mekim pasin pren long ol narapela.’ Tasol long taim bilong pilai, em i save senis na kamap narapela kain man olgeta. Em i stori long pasin bilong em long taim bilong pilai na em i tok: ‘Long dispela taim mi man nogut tru. Mi no save tingim man mi laik bamim.’ Planti taim ol kosa i save strongim dispela kain pasin.

Baibel i tokim ol Kristen olsem: “Olsem na yupela i mas kisim olkain pasin olsem. Yupela i mas sori tru long ol arapela na mekim gut long ol. Yupela i mas daunim yupela yet na mekim pasin isi long ol man, na yupela i no ken belhat kwik long ol man i rongim yupela.” (Kolosi 3:12) Sapos long olgeta taim yu harim ol tok i kirapim yu long bagarapim ol man bilong narapela tim, bai yu kisim ol gutpela pasin olsem? Robert, em i gat 16 krismas na em i tok olsem: “Mi bin insait long ol tim bilong pilai spot. Yu no tingim yu bagarapim husat, bikpela samting em yu mas win.” Nau em i wanpela Kristen i baptais pinis, na tingting bilong em i senis. Em i tok: “Mi no inap mekim gen dispela samting.”

Strongim Skin o Bagarapim Skin?

Na yumi no ken lusim tingting tu long ol bagarap bilong skin dispela inap kamapim. Tru maski yumi pilai wantaim ol poroman bilong kisim amamas, bagarap inap painim yumi tu. Tasol bikpela bagarap moa inap painim ol yangpela taim ol i insait long ol pilai i wankain olsem ol bikpela pilai bilong kisim mani samting.

Buk Your Child in Sports i tok: ‘Ol man i pilai bilong kisim mani, ol tu inap kisim bagarap. Tasol ol i save gut long pilai, na ol i gat strongpela skin, na ol i bikpela pinis, na maski ol inap kisim bagarap, ol i no tingim long wanem ol i kisim bikpela mani. Na tu, ol i gat ol gutpela samting bilong helpim ol, olsem: gutpela kosa, ol gutpela samting bilong strongim skin taim ol i trening, na ol gutpela dokta. Ol pikinini long skul i no gat ol gutpela samting olsem.’ Baibel i tokim ol Kristen long ‘givim bodi bilong ol long God olsem ofa.’ (Rom 12:⁠1) Olsem wanem? Bai yu tingting gut na yu no ken larim bodi bilong yu i kisim bagarap?

Ol Narapela Samting Bilong Tingim

Maski skin bilong yu i no inap kisim bagarap long wanpela kain spot olsem, dispela inap kisim bikpela hap taim bilong yu. Taim bilong trening inap pulim bikpela hap taim bilong yu, olsem na yu no gat hap taim long painim amamas bilong yu yet. Na tu, em bai kisim bikpela hap taim bilong yu na yu no inap mekim stadi na homwok bilong yu. Nius Science News i tok olsem: Ol man bilong pilai spot na ol i stap long koles “ol i no save kisim gutpela mak tumas” olsem ol narapela sumatin i mekim sampela samting taim ol i lusim koles long apinun. Na bikpela samting moa em olsem, taim yu insait long wanpela tim, bai yu hatwok tru long mekim samting Baibel i kolim “pasin i gutpela tru”​—em ol samting bilong spirit. (Filipai 1:10) Askim yu yet, “Sapos mi insait long wanpela tim, dispela bai mekim na mi mas lusim ol miting, o em bai mekim na mi no insait tumas long mekim wok autim tok?”

Na tu, yu mas skelim gut ol samting em inap kamap sapos yu lusim planti aua long stap wantaim ol yangpela na ol bikman i no gat wankain tingting olsem bilong yu long ol stretpela pasin, na klinpela toktok, o pasin bilong resis na winim narapela. Baibel i tok: “Sapos yumi poroman wantaim ol man nogut, bai ol i bagarapim gutpela pasin bilong yumi.” (1 Korin 15:33) Tingim wanpela stori i bin kamap long nius The New York Times, em i tok: ‘Rum senis bilong ol man, em hap ol man i save stori nogut long skin bilong ol meri, hambak long ol bai win, na tok pilai long ol bai paitim nogut ol meri.’ Olsem wanem? Bai yu stap strong long ol samting bilong spirit sapos yu orait long harim kain tok olsem?​—⁠Skelim wantaim Jems 3:⁠18.

Skelim Gut Samting Yu Laik Mekim

Yu bin tingting long insait long wanpela tim bilong pilai spot? Sapos olsem, ol samting mipela i stori pinis long en bai helpim yu long tingting gut pastaim. Sapos yu tingim samting yu laik mekim, tingim tu ol narapela; nogut bel bilong ol i gat tok long samting yu bin mekim. (1 Korin 10:​24, 29, 32) Tru, yumi no inap putim ol strongpela lo long dispela samting, long wanem, sindaun bilong ol man i no wankain long olgeta hap bilong graun. Long sampela hap ol sumatin i mas insait long ol spot. Tasol sapos yu no save tru long samting yu mas mekim, toktok wantaim papamama o wanpela strongpela Kristen.

Planti yangpela Kristen i bin strong long pasim tok long bel long ol i no ken insait long tim bilong pilai spot. Em i no isi sapos yu wanpela man bilong pilai spot na yu save amamas long pilai! Sapos ol tisa, ol kosa, na papamama i strong long yu mekim olsem em bai hatwok moa. Yangpela Jimmy i tok: “Mi hatwok long bosim mi yet long mi no ken pilai. Papa bilong mi i no Kristen na taim em i stap long haiskul em i hapman stret bilong pilai spot. Sampela taim mi hatwok long mi no ken insait long wanpela tim.” Sapos olsem, papamama Kristen na ol strongpela Kristen long kongrigesen bai helpim yu long holimpas samting yu tingting pinis long mekim. Jimmy i tok: “Mi tenkyu tru long mama bilong mi. Sampela taim mi save bel hevi, taim mi gat bikpela laik long pilai spot. Tasol oltaim mama i save helpim mi long tingim ol gutpela samting mi inap mekim long i stap bilong mi.”

Long tim bilong pilai spot ol man inap lain long pasin bilong wok gut wantaim na bilong stretim ol hevi. Tasol i gat rot tu bilong lainim ol kain pasin olsem taim yu wok wantaim kongrigesen Kristen. (Efesus 4:​16.) Na pilai spot i save kamapim amamas, tasol i no olsem yu mas insait long wanpela tim bilong painim dispela kain amamas. Yu inap kisim amamas long pilai spot wantaim ol poroman Kristen klostu long haus o long wanpela pak. Long taim famili i go piknik samting, em gutpela taim bilong mekim sampela pilai bilong kisim amamas. Greg, em i gat 16 krismas, em i tok: “Em i gutpela moa taim yu pilai wantaim ol narapela long kongrigesen bilong yu, yu pilai bilong kisim amamas tasol, na yu stap wantaim ol poroman bilong yu!”

Tru, taim yu pilai klostu long haus, yu no inap kisim wankain amamas olsem yu kisim insait long wanpela tim i win. Tasol yu no ken lusim tingting, “sapos yumi laik mekim bodi bilong yumi i kamap strong, na yumi save trening oltaim, dispela bai i helpim yumi liklik. Tasol sapos yumi trening long mekim pasin bilong God i kamap strong long yumi, dispela bai i helpim yumi moa yet.” (1 Timoti 4:⁠8) Wok long kisim pasin bilong God na bai yu win tru long ai bilong God!

[Ol Futnot]

[Piksa long pes 27]

Planti taim ol kosa i save tingting tasol long win​—⁠maski yu mas bagarapim narapela bilong mekim olsem